រាជធានីភ្នំពេញ ៖ នៅទីបំផុត កម្លាំងអាជ្ញាធរ និងសមត្ថកិច្ចខណ្ឌពោធិ៍សែនជ័យ បានចុះទៅធ្វើការរុះរើសំណង់ផ្ទះមួយកន្លែងដែលសង់រំលោភលើចំណីផ្លូវជាតិលេខ៣ ស្ថិតនៅក្នុងភូមិព្រៃព្រីងខាត្បូង២ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញរួចហើយ…
រាជធានីភ្នំពេញ ៖ នៅទីបំផុត កម្លាំងអាជ្ញាធរ និងសមត្ថកិច្ចខណ្ឌពោធិ៍សែនជ័យ បានចុះទៅធ្វើការរុះរើសំណង់ផ្ទះមួយកន្លែងដែលសង់រំលោភលើចំណីផ្លូវជាតិលេខ៣ ស្ថិតនៅក្នុងភូមិព្រៃព្រីងខាត្បូង២ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញរួចហើយ កាលពីវេលារសៀលថ្ងៃទី១៩ ខែកក្កដា ឆ្នាំ២០២៤ ។
បើតាមមន្ត្រីសាលាខណ្ឌពោធិ៍សែនជ័យបានប្រាប់ឲ្យដឹងថា សំណង់ខាងលើនោះ សង់ពីដែក ដែលមានម្ចាស់ឈ្មោះហ៊ុល ភា ហើយតាមការវាស់វែងកាលពីថ្ងៃទី១៩ ខែកក្កដា ម្សិលមិញ ឃើញថា គាត់បានសង់រំលោភដីចំណីផ្លូវជាតិលេខ៣ប្រវែង៥,៥០ម៉ែត្រ ។
កាលពីគាត់ចាប់ផ្ដើមសាងសង់ដំបូងអាជ្ញាធរបានចុះទៅធ្វើការហាមឃាត់ជាបន្តបន្ទាប់ ប៉ុន្តែគាត់មិនស្ដាប់ លុះក្រោយមកប្រជាពលរដ្ឋមួយចំនួនរស់នៅក្នុងភូមិខាងលើតាមបណ្ដោយផ្លូវជាតិលេខ៣នោះដែរ ហើយដែលពួកគាត់ជាអ្នកគោរពច្បាប់ បានប្ដឹងសុំឲ្យអាជ្ញាធរជួយហាមឃាត់ជ
បន្ទាន់ ។
មន្ត្រីសាលាខណ្ឌដដែលបានប្រាប់ឲ្យដឹងបន្តទៀតថា ប្រជាពលរដ្ឋទាំងនោះបានលើកឡើងដោយត្រង់ៗថា បើអាជ្ញាធរមិនព្រមហាមឃាត់ឬរុះរើសំណង់ដែលកំពុងសាងសង់នេះចេញទេ ពួកគាត់ក៏មានសិទ្ធិសាងសង់សំណង់ផ្សេងៗនៅលើចំណីផ្លូវជាតិលេខ៣នេះបានដូចគ្នាដែរ ។
ក្រោយទទួលបានបណ្ដឹងពីប្រជាពលរដ្ឋផង និងដើម្បីការពារដីចំណីផ្លូវ ដើម្បីការរៀបចំសោភ័ណភាពដងផ្លូវ មិនឲ្យមានភាពអនាធិបតេយ្យកើតឡើងនោះ ទើបនៅថ្ងៃទី១៩ ខែកក្កដា លោកសក់ កាញ្ញារិទ្ធ អភិបាលខណ្ឌពោធិ៍សែនជ័យ បានចាត់លោកនាយករដ្ឋបាលសាលាខណ្ឌពោធិ៍សែនជ័យ ដឹកនាំកម្លាំងចុះហាមឃាត់និងឲ្យម្ចាស់រុះរើចេញជាបន្ទាន់ ។
មន្ត្រីខាងលើបានប្រាប់បន្ថែមទៀតថា ពេលទៅដល់កម្លាំងបានធ្វើការវាស់វែងឃើញថា សំណង់ផ្ទះខាងលើនោះសង់រំលោភលើចំណីផ្លូវប្រវែង៥,៥០ម៉ែត្រ ទើបកម្លាំងប្រាប់ឲ្យជាងផ្អាកការសាងសង់សិន និងសុំជួបម្ចាស់ផ្ទះដើម្បីណែនាំពីច្បសប់សាងសង់ និងឲ្យគាត់រុះរើចេញវិញ ។
ពេលនោះស្រាប់តែម្ចាស់ផ្ទះមានគ្នាច្រើនចេញមកស្រែកឡូឡាជេរអាជ្ញាធរ និងបញ្ចេញកាយវិការច្រងេងច្រងាងរយៈពេល១ម៉ោង ចំណែកកម្លាំងបានត្រឹមតែឈរស្ដាប់ពួកគាត់ជេរ ដោយមិនបានតបតវិញនោះឡើយ ។ បន្ទាប់មកកម្លាំងបានធ្វើការពន្យល់ពីច្បាប់សាងសង់ឲ្យគាត់យល់ និងបានឲ្យគាត់ធ្វើកិច្ចសន្យាដើម្បីបញ្ឈប់ការសាងសង់នោះ ព្រមទាំងរុះរើសំណង់នោះចេញវិញនៅថ្ងៃទី២០ ខែកក្កដា ។
មន្ត្រីសាលាខណ្ឌរូបនោះបានថ្លែងថា ខណៈនោះគាត់យល់ព្រមផ្ដិតមេដៃលើកកិច្ចសន្យាបញ្ឈប់ការសាងសង់ ប៉ុន្តែមិនយល់ព្រមផ្ដិតមេដៃលើកិច្ចសន្យារុះរើនោះឡើយ មិនតែប៉ុណ្ណោះបានគំរាមថា បើអាជ្ញាធរហ៊ានតែធ្វើការរុះរើផ្ទះគាត់នេះ គាត់និងយកដុំថ្មគប់ទៅលើជាងដែលមកធ្វើការរុះនោះហើយ ។ បន្ទាប់ពីមានការគំរាមបែបនេះ កម្លាំងក៏បានដកថយសិន ហើយរហូតដល់ថ្ងៃកំណត់ខាងលើនេះ គាត់នៅតែមិនព្រមរុះចេញ ទើបលោកអភិបាលខណ្ឌដាក់កម្លាំងចុះទៅធ្វើការរុះរើ ហើយបានសម្រេចដោយពុំមានការប៉ះទង្គិចគ្នាជាមួយម្ចាស់ផ្ទះនោះឡើយ ។
លោកសក់ កាញ្ញារិទ្ធ អភិបាលខណ្ឌពោធិ៍សែនជ័យបានថ្លែងថា វិធានការរបស់អាជ្ញាធរគឺត្រូវតែរក្សាចំណីផ្លូវជាតិនិងផ្លូវសាធារណៈនានាឲ្យបាន មិនឲ្យមានសំណង់កើតឡើងថ្មីបន្តទៀតនោះទេ ។ ចំណែកឯសំណង់ចាស់ដែលបានសាងសង់រួចក្នុងពេលកន្លងមក និងមានវិធានការនៅក្រោយ ខណៈនេះត្រូវរក្សាចាស់មិនឲ្យបង្កើតថ្មី ដែលនាំឲ្យមានភាពស្មុគស្មាញបន្ថែមទៀតឡើយ ៕
ចែករំលែកព័តមាននេះ