ខេត្តព្រៃវែង ៖ ប្រជាពលរដ្ឋនៅភូមិថ្មី ឃុំពាមមានជ័យ ស្រុកពាមរក៍ ខេត្តព្រៃវែងជាង២០០គ្រួសារ កំពុងមានការព្រួយបារម្ភយ៉ាងខ្លាំង និងបានស្នើសុំឲ្យអាជ្ញាធរ និងមន្ត្រីជំនាញជួយអន្តរាគមន៍រឿងក្រុមសាឡង់បូមខ្សាច់ជាច្រើនគ្រឿងដែលបូមខ្សាច់គៀកច្រាំងទន្លេ ខាងក្រោយផ្ទះរបស់ពួកគាត់…
ខេត្តព្រៃវែង ៖ ប្រជាពលរដ្ឋនៅភូមិថ្មី ឃុំពាមមានជ័យ ស្រុកពាមរក៍ ខេត្តព្រៃវែងជាង២០០គ្រួសារ កំពុងមានការព្រួយបារម្ភយ៉ាងខ្លាំង និងបានស្នើសុំឲ្យអាជ្ញាធរ និងមន្ត្រីជំនាញជួយអន្តរាគមន៍រឿងក្រុមសាឡង់បូមខ្សាច់ជាច្រើនគ្រឿងដែលបូមខ្សាច់គៀកច្រាំងទន្លេ ខាងក្រោយផ្ទះរបស់ពួកគាត់ បណ្ដាលឲ្យបាក់ច្រាំងប៉ះពាល់ចម្ការដំណាំ និងផ្ទះសម្បែងរបស់ពួកគាត់ ។
ពលរដ្ឋទាំងអស់នោះបានលើកឡើងថា ដីច្រាំងទន្លេខាងក្រោយផ្ទះរបស់ពួកគាត់ បានចាប់បាក់ច្រើនខែមកហើយ ចាប់តាំងពីមានវត្តមានក្រុមសាឡង់បូមខ្សាច់ ចូលមកបូមនៅក្រោយផ្ទះគាត់ ដោយចាប់ផ្ដើមបាក់បន្តិចម្ដងៗជារឿយៗ រហូតមកដល់ពេលនេះ គឺបាក់ស្រុតខ្លាំង ដំណាំពួកគាត់មាន ចេក ស្វាយ ខ្នុរ ដូង រាប់សិបដើមបាក់រលំចូលទឹកអស់ហើយ អ្នកខ្លះដីបាក់ជិតដល់ផ្ទះតែម្តង ទើបពួកគាត់ទ្រាំលែងបាន លើកគ្នាស្នើសុំឲ្យមមុនន្ត្រីជំនាញ និងអាជ្ញាធរជួយអន្តរាគមន៍ទប់ស្កាត់ផង។
ពលរដ្ឋទាំងនោះបញ្ជាក់ទៀតថា ការបាក់ដីច្រាំងទន្លេនេះ មូលហេតុគឺដោយសារតែមានសាឡង់ធំៗចូលមកបូមខ្សាច់នៅកៀកច្រាំងពេក ហើយសាឡង់ខ្លះលួចបូមទាំងយប់ថែមទៀត ហើយពេលប្រជាពលរដ្ឋនាំគ្នាដេញ ក្រុមសាឡង់ទាំងនោះក៏បើកចេញទៅកណ្ដាលទន្លេវិញ ពេលអ្នកស្រុកចូលដេកអស់ គេនាំគ្នាចូលមកបូមកៀកច្រាំងដដែល ចំណែកអាជ្ញាធរឃុំស្រុកវិញ ពលរដ្ឋធ្លាប់បានរាយការណ៍ និងប្ដឹងទៅច្រើនដងហើយ តែគ្មានចំណាត់ការដោះស្រាយសោះ ។
ពួកគាត់បញ្ជាក់ថា ពួកគាត់មិនហាមឃាត់គេមិនឱ្យបូមខ្សាច់ទេ តែសូមបូមឲ្យឆ្ងាយពីច្រាំង កុំបូមគៀកច្រាំងទៀត ពេលនេះបាក់ដីប៉ះពាល់តែដំណាំ ចុះបើបាក់ពេលយប់ដោយទាំងផ្ទះនិងមនុស្សចូលក្នុងទន្លេ តើនរណាជាអ្នកទទួលខុសត្រូវ ពួកគាត់ព្រួយបារម្ភ និងភ័យខ្លាចខ្លាំងណាស់។
ជុំវិញរឿងរ៉ាវនេះ លោក ជូ ស៊ីផាត មេឃុំពាមមានជ័យបានឲ្យដឹងថា ករណីបាក់ច្រាំងទន្លេប៉ះពាល់ដល់ដំណាំនិងផ្ទះសម្បែងប្រជាពលរដ្ឋនេះ លោកបានចុះទៅពិនិត្យមើល និងរាយការណ៍ជូនទៅអាជ្ញាធរស្រុករួចហើយ ហើយរូបលោកក៏ទទួលស្គាល់ថា ពិតជាមានក្រុមសាឡង់លួចបូមកៀកច្រាំង និងលួចបូមពេលយប់ពិតមែន ប៉ុន្តែករណីនេះខាងអាជ្ញាធរឃុំ ពុំមានលទ្ធភាពទប់ ស្កាត់ទេ។
ចំណែកលោក កែវ ពិសី អភិបាលស្រុកពាមរក៍បានឲ្យដឹងនូវរសៀលថ្ងៃទី៣០ សីហា នេះថា លោកមិនទាន់បានដឹងព័ត៌មាននេះទេ ដោយសារអាជ្ញាធរឃុំមិនទាន់បានរាយការណ៍ ប៉ុន្តែលោកនឹងចាត់ឲ្យមន្ត្រីជំនាញរ៉ែ ចុះទៅពិនិត្យមើល។
ដោយឡែក មន្ត្រីជំនាញនៃមន្ទីររ៉ែ និងថាមពលខេត្តព្រៃវែងបានឲ្យដឹងថា ករណីបាក់ច្រាំងនេះខាងមន្ទីរ៉ែ មិនទាន់បានទទួលព័ត៌មានទេ ប៉ុន្តែនឹងចុះទៅពិនិត្យមើល សិក្សាឲ្យដឹងច្បាស់ពីមូលហេតុ តើបាក់ច្រាំងដោយសារមូលហេតុអ្វីបើសិនជារកឃើញថា បណ្ដាលមកពីការបូមខ្សាច់នោះមន្ទីរជំនាញរ៉ែ និងរាយការណ៍ជូនទៅក្រសួងរ៉ែដើម្បីសុំវិធានការ ពីព្រោះក្រុមហ៊ុនបូមខ្សាច់នៅទីតាំងនោះ គឺមានអាជ្ញាប័ណ្ណពីក្រសួង ចំពោះករណីមានក្រុមសាឡង់លួចបូមខ្សាច់កៀកច្រាំងពិសេសលួចបូមពេលយប់ខុសច្បាប់ មន្ត្រីជំនាញរ៉ែនិងចុះតាមដាន បើរកឃើញនឹងចាត់វិធានការទៅតាមផ្លូវច្បាប់ ។ ដោយ៖ ចក្រី
ចែករំលែកព័តមាននេះ