ខេត្តស្ទឹងត្រែង៖ ច្រកទ្វារអន្តរជាតិត្រពាំងគ្រៀលកម្ពុជា-ឡាវនាពេលបច្ចុប្បន្ន មានសភាពស្ងាត់ជ្រងំពុំសូវមានទំនិញហូរហៀរចេញចូលនោះឡើយ ចាប់តាំងពីវិបត្តិសេដ្ឋកិច្ចសាកល និងជំងឺកូវីដ១៩កើតឡើងរយៈកន្លងមក ប៉ុន្តែបែរកើតមានបទល្មើសលួចឆ្លងដែនញឹកញាប់ទៅវិញ ។ ព្រំដែនខេត្តស្ទឹងត្រែងដែលមានព្រំប្រទល់ជាប់នឹងប្រទេសឡាវ គឺមានច្រកទ្វារអន្តរជាតិមួយ ច្រករបៀងមួយចំនួនទៀត…
ខេត្តស្ទឹងត្រែង៖ ច្រកទ្វារអន្តរជាតិត្រពាំងគ្រៀលកម្ពុជា-ឡាវនាពេលបច្ចុប្បន្ន មានសភាពស្ងាត់ជ្រងំពុំសូវមានទំនិញហូរហៀរចេញចូលនោះឡើយ ចាប់តាំងពីវិបត្តិសេដ្ឋកិច្ចសាកល និងជំងឺកូវីដ១៩កើតឡើងរយៈកន្លងមក ប៉ុន្តែបែរកើតមានបទល្មើសលួចឆ្លងដែនញឹកញាប់ទៅវិញ ។
ព្រំដែនខេត្តស្ទឹងត្រែងដែលមានព្រំប្រទល់ជាប់នឹងប្រទេសឡាវ គឺមានច្រកទ្វារអន្តរជាតិមួយ ច្រករបៀងមួយចំនួនទៀត ក្រៅពីនោះក៏មានផ្លូវទឹកផងដែរ ។ ទាក់ទិនករណីបទល្មើសតាមព្រំដែនជាក់ស្ដែង នាពេលកន្លងមក គឺមានករណីក្រុមឧក្រិដ្ឋជនលួចជួញដូរគ្រឿងញៀនឆ្លងដែនទាំងផ្លូវគោក និងផ្លូវទឹកម្តងៗរាប់រយគីឡូក្រាម និងករណីជួញដូរជនជាតិចិនលួចឆ្លងដែនខុសច្បាប់ជាញឹកញាប់ ។
ប្រភពព័ត៌មានបង្ហើបថា នាពេលកន្លងមកក៏មានករណីលួចឆ្លងដែនយករថយន្តស៊េរីទំនើបៗចូលទៅប្រទេសឡាវ តាមច្រករបៀងចន្លោះបង្គោល036និង037ប្រគៀប ស្រែចំប៉ាផងដែរទៅបាត់ដោយរលូន ប្រៀបដូចត្រូវរ៉ូវគ្នាជាមួយច្រកព្រំដែន ។ រយៈពេលខ្លីក្នុងខែសីហា ២០២៤ នេះ កើតមានករណីជនជាតិចិនលួចឆ្លងដែនខុសច្បាប់ចំនួន២លើក ។
ជាក់ស្តែង កាលពីយប់ថ្ងៃទី១០ សីហា ២០២៤ ជនជាតិចិន១៧នាក់ (ស្រីម្នាក់) ត្រូវបានកម្លាំងកងរាជអាវុធហត្ថឃាត់ និងប្រគល់ទៅអោយផែននគរបាលអន្តោប្រវេសន៍ខេត្តស្ទឹងត្រែង បន្តនីតិវិធីរហូតដល់ថ្ងៃទី១៧ ខែសីហា ២០២៤ ជនជាតិចិនចំនួន១៥នាក់ ត្រូវបានបំពេញនីតិវិធីបញ្ជូនទៅស្នាក់ការត្រៀមបណ្តេញចេញនៅខេត្តសៀមរាប និងជនជាតិចិនចំនួន២នាក់ទៀត តុលាការសម្រេចឃុំខ្លួនក្នុងពន្ធនាគារកាំងមេម៉ាយសង្កាត់ស្ទឹងត្រែង ក្រុងស្ទឹងត្រែង ពាក់ព័ន្ធករណីបទល្មើសលួចឆ្លងដែនខុសច្បាប់ គ្មានលិខិតឆ្លងដែន ។
ពាក់ព័ន្ធករណីខាងលើជនជាតិចិនចំនួន១៥នាក់ មិនទាន់ត្រូវបានអគ្គនាយកដ្ឋានអន្តោប្រវេសន៍ នាយកដ្ឋានស៊ើបអង្កេត និងអនុវត្តនីតិវិធីពុំទាន់បានធ្វើការបណ្ដេញចេញពីកម្ពុជាផុតផង ស្រាប់តែនៅយប់ថ្ងៃទី១៦ សីហា ២០២៤ កម្លាំងកងរាជអាវុធហត្ថខេត្តឃាត់ជនជាតិចិនចំនួន២៩នាក់និងស្រីម្នាក់ផ្សេងទៀត។ រហូតបច្ចុប្បន្ននេះ សមត្ថកិច្ចនគរបាលកំពុងបន្តនីតិវិធីតែចំពោះចំណាត់ការលើជនជាតិចិនទាំង២៩នាក់នោះយ៉ាងណានៅមិនទាន់ដឹងនៅឡើយទេ ។
លោក ភិវ ស៊ីនួន ស្នងការរងទទួលផែនសេនាធិការ និងជាអ្នកនាំពាក្យស្នងការដ្ឋាននគរបាលខេត្តស្ទឹងត្រែងបានឆ្លើយតបតាមសារអេឡិចត្រូនិចប្រព័ន្ធតេឡេក្រាមថា ស្ថានភាពព្រំដែនស្មុគស្មាញប្រវែង២៥៧គីឡូម៉ែត្រ. ភូមិសាស្ត្រសំបូរកោះច្រើនកម្លាំងមានតិច. ពួកល្មើសច្រើនធ្វើសកម្មភាពនៅពេលនគរបាលសម្រាកអ្នកខេត្តគួរដឹងហើយ ខេត្តយើងកើតបទល្មើសតិចជាងគេ សូមអរគុណ ។
លោក ហ៊ុយ ធីតា ប្រធានវរៈការពារព្រំដែន៧០១ លោកបានត្អូញត្អែរអំពីលទ្ធភាព និងអំណាចការងាររបស់លោកដោយសារគេវាស់ដីអោយដើរ ។ លោក សរ សុពុត្រា អភិបាលនៃគណៈអភិបាលខេត្ត និងជាប្រធានគណៈបញ្ជាការឯកភាព រដ្ឋបាលខេត្តស្ទឹងត្រែងបានថ្លែងថា កាលពីថ្ងៃទី១៧ សីហា កន្លងទៅ លោកបានបើកកិច្ចប្រជុំ ដើម្បីពង្រឹងបន្ថែមលើបញ្ហាសន្តិសុខសង្គមដូចជា ការរត់ពន្ធមនុស្សឆ្លងដែន និងការជួញដូរគ្រឿងញៀនសកម្មភាពភេរវកម្ម ឧក្រិដ្ឋកម្ម ចលាចលសង្គមនល្បែងស៊ីសងគ្រប់ប្រភេទ និងក្មេងទំនើងផងដែរដោយផ្អែកលើបញ្ហាទាំងនេះ អង្គភាពជំនាញត្រូវយកចិត្តទុកដាក់អនុវត្តឲ្យបានម៉ឺងម៉ាត់បំផុត និងការគ្រប់គ្រងសភាពការណ៍ទូរទៅឱ្យបានជុំទាន់ពេលវេលា ដើម្បីធានាស្ថិរភាពសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម៕
ចែករំលែកព័តមាននេះ