រាជធានីភ្នំពេញ ៖ ក្រុមអ្នករត់តាក់ស៊ី អ្នករត់ម៉ូតូកង់បី និងអ្នករត់ម៉ូតូឌុប ប្រមាណជាង១០០នាក់ តំណាងឲ្យ សមាគមកម្លាំងសាមគ្គីដើម្បីសន្តិភាព, សមាគមន៍អ្នកដឹកជញ្ជូនកម្មករ និងសមាគមកម្លាំងអាជីវករសេដ្ឋកិច្ចក្រៅប្រព័ន្ធនៃកម្ពុជា បានប្រមូលផ្ដុំគ្នា ជាក្រុមៗ និងជាវគ្គៗ កាលពីវេលាម៉ោងជាង៣នាទីរសៀលថ្ងៃទី១៦ ខែកក្កដា ឆ្នាំ២០២៤ នៅតាមផ្លូវជាតិលេខ៤ ត្រង់ចំណុចមុខវត្តជម្ពូវ័ន ស្ថិតនៅក្នុងភូមិជម្ពូវ័ន សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
ក្រុមតំណាងសមាគមន៍ខាងលើ បានកាន់បដា និងទង់ជាតិកម្ពុជាគ្រប់ដៃ បានស្រែកប្រកាសបដិសេធន៍ដាច់ខាត ចំពោះការញុះញង់របស់ក្រុមអគតិ ដែលបានគៀងគរពួកគាត់ឲ្យចូលរួមធ្វើបាតុកម្ម ប្រឆាំងរាជរដ្ឋាភិបាល និងប្រកាលគាំទ្រយ៉ាងពេញទំហឹង ចំពោះប្រសាសន៍របស់សម្ដេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា កាលពីរសៀលថ្ងៃទី១៣ ខែកក្កដា ឆ្នាំ២០២៤ ដែលសម្ដេច បានថ្លែងថារាជរដ្ឋាភិបាលកម្ពុជា មិនមានផែនការផ្ដល់អាជ្ញាប័ណ្ណ លើសេវាកម្មរថយន្តអគ្គិសនី ទៅឲ្យក្រុមហ៊ុនវៀតណាម ឬក្រុមហ៊ុនបរទេសនោះទេ ។
ពួកគាត់ បានប្រាប់ឲ្យដឹងថា ក្រុមជនអគតិបានបំភ្លៃ កាលពីពេលថ្មីៗ កន្លងមកនេះថា រាជរដ្ឋាភិបាល ដែលមានសម្ដេចធិបតី ហ៊ុន ម៉ាណែត ជាប្រមុខ បានបានអនុញ្ញាតឲ្យក្រុមហ៊ុនរថយន្តតាក់ស៊ីអគ្គិសនីរបស់ប្រទេសវៀតណាម មកវិនិយោគនៅកម្ពុជា ដែលព័ត៌មានបំភ្លៃខុសពីការពិតនេះ បានធ្វើឲ្យប៉ះពាល់ និងមានការយល់ច្រឡំយ៉ាងខ្លាំង ទៅលើរាជរដ្ឋាភិបាល ជាពិសេសសម្ដេចប្រមុខរាជរដ្ឋាភិបាល តែម្ដង ទាំងដែលសព្វថ្ងៃនេះ សម្ដេចកំពុងគិតគូយកចិត្តទុកដាក់យ៉ាងខ្លាំង ដល់ជីវភាពក្រុមអ្នករត់តាក់ស៊ី អ្នករត់ម៉ូតូកង់បី និងអ្នករត់ម៉ូតូឌុបខ្មែរនៅក្នុងប្រទេស ។
តំណាងសមាគមន៍ ទាំង៣ខាងលើ បានប្រាប់ឲ្យដឹងបន្តទៀតថា ដោយសារតែបែបនេះ ទើបពួកគាត់ ដែលជាអ្នករត់តាក់ស៊ី អ្នករត់ម៉ូតូកង់បី និងអ្នករត់ម៉ូតូឌុប ទាំង៣ សមាគមន៍ រួមមាន ៖ ទី១, សមាគមអ្នកដឹកជញ្ជូនកម្មករ ទី២, សមាគមកម្លាំងអាជីវករសេដ្ឋកិច្ចក្រៅប្រព័ន្ធនៃកម្ពុជា និងទី៣, សមាគមកម្លាំងសាមគ្គីដើម្បីសន្តិភាព បាននាំគ្នាប្រមូលផ្ដុំគ្នាជាក្រុមៗ និងជាវគ្គៗ ដើម្បីប្រកាសគាំទ្ររាជរដ្ឋាភិបាល ដែលមានសម្តេចមហាបវរធិបតី ហ៊ុន ម៉ាណែត ជាប្រមុខ ជាពិសេសទៀតនោះ គឺប្រកាសបដិសេធន៍យ៉ាងដាច់ខាត ចំពោះការញុះញង់របស់ក្រុមអគតិទាំងឡាយ ។
សូមជម្រាបជូនថា តំណាងសមាគមន៍ទាំង៣ខាងលើ ក៏បានកាន់បដា ដែលមានខ្លឹមសារថា ៖ យើងងខ្ញុំជាសមាជិក សមាជិការ ដែលប្រកបរបរផ្នែកសេដ្ឋកិច្ចក្រៅប្រព័ន្ធ រត់ម៉ូតូឌុប រត់រ៉ឺម៉កកង់បី និងរត់ឡានតាក់ស៊ី ៖
១-សូមបដិសេដដាច់ខាត ចំពោះការញុះញង់របស់ក្រុមអគតិដែលបានគៀងគរយើងខ្ញុំឱ្យចូលរួមធ្វើ បាតុកម្មប្រឆាំងរាជរដ្ឋាភិបាល ។
២-សូមគាំទ្រយ៉ាងពេញទំហឹងចំពោះប្រសាសន៍របស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះ រាជាណាចក្រកម្ពុជា កាលពីរសៀលថ្ងៃទី១៣ ខែកក្កដា ឆ្នាំ២០២៤ ដែលបានថ្លែងថា រាជរដ្ឋាភិបាលកម្ពុជា មិនមានផែនការផ្តល់អាជ្ញាប័ណ្ណលើសេវាកម្មរថយន្តអគ្គិសនីឱ្យទៅក្រុមហ៊ុនវៀតណាម ឬក្រមហ៊ុនបរទេស នោះទេ ។
៣-សូមថ្លែងអំណរគុណយ៉ាងជ្រាលជ្រៅជូនចំពោះ សម្តេចតេជោ និងសម្តេចធិបតី ដែលសម្តេច តែងតែ គិតគូរអំពីសុខទុក្ខ និងជីវភាពប្រចាំថ្ងៃរបស់យើងខ្ញុំទាំងអស់គ្នា ជាពិសេស នៅអំឡុងពេលនៃការរាតត្បាតជំងឺ កូវីដ-១៩ ។
៤-យើងខ្ញុំសូមប្តេជ្ញាបន្តបោះឆ្នោតជូនគណបក្សប្រជាជនកម្ពុជា គាំទ្របេក្ខភាពសម្តេចមហាបវរធិបតី នាយករដ្ឋមន្ត្រី នៃព្រះរាជាណាចក្រកម្ពុជា បន្តការដឹកនាំនាវាកម្ពុជាឱ្យមានសុខសន្តិភាព ។
៥-សូមគោរពជូនពរសម្តេចទាំងទ្វេរ និងក្រុមគ្រួសារមានសុខភាពល្អ ទទួលជោគជ័យជាប្រវត្តិសាស្ត្រ បន្ថែមទៀតជូនប្រជាជាតិ និងមាតុភូមិយើង ៕
ចែករំលែកព័តមាននេះ