ទីក្រុងបាងកក៖ សមត្ថកិច្ចថៃថ្លែងស្ត្រីឈ្មោះសឺរីនឆុង វ័យ៥៦ឆ្នាំ ជាជនជាតិអាមេរិកដើមកំណើតវៀតណាម និងដែលគេសង្ស័យថាជាអ្នកដាក់ថ្នាំពុលស្យានីតនៅក្នុងពែងតែ និងបំពង់ទឹកក្ដៅនោះ មានទំនាស់ប្ដឹងផ្ដល់គ្នាទៅតុលាការជាមួយនឹងជនរងគ្រោះទាំង៥នាក់ដែលស្លាប់នៅក្នុងបន្ទប់សណ្ឋាគារជាមួយគ្នា។ អ្នកទាំង៥ដាក់ពាក្យប្ដឹងទៅតុលាការប្រទេសជប៉ុន។
គេបានសម្ភាសក្រុមគ្រួសារជនរងគ្រោះ ហើយដឹងតម្រុយខ្លះៗថាអ្នកទាំង៦នោះមានទំនាស់ពាក់ព័ន្ធនឹងរឿងលុយកាក់។ បំណុលនេះផ្ដើមចេញពីការបបួលរកស៊ីចូលហ៊ុនគ្នាដើម្បីសាងសង់មន្ទីរពេទ្យនៅប្រទេសជប៉ុន។ ទំនងជាស្ត្រីឈ្មោះសឺរីនឆុងជាអ្នកបោះមេ ហើយជាអ្នកកាន់លុយ។ ឥឡូវនេះ សមត្ថកិច្ចថៃកំពុងស្រាវជ្រាវថយក្រោយឡើងវិញដើម្បីចង់ដឹងថាស្ត្រីជាជនសង្ស័យឈ្មោះសឺរីនឆុងអាចទទួលបានថ្នាំពុលដ៏សាហាវឈ្មោះស្យានីតនោះពីកន្លែងណា? និងដោយរបៀបណា?
ស្នងការរងនគរបាលទីក្រុងបាងកក ឧត្ដមសេនីយ៍ណុបផាស៊ីន ភូលសាវ៉ាត (Noppasin Poolsawat) ថ្លែងថា២នាក់ប្ដីប្រពន្ធជនជាតិវៀតណាមដែលស្លាប់នៅក្នុងចំណោមនោះដែរបានប្រគល់លុយដប់លានបាត ឬស្មើនឹង២៧ម៉ឺន ៨ពាន់ដុល្លារទៅឱ្យស្ត្រីឈ្មោះសឺរីនឆុងដើម្បីរកស៊ីចូលហ៊ុនគ្នា។ ប៉ុន្តែគម្រោងវិនិយោគនេះនៅតែជាគម្រោងខ្យល់ មិនព្រមចេញជារូបរាងពិតប្រាកដទាល់តែសោះ។ ក្រោយមក ២នាក់ប្ដីប្រពន្ធសង្ស័យថាប្រហែលជាស្ត្រីឈ្មោះសារីនឆុងបោកប្រាសពួកគេហើយ។
ពួកគេក៏សម្រេចចិត្តដាក់ពាក្យបណ្ដឹងទៅតុលាការ។ ទាំងដើមបណ្ដឹង និងស្ត្រីឈ្មោះសឺរីនឆុងត្រូវបង្ហាញខ្លួននៅតុលាការនារយៈពេល២សប្ដាហ៍ទៀត។ នៅអំឡុងពេលរង់ចាំឡើងតុលាការនោះ ស្ត្រីឈ្មោះសឺរីនឆុងក៏ណាត់ជួបគ្នាជាមួយ២នាក់ប្ដីប្រពន្ធនោះដើម្បីសម្រុះសម្រួលគ្នា។ ពីដំបូង, ពួកគេគ្រោងធ្វើដំណើរទៅសម្រុះសម្រួលគ្នានៅប្រទេសជប៉ុន។ ប៉ុន្តែក្រោយមកដោយសារមានបញ្ហារអាក់រអួលផ្នែកទិដ្ឋាការ ពួកគេក៏លុបចោលគម្រោងទៅជប៉ុន ហើយសម្រេចថាជួបគ្នានៅបាងកក។
សឺរីនឆុងទៅដល់បាងកកជាមួយបុរសឈ្មោះដាងហុងជាពលរដ្ឋអាមេរិកាំងដើមកំណើតវៀតណាម រួមជាមួយអ្នកតុបតែងមុខមកពីវៀតណាមម្នាក់ឈ្មោះចាន់ឌិញហ្វ៊ូ (Tran Dinh Phu)។ ចំណែក២នាក់ប្ដីប្រពន្ធដែលជាម្ចាស់បណ្ដឹង និងជាម្ចាស់លុយជាង២៧ម៉ឺនដុល្លារនោះមកជាមួយមិត្តភក្ដិម្នាក់។ ការសម្រុះសម្រួលគ្នាលើកដំបូងនេះមិនបានជោគជ័យទេ។ ដូច្នេះ អ្នកបីនាក់ខាងម្ចាស់បណ្ដឹងក៏សម្រេចថានឹងចាកចេញពីសណ្ឋាគារនៅថ្ងៃចន្ទ។ ហេតុនេះ សឺរីនឆុងក៏ហៅអ្នកទាំង៥នាក់ទៅជួបជុំគ្នានៅក្នុងបន្ទប់របស់ខ្លួនជាលើកចុងក្រោយមុននឹងបែកគ្នា។ នេះបើយោងតាមការផ្សាយរបស់កាសែតបាងកកប៉ុស្តិ៍។
សឺរីនឆុងបានកុម្ម៉ង់អាហារ និងទឹកតែសម្រាប់ញ៉ាំជុំគ្នា។ បុគ្គលិកសណ្ឋាគារប្រាប់ថានៅពេលខ្លួនលើកអាហារ និងទឹកតែចូលទៅក្នុងបន្ទប់នោះគឺមានតែសឺរីនឆុងម្នាក់ប៉ុណ្ណោះ។ បុគ្គលិកសណ្ឋាគារចង់នៅក្នុងបន្ទប់ដើម្បីរៀបចំអាហារ និងចាក់ទឹកតែជូនភ្ញៀវ។ ប៉ុន្តែសឺរីនឆុងដោយសារតែខ្លួនមានគម្រោងដាក់ថ្នាំពុលស្យានីតនៅក្នុងទឹកតែ និងបំពង់ទឹកក្ដៅ ខ្លួនក៏ប្រាប់ឱ្យបុគ្គលិកសណ្ឋាគារចេញទៅវិញបាត់ទៅ។ សឺរីនឆុងប្រាប់ថាខ្លួនចេះចាត់ចែងរៀបចំអាហារ និងទឹកតែដោយខ្លួនឯង។
ប្រធានផ្នែកកោសល្យវិច័យ លោកត្រៃរ៉ុង ភិផាន (Trirong Phiwpan) ប្រាប់ថានៅថ្ងៃកើតហេតុនោះ បុគ្គលិកសណ្ឋាគារយកតែមួយប៉ាន់, ទឹកដោះគោ និងទឹកក្ដៅ២បំពង់ចូលទៅក្នុងបន្ទប់។ សឺរីនឆុងបានយកថ្នាំពុលស្យានីតលាយជាមួយទឹកតែ។ ក្រុមអ្នកធ្វើកោសល្យវិច័យរកឃើញភស្តុតាងជាច្រើនដែលបន្សល់ទុកនៅកន្លែងកើតហេតុ។ ក្នុងនោះ មានកញ្ចប់តែដែលសង្ស័យថាអាចនឹងមានលាយថ្នាំពុលស្យានីតដ៏ច្រើនសន្ធឹកសន្ធាប់នៅក្នុងនោះ។
លោកត្រៃរ៉ុង ភិផាន (Trirong Phiwpan) ប្រធានផ្នែកកោសល្យវិច័យជាធម្មតា ស្លឹកតែមានពណ៌ត្នោតខ្ចីនៅពេលឆុងចូលទៅក្នុងទឹក។ ប៉ុន្តែជាក់ស្ដែង ស្លឹកតែនៅកន្លែងកើតហេតុបានប្រែពណ៌សឹងតែក្លាយទៅជាខ្មៅ។ អ្នកជំនាញយល់ថាមូលហេតុដែលតែប្រែជាពណ៌បែបនេះដោយសារសឺរីនឆុងលាយជាមួយថ្នាំពុលស្យានីតច្រើនហួសប្រមាណ។ លោកភីផានប្រាប់ថាថ្នាំពុលស្យានីតនៅពេលរលាយនៅក្នុងទឹក វាគ្មានរសជាតិ គ្មានក្លិន និងគ្មានពណ៌ទេ។ ដូច្នេះ មនុស្សយើងមិនអាចវិនិច្ឆ័យដឹងទាល់តែសោះដោយភ្នែកទទេថាមាន ឬគ្មានជាតិពុលនៅក្នុងទឹកដែលខ្លួនកំពុងផឹក។
លោកភីផានប្រាប់ថាថ្នាំពុលស្យានីតគ្រាន់តែផឹកចូលទៅក្នុងខ្លួនភ្លាមនឹងចាប់ផ្ដើមធ្វើទុក្ខខ្លាំងឈានដល់ការដាច់ខ្យល់ស្លាប់ត្រឹមតែរយៈពេលមិនដល់ប្រាំនាទីផង។ មូលហេតុដោយសារស្យានីតចូលទៅបំផ្លាញអុកស៊ីហ្សែននៅក្នុងខ្លួនរបស់ជនរងគ្រោះ។ ករណីនេះអាចក្លាយជាមេរៀនទុកសម្រាប់អ្នកជំនាន់ក្រោយ។ នៅក្នុងស្ថានភាពដែលកំពុងមានទំនាស់គ្នារឿងលុយកាក់រាប់សែនដុល្លាររហូតដល់ប្ដឹងផ្ដល់គ្នាឡើងតុលាការបែបនេះ សួរថាហេតុអ្វីបានជាភាគីម្ខាងទៀតមានសន្ដានចិត្តល្អម៉េ្លះរៀបចំពិធីជួបជុំញ៉ាំអាហារជាមួយគ្នា?
ចែករំលែកព័តមាននេះ