លោក ឃួង ស្រេង ៖ បច្ចុប្បន្ននៅភ្នំពេញមិនមានសំរាមកកស្ទះតាមដងផ្លូវដូចមុនឡើយ
រាជធានីភ្នំពេញ ៖ លោក ឃួង ស្រេង អភិបាល នៃគណៈអភិបាលរាជធានីភ្នំពេញ និងឯកឧត្ដមបណ្ឌិត អ៊ាង សុផល្លែត…
រាជធានីភ្នំពេញ ៖ លោក ឃួង ស្រេង អភិបាល នៃគណៈអភិបាលរាជធានីភ្នំពេញ និងឯកឧត្ដមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន ព្រមទាំងទីភ្នាក់ងារសហប្រតិបត្តិការអន្តរជាតិកូរ៉ (KOICA) នាព្រឹកថ្ងៃទី២១ ខែសីហា ឆ្នាំ២០២៤នេះ អញ្ជើញជាអធិបតីភាពក្នុងទិវាសម្អាតពិភពលោកនៅកម្ពុជា ក្រោមប្រធានបទ “កម្ពុជាស្អាត ខ្មែរធ្វើបាន” ។
លោក ឃួង ស្រេង បានមានប្រសាសន៍លើកឡើងថា បរិមាណសំរាម កាកសំណល់រឹង នៅរាជធានីភ្នំពេញ បានកើតទឿងជាលំដាប់ ដោយប្រៀបធៀប ឆ្នាំ២០០៩ និងបច្ចុប្បន្ននេះ បានកើនឡើងរហូត៣ដង ពោលគឺនៅក្នុងឆ្នាំ២០០៩ បរិមាណសំរាមមានប្រមាណជាង១,០០០តោន ក្នុងមួយថ្ងែ តែនៅក្នុងឆ្នាំ២០២៤នេះ បរិមាណសំរាមមានប្រមាណ ៣,៥០០តោន ក្នុងមួយថ្ងៃ នេះក៏ដោយសារកំណើនប្រជាពលរដ្ឋចូលមករាជធានីភ្នំពេញ ជាមួយនឹងកំណើនសេដ្ឋកិច្ច ផងដែរ ។
លោកអភិបាលរាជធានី បានបន្តទៀតថា ការទុកដាក់ដឹកជញ្ជូនសំរាមនៅរាជធានីភ្នំពេញ កាលពីមុនមិនល្អប្រសើរនោះទេ តែពេលនេះពោលគឺក្រោយពីមានក្រុមហ៊ុនដឹកជញ្ជូនប្រមូលសំរាម ៣ប្រកួតប្រជែងគ្នា ឃើញថា នៅរាជធានីភ្នំពេញ មានភាពល្អប្រសើរ មិនមានសំរាម កកស្ទះនៅតាមដងផ្លូវដូចមុនទេ ដែលធ្វើអោយរាជធានីភ្នំពេញ មានបរិស្ថានកាន់តែល្អ ប៉ុន្តែទោះបីជាយ៉ាងណាក្តី ការសម្អាត ការប្រមូលសំរាម នៅរាជធានីភ្នំពេញ ក៏នៅមានបញ្ហាប្រឈមដែរ ដោយសារចំណេះដឹងប្រជាពលរដ្ឋ លើការទុកដាក់សំរាមនេះ នៅមានកំរិត ជាមួយនឹងការបញ្ចេញសំរាម មិនត្រឹមត្រូវតាមម៉ោងពេល ជាដើម ។
លោក ឃួង ស្រេង បានបន្តទៀតថា ដើម្បីអោយអនាម័យល្អ បរិស្ថានស្អាតទាមទារអោយយើងមានការចូលរួមទាំងអស់គ្នា ស្របតាមប្រធានបទ “កម្ពុជាស្អាត ខ្មែរធ្វើបាន” ។
ក្នុងឱកាសនោះឯកឧត្ដមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានមានប្រសាសន៍លើកឡើងថា ៖ “កម្ពុជាស្អាត ខ្មែរធ្វើបាន” នេះជាកម្មវិធីសម្អាតពិភពដែនដី ការសម្អាតភពផែនដី ដូចយើងសម្អាតផ្ទះយើងអ៊ីចឹងដែរ។ បរិស្ថានជាជីវិតរបស់យើង បរិស្ថានមិនល្អ ខ្យល់អាកាសមិនល្អ វានឹងធ្វើអោយជីវិតយើងមិនល្អ ទៅតាមហ្នឹងដែរ ។
ឯកឧត្ដមបណ្ឌិត អ៊ាង សុផល្លែត បានបញ្ជាក់ផងដែរថា សុខភាពបរិស្ថានមាន ៣ គឺ៖ ទី១ បរិស្ថានលើមេឃ ទី២ បរិស្ថានលើដី និងទី៣ បរិស្ថានក្នុងទឹក។ ក្រសួងបរិស្ថាន បាននិងកំពុងទប់ស្កាត់ជាតិពុល នៅក្នុងបរិស្ថានទាំង៣នេះ។ ចំពោះទី១ បរិស្ថានលើមេឃ គឺខ្យល់នៅកម្ពុជាមិនមានជាតិពុលទេ តាមរយៈការវាស់វែងជាប្រចាំថ្ងៃរបស់ក្រសួងបរិស្ថាន។ ទី២ បរិស្ថានលើដី យើងបានផ្សព្វផ្សាយពីផលប៉ះពាល់ដល់បរិស្ថាន ជាមួយនឹងការប្តេជ្ញាចិត្ត ធ្វើអោយបរិស្ថានល្អប្រសើរឡើង ដូចជាការលុបបំបាត់ការប្រើប្រាស់ថង់ប្លាស្ទិក យើងមានអ្នកបេ្តជ្ញាចិត្ត ដោយមានអ្នកចូលរួមលុបបំបាត់ប្រមាណជាង ៩លាន ៥សែននាក់។ ឯកឧត្ដមបណ្ឌិត អ៊ាង សុផល្លែត បានសម្តែង នូវការជឿជាក់ថា នៅឆ្នាំ២០២៥ នឹងគ្មានថង់ប្លាស្ទិក ហោះតាមផ្លូវទៀតទេ។ ទី៣ បរិស្ថានក្នុងទឹក ក្រសួងបរិស្ថាន បាននិងកំពុងយកចិត្តទុកដាក់ ដោយដាក់ឧបករណ៍តាមដានពីគុណភាពទឹក ធ្វើអោយយ៉ាងណាអោយប្រភពទឹកមានបរិស្ថានល្អ។ ជុំវិញបញ្ហានេះដែរ កន្លងមកនេះ ឯកឧត្ដមបានណែនាំអោយមន្ត្រីរបស់ក្រសួង ពិសេសនាយកដ្ឋានគ្រប់គ្រងធនធានទឹក ចុះពិនិត្យតាមដានការបង្ហូរទឹកកខ្វក់ ចូលប្រភពទឹក នៅខេត្តបាត់តំបង និងនៅខេត្តព្រះសីហនុ តែមន្ត្រីទាំងនោះ ហាក់មិនបានយកចិត្តទុកដាក់លើការងារនេះឡើយ។ បើនៅតែមិនព្រមចាត់វិធានការលើការងារនេះទេ មន្ត្រីទាំងនោះ នឹងប្រឈមមុខទៅនឹងការដកតំណែងហើយ ។
ឯកឧត្ដមបណ្ឌិត អ៊ាង សុផល្លែត បានសូមអោយមានការចូលរួមធ្វើអោយបរិស្ថានទាំង ៣ ខាងលើល្អ ស្អាតទាំងអស់គ្នា។ សុខភាពបរិស្ថានល្អ វានឹងនាំអោយសុខភាពមនុស្ស សត្វនៅលើលោកនេក៏ល្អដូចគ្នាដែរ ៕
ចែករំលែកព័តមាននេះ