រាជធានីភ្នំពេញ ៖ បន្ទាប់មានការជជែកពីករណីដាក់បន្ទះសូឡាពន្លឺព្រះអាទិត្យលើបណ្តាញសង្គមយ៉ាងផុសជុលនោះ ពេលនេះ ខាងមន្ទីរ៉ែ និងថាមពលខេត្តព្រះសីហនុ បានធ្វើការបកស្រាយពីករណីនេះដើម្បីឱ្យអស់ចម្ងល់ ។ យោងតាមបណ្តាញសង្គមរបស់មន្ទីរ៉ែ និងថាមពលខេត្តព្រះសីហនុ…
រាជធានីភ្នំពេញ ៖ បន្ទាប់មានការជជែកពីករណីដាក់បន្ទះសូឡាពន្លឺព្រះអាទិត្យលើបណ្តាញសង្គមយ៉ាងផុសជុលនោះ ពេលនេះ ខាងមន្ទីរ៉ែ និងថាមពលខេត្តព្រះសីហនុ បានធ្វើការបកស្រាយពីករណីនេះដើម្បីឱ្យអស់ចម្ងល់ ។
យោងតាមបណ្តាញសង្គមរបស់មន្ទីរ៉ែ និងថាមពលខេត្តព្រះសីហនុ នៅថ្ងៃទី០៨ ខែកក្កដា ឆ្នាំ២០២៤ បានលើកឡើងថា រឿងប្រើប្រាស់ថាមពលពន្លឺអាទិត្យ សូមសង្ខេបដោយខ្លី គឺមិនចាំបាច់ចុះបញ្ជី មិនបាច់ខ្វល់ មិនបាច់រវល់អីទាំងអស់ ចំពោះឧបករណ៍ប្រើពន្លឺព្រះអាទិត្យដោយផ្ទាល់ ដូចជាបង្គោលអំពូលភ្លើង ម៉ាស៊ីនបូមទឹក ឆ្នាំងដាំបាយ អំពូលបំភ្លឺតាមសួនជាដើម ដែលមិនតភ្ជាប់ជាមួយប្រព័ន្ធខ្សែភ្លើងប្រើក្នុងផ្ទះរាល់ថ្ងៃជាមួយភ្លើងរដ្ឋ ។
ប្រភពបន្តថា ធ្វើស្វ័យប្រកាស តែមិនមានបង់លុយ ឬចំណាយអ្វីទាំងអស់ សម្រាប់អ្នកប្រើសូឡាតាមផ្ទះ តាមអាជីវកម្ម ដែលមានអានុភាពត្រឹម១០គីឡូវ៉ាត់ចុះក្រោម ឬសូឡាទំហំមធ្យម២០ផ្ទាំង ឬអាធំ ១៦ផ្ទាំង សរុបទៅប្រហែល១២០ម៉ែត្រការ៉េ ទៅ២០០ម៉ែត្រការ៉េ ដូចនេះ ស្ទើរ៩៥% មិនប៉ះពាល់អីទេ ។
បើគិតតាមផ្ទះល្វែងបុរី ៤ម៉ែត្រ គុណ១៦ម៉ែត្រ វាបានតែ៦៤ម៉ែត្រការ៉េ ចឹងដាក់ក្រាលពេញដំបូលផ្ទះល្វែងក៏មិនជាប់ប្រាក់បង់ប៉ះប៉ូវដែរ ។ ប្រភពបញ្ជាក់ថា «សូមកុំផ្អើលតាមគ្នា រឿងប្រើអំពូលសូឡា ត្រូវបង់ពន្ធ បង់ថ្លៃនោះ សូមស្វែងយល់ច្បាស់សិន» ។
ជាមួយគ្នានោះដែរ មន្ទីររ៉ែ និងថាមពលបានលើកលើងថា ការចុះបញ្ជី និងអាចត្រូវបង់ថ្លៃប៉ះប៉ូវ ដើម្បីឱ្យមានសមធម៌នៅពេលខាងមុខ ចំពោះតែរោងចក្រឧស្សាហកម្ម កន្លែងធ្វើពាណិជ្ជកម្ម សណ្ឋាគារ ឬអគារធំៗ ។ មូលហេតុ ដោយសារគេរកស៊ីលើប្រព័ន្ធហ្នឹង ហើយគេក៏ចំណេញថ្លៃភ្លើងច្រើន គេត្រូវបង់ថ្លៃប៉ះប៉ូវ ដើម្បីទប់ថ្លៃអ្នកប្រើផ្សេងទៀត។ បើនិយាយទៅ វាជាប្រយោជន៍អ្នកប្រើតូចៗ។
មូលហេតុអ្វីបានត្រូវធ្វើស្វ័យប្រកាស និងគ្រប់គ្រងលើការប្រើប្រាស់ថាមពលពីព្រះអាទិត្យ?
យ៉ាងណាក្តីមន្ទីរ៉ែ និងថាមពលបានអះអាងថា មិនមែនអាជ្ញាធរអគ្គិសនីគ្រប់គ្រងព្រះអាទិត្យទេ គឺគ្រប់គ្រងប្រភពថាមពល វាមិនខុសអីពីការគ្រប់គ្រងប្រភពថាមពលពីទឹក ពីខ្យល់ ឬពីប្រភពធាតុដើមផ្សេងៗឡើយ គឺដើម្បីការពារប្រយោជន៍រួម ។
ជាមួយគ្នានោះដែរ ប្រភពបានលើកឡើងថា ដើម្បីគ្រប់គ្រងចរន្ត ការតបណ្ដាញសូឡាជាមួយខ្សែភ្លើងជាតិដោយផ្ទាល់ អាចធ្វើអោយជ្រាបចរន្តអគ្គិសនីទៅក្នុងខ្សែវិញ ពេលចរន្តជាតិផ្ដាច់អគ្គិសនីដើម្បីជួសជុលផ្សេងៗ អាចបង្កហានិភ័យដល់អាយុជីវិតអ្នកជួសជុលបណ្ដាញ។ ដូចនេះ គេការពារទុក ដឹងផ្ទះណា ដាក់សូឡាធំៗ អាចបង្កគ្រោះថ្នាក់ ស្រួលបង្កាជាមុន។
ដើម្បីគ្រប់គ្រងលំនឹងថាមពល ព្រះអាទិត្យជួនលិចជួនរះមិនទៀង មិនអាចគ្រប់គ្រងបាន ហើយការឡើងចុះមិនទៀងនេះ វាប៉ះពាល់ដល់លំញ័រអគ្គិសនីឡើងចុះដែរ នាំអោយរអាក់រអួល ឬដាច់តែម្ដង។ ចឹងចុះបញ្ជី ដើម្បីខាងបច្ចេកទេសអគ្គិសនីដឹងច្បាស់ និងរៀបចំឧបករណ៍បន្សាបលំញ័រ។
ប្រភពដដែលបានលើកឡើងទៀតថាដើម្បីគ្រប់គ្រងបរិមាណថាមពល បើមិនដឹងថាប្រើថាមពលព្រះអាទិត្យអស់ប៉ុន្មាន ចឹងខាងអគ្គិសនីក៏មិនដឹងច្បាស់ថា គួរស្តុកទុកថាមពលប៉ុន្មាន ដើម្បីអតិថិជនប្រើប្រាស់ពេលព្រះអាទិត្យអត់សប្បាយចិត្ត អត់បើកថ្ងៃ ឬក៏ពេលយប់ជាដើម។ ពេលថាមពលមិនគ្រប់ ប្រើមិនកើតនាំគ្នារិះគន់ តែបើទិញថាមពលមកស្តុកទៅសល់ តើគិតម៉េច? និយាយស្រួលយល់ ចង់អោយគេត្រៀមសល់រហូត មិនខាតហើយទេ
មន្ទីររ៉ែ និងថាមពលបានសំណូមពរ កុំបំប៉ោងតាមគ្នាឃើញអ្នកខ្លះបង្ហោះដោះអំពូលសូឡា អ្នកខ្លះខ្លាចគេយកពន្ធសូឡា អ្នកខ្លះថាខាងអគ្គិសនីគ្រប់គ្រងព្រះអាទិត្យ ពេលខ្លះ អ្នកជំនាញគាត់ពន្យល់តាមបច្ចេកទេសជ្រៅពេក ចឹងអាចពិបាកយល់តិច ៕
ចែករំលែកព័តមាននេះ