ខេត្តពោធិ៍សាត់ ៖ ថាមពលពន្លឺព្រអាទិត្យ គឺជាថាមពលស្អាត និងជាថាមពលកកើតឡើងវិញ ។ ប្រទេសកម្ពុជា មានអំណោយផលថាមពលពន្លឺព្រះអាទិត្យយ៉ាងខ្លាំង ព្រះអាទិត្យចែងចាំងលើប្រទេសកម្ពុជា ជាមធ្យមប្រហែល៨ម៉ោង រៀងរាល់ថ្ងៃពេញមួយឆ្នាំ ។ «ថាមពលពន្លឺព្រះអាទិត្យ» សំដៅលើបរិមាណថាមពលព្រះអាទិត្យ ដែលចែងចាំងលើបរិវេណផ្ទៃដីមួយម៉ែត្រការ៉េ ។
បរិមាណថាមពលពន្លឺព្រះអាទិត្យដែលកម្ពុជាទទួលបានជារៀងរាល់ថ្ងៃ ស្ថិតក្នុងកម្រិតល្អបង្គួរស្មើនឹង៥គីឡូវ៉ាត់ម៉ោង /ម៉ែត្រការ៉េ និងអាចកើនដល់៥.៦គីឡូវ៉ាត់ម៉ោង/ម៉ែត្រការ៉េ នៅផ្នែកកណ្តាលនៃប្រទេស ។
រាជរដ្ឋាភិបាលកម្ពុជាកំពុងចាប់យកកាលានុវត្តភាពដ៏ប្រសើរនេះ សម្រាប់បំពេញតម្រូវការអគ្គិសនីដែលកំពុងតែកើនឡើង ដើម្បីមាគ៌ាមួយដែលសន្សំសំចៃសេដ្ឋកិច្ច នវានុវត្តន៍ និងចីរភាព ដោយបានជំរុញនិងអនុម័តគម្រោងវិនិយោគលើស្ថានីយដើរដោយពន្លឺព្រះអាទិត្យជាច្រើនកន្លែង ។
ចូលរួមផ្គត់ផ្គង់ទៅក្នុងបណ្តាញអគ្គិសនីជាតិដែលជាការប្តេជ្ញាចិត្តរបស់រាជរដ្ឋាភិបាលក្នុងការបង្កើនភាគរយនៃថាមពលករកើតឡើងវិញ និងថាមពលស្អាត ។ បង្កើនផលិតកម្មអគ្គិសនីពីថាមពលព្រះអាទិត្យ និងចូលរួមកាត់បន្ថយភាពពឹងផ្អែករបស់កម្ពុជាចំពោះការនាំចូលប្រភពឥន្ធនៈផូស៊ីល និងអគ្គីសនីពីប្រទេសជិតខាង ។
ទន្ទឹម និងអត្ថប្រយោជន៍ជាច្រើន ថាមពលអគ្គិសនីដើរដោយពន្លឺព្រះអាទិត្យក៏បានផ្តល់ផលវិបាកមួយចំនួនផងដែរ ដែលទាមទារឱ្យរាជរដ្ឋាភិបាលត្រូវមានការគ្រប់គ្រងយ៉ាងម៉ត់ចត់ស្របតាមស្តង់ដាអន្តរជាតិ ។
យោងតាមរបាយការណ៍របស់មន្ទីររ៉ែ និងថាមពលខេត្តពោធិ៍សាត់ បានឲ្យដឹងថា ខេត្តពោធិ៍សាត់ មានស្ថានីយផលិតថាមពលអគ្គិសនីដើរដោយពន្លឺព្រះអាទិត្យធំជាងគេនៅក្នុងប្រទេសកម្ពុជា ដែលមានទីតាំងស្ថិតក្នុងភូមិអន្សរក្ដាម ឃុំស្នាអន្សា ស្រុកក្រគរ ។ មានអនុភាព៩០មេហ្គាវ៉ាត បានភ្ជាប់ជាមួយបណ្តាញជាតិអនុស្ថានីយតង់ស្យុង ខ្ពស់២៣០គីឡូវ៉ុល និងកំពុងពង្រីកអនុភាព១៥០មេហ្គាវ៉ាត់បន្ថែមទៀត ដោយធ្វើការរៀបចំទីតាំងឈូសឆាយដី បានប្រមាណ៩៥ភាគរយហើយ គ្រោងដាក់អោយដំណើរការជាពីរដំណាក់កាល នៅចុងឆ្នាំ២០២៥ និងនៅដើមឆ្នាំ២០២៦ ។
គ្រោងការនេះនឹងធ្វើឱ្យខេត្តពោធិ៍សាត់ មានស្ថានីយ៍ផលិតថាមពលអគ្គិសនីដើរដោយពន្លឺព្រះអាទិត្យ ដែលមានអនុភាពសរុបចំនួន២៤០មេហ្គាវ៉ាត់ ជាស្ថានីយផលិតថាមពលអគ្គិសនីដើរដោយពន្លឺព្រះអាទិត្យធំជាងគេបង្អស់ក្នុងប្រទេសកម្ពុជា ។
សូមបញ្ជាក់ថា កម្ពុជាមានស្ថានីយផលិតថាមពលដើរដោយពន្លឺព្រះអាទិត្យ សរុបចំនួន៧ទីតាំងហើយ ក្នុងនោះមានក្នុងខេត្តបាត់ដំបងដែលមានអានុភាព៦០មេហ្គាវ៉ាត់, នៅក្រុងបាវិតខេត្តស្វាយរៀង មានអានុភាព២០មេហ្គាវ៉ាត់,នៅតំបន់ត្មាតពង ខេត្តកំពង់ស្ពឺ មានអនុភាព៦០មេហ្គាវ៉ាត់,នៅខេត្តបន្ទាយមានជ័យ ផ្តល់អានុភាព៣០មេហ្កាវ៉ាត់, នៅស្រុកទឹកផុស ខេត្តកំពង់ឆ្នាំង មានអានុភាព៦០មេហ្គាវ៉ាត់, នៅខេត្តសៀមរាប មានអានុភាព៣២គីឡូវ៉ាត់ និងស្រុកក្រគរខេត្តពោធិ៍សាត់ មានអានុភាព២៤០មេហ្គាវ៉ាត់ ៕
ចែករំលែកព័តមាននេះ