ទំនាក់ទំនងរុស្ស៊ី និងបារាំង ដុ.នដាបកាន់តែខ្លាំង ក្រោយការចា.ប់ខ្លួនមេធំ Telegram
ប្រទេសរុស្ស៊ី ៖ លោក ស៊ើជី ឡារ៉ូ (Sergei Lavrov) រដ្ឋមន្ត្រីក្រសួងការបរទេសរុស្ស៊ី កាលពីថ្ងៃទី២៧ ខែសីហា…
ប្រទេសរុស្ស៊ី ៖ លោក ស៊ើជី ឡារ៉ូ (Sergei Lavrov) រដ្ឋមន្ត្រីក្រសួងការបរទេសរុស្ស៊ី កាលពីថ្ងៃទី២៧ ខែសីហា ឆ្នាំ២០២៤ ប្រកាសថា ទំនាក់ទំនងរវាងប្រទេសរុស្ស៊ី និងប្រទេសបារាំង បានឈានដល់ចំណុចទាបបំផុត បន្ទាប់ពីការចាប់ខ្លួនលោក ប៉ាវែល ឌូរ៉ូវ (Pavel Durov) សហស្ថាបនិក និងជានាយកប្រតិបត្តិរបស់ក្រុមហ៊ុនតេឡេក្រាម Telegram ដែលមានដើមកំណើតរុស្ស៊ី កាលពីថ្ងៃសៅរ៍សប្តាហ៍មុន។
ប្រភពពីទីភ្នាក់ងារសារព័ត៌មាន Reuters បានរាយការណ៍ថា ព្រះរាជអាជ្ញាបារាំង កាលពីថ្ងៃចន្ទដើមសប្តាហ៍នេះ បានប្រកាសថា លោក ប៉ាវែល ឌូរ៉ូវ ដើមកំណើតរុស្ស៊ី ដែលមានសញ្ជាតិបារាំង និងអារ៉ាបរួម ត្រូវបានចាប់ខ្លួននៅឯអាកាសយានដ្ឋាន ឡឺ ប៊ូហ្គេត (Le Bourget) ភាគខាងជើងទីក្រុងប៉ារីស ដែលជាផ្នែកមួយនៃការស៊ើបអង្កេតលើឧក្រិដ្ឋកម្មទាក់ទងនឹងរូបភាពនៃការរំលោភបំពានផ្លូវភេទលើកុមារ ការជួញដូរគ្រឿងញៀន និងការក្លែងបន្លំលើកម្មវិធីផ្ញើសារ Telegram ។
លោក ស៊ើជី ឡារ៉ូ រដ្ឋមន្ត្រីការបរទេសរុស្ស៊ី កាលពីថ្ងៃទី២៧ សីហា កន្លងទៅ បានថ្លែងថា ការចាប់ខ្លួនលោក ឌូរ៉ូវ បានធ្វើឱ្យទំនាក់ទំនងរវាងទីក្រុងម៉ូស្គូ និងទីក្រុងប៉ារីសធ្លាក់ចុះដល់កម្រិតទាបបំផុត បន្ថែមពីលើទំនាក់ទំនងកាន់តែយ៉ាប់យ៉ឺនរវាងប្រទេសទាំងពីររយៈពេលជាច្រើនខែ បូករួមទាំងបញ្ហាមើលមុខគ្នាមិនចំកាលពីពេលថ្មីៗនេះ ដែលបានកើតឡើងនៅព្រឹត្តិការណ៍កីឡាអូឡាំពិករដូវក្តៅទីក្រុងប៉ារីសឆ្នាំ ២០២៤។
លោក ឌីមីទ្រី ប៉េស្កូវ (Dmitry Peskov) អ្នកនាំពាក្យវិមានក្រឹមឡាំង បានប្រាប់អ្នកយកព័ត៌មាននៅក្នុងសន្និសីទមួយកាលពីថ្ងៃទី២៧ សីហា កន្លងទៅ ថា ប្រទេសរុស្ស៊ីបានត្រៀមខ្លួនជាស្រេចក្នុងការផ្តល់ជំនួយចាំបាច់ទាំងអស់សម្រាប់លោក ប៉ាវែល ឌូរ៉ូវ ប៉ុន្តែថាសញ្ជាតិបារាំងរបស់គាត់ធ្វើឱ្យស្ថានភាពស្មុគស្មាញខ្លាំង។
ការចាប់ខ្លួន លោក ប៉ាវែល ឌូរ៉ូវ បានជំរុញឱ្យមានការជជែកវែកញែកអំពីដែនកំណត់នៃការបញ្ចេញមតិដោយសេរីតាមអ៊ីនធឺណិត ដោយលោក Elon Musk ម្ចាស់ក្រុមហ៊ុនបណ្តាញទំនាក់ទំនងសង្គម X អតីត Twitter បានលើកឡើងថា សិទ្ធិក្នុងការបញ្ចេញមតិនៅអឺរ៉ុបកំពុងត្រូវបានរឹតត្បិត។ ហើយវាក៏គូសបញ្ជាក់អំពីចលនារបស់រដ្ឋាភិបាលជុំវិញពិភពលោក ដើម្បីចាត់វិធានការតឹងរ៉ឹងជាងនេះ លើសកម្មភាពដែនប៉ូលិសខុសច្បាប់ ដែលរីកដុះដាលនៅលើបណ្តាញទំនាក់ទំនងមួយចំនួន។
ជាមួយនឹងអ្នកប្រើប្រាស់ជិត១ពាន់លាននាក់ជុំវិញពិភពលោក កម្មវិធីផ្ញើសារ Telegram មានឥទ្ធិពលខ្លាំងជាពិសេសនៅក្នុងប្រទេសរុស្ស៊ី អ៊ុយក្រែន និងរដ្ឋអតីតសហភាពសូវៀត។ កម្មវិធីនេះបានបង្ហាញខ្លួនឯងថាជាជម្រកសម្រាប់ការបញ្ចេញមតិដោយសេរី ប៉ុន្តែក៏ត្រូវបានប្រើប្រាស់យ៉ាងទូលំទូលាយដោយក្រុមចលនាស្តាំនិយមជ្រុល និងចលនាឃុបឃិត ក៏ដូចជាក្រុមអ្នកប្រឆាំងនយោបាយផងដែរ។ កម្មវិធីនេះបានក្លាយជាវេទិកាមានសារៈសំខាន់ សម្រាប់ការទំនាក់ទំនងនៅសមរភូមិក្នុងសង្គ្រាមរុស្ស៊ី-អ៊ុយក្រែន ហើយត្រូវបានប្រើប្រាស់ដោយរដ្ឋាភិបាល និងទាហានទាំងពីរ ដើម្បីចែករំលែកព័ត៌មាន និងការឃោសនាទាក់ទងនឹងសង្គ្រាម។
លោក ប៉ាវែល ឌូរ៉ូវ និងលោក នីកូឡៃ ឌូរ៉ូវ (Nikolai Durov) ដែលជាបងប្រុសបានបង្កើតកម្មវិធី Telegram នៅក្នុងឆ្នាំ ២០១៣ ហើយបានចាកចេញពីប្រទេសរុស្ស៊ីក្នុងឆ្នាំ ២០១៤ បន្ទាប់ពីបដិសេធមិនធ្វើតាមការទាមទាររបស់រដ្ឋាភិបាលទីក្រុងមូស្គូ ដើម្បីបិទសហគមន៍ប្រឆាំងលើវេទិកាប្រព័ន្ធផ្សព្វផ្សាយសង្គម VKontakte ដែលអ្នកទាំងពីរបានបង្កើតឡើង ហើយក្រោយមកបានលក់សិទ្ធិគ្រប់គ្រង។
បន្ទាប់ពីចាកចេញពីប្រទេសរុស្ស៊ី លោក ប៉ាវែល បានបញ្ជាក់ថា គាត់គ្មានបំណងវិលត្រឡប់ទៅវិញទេ។ ដ្បិតបច្ចុប្បន្នបុរសវ័យ៣៩ឆ្នាំរូបនេះ កំពុងរស់នៅក្នុងទីក្រុងឌូបៃ ប្រទេសអារ៉ាប់រួម ដែលក្រុមហ៊ុន Telegram មានមូលដ្ឋាននៅទីនោះ៕ (ប្រភព ៖ Reuters)
ចែករំលែកព័តមាននេះ