(អន្តរជាតិ)៖ លោក Jon Landau បានទទួលមរណភាពក្នុងអាយុ ៦៣ឆ្នាំ បន្ទាប់ពីតស៊ូជាមួយជំងឺមហារីកជាយូរឆ្នាំ។ នៅថ្ងៃទី០៦ ខែកក្កដា (ម៉ោងក្នុងស្រុក) កាសែត Collider បានរាយការណ៍ថាលោក Jon Landau ដែលជាផលិតករភាពយន្តល្បីៗដូចជា Titanic និង Avatar បានទទួលមរណភាពក្នុងអាយុ ៦៣ឆ្នាំ។

មិត្តរួមការងារជាច្រើនបានចូលរួមរំលែកទុក្ខដល់ផលិតករដ៏ល្បីល្បាញ ដោយលោក James Cameron ក៏បានសម្តែងការសោកស្តាយចំពោះមរណភាពរបស់មិត្តរួមការងារ ចំណែកលោក Alan Bergman នាយកប្រតិបត្តិក្រុមហ៊ុន Disney Entertainment បានគោរពដល់លោក Jon Landau ជាផលិតករដ៏ល្បីល្បាញម្នាក់ ដែលបានបំផុសគំនិតមនុស្សជាច្រើន។ Alan Bergman បានសរសេរថា «យើងសូមចូលរួមរំលែកទុក្ខយ៉ាងក្រៀមក្រំបំផុតចំពោះភរិយារបស់ Jon គឺ Julie និងក្រុមគ្រួសារក្នុងអំឡុងពេលដ៏លំបាកនេះ»។

លោក Jon Landau កើតនៅឆ្នាំ១៩៦០ នៅទីក្រុងញូវយ៉ក។ បន្ទាប់មកគាត់បានសិក្សានៅសាលាសិល្បៈភាពយន្តនៅសាកលវិទ្យាល័យ Southern California ។ នៅអាយុ ២៩ឆ្នាំ Landau បានក្លាយជាអនុប្រធានប្រតិបត្តិនៃផលិតកម្មខ្សែភាពយន្តភាគនៅ 20th Century Fox ។ ក្នុងកំឡុងឆ្នាំ១៩៩០ គាត់បានមើលការខុសត្រូវលើគម្រោងធំៗដូចជា Die Hard 2 , True Lies , Power Rangers ជាដើម។ លោកJon Landau ត្រូវបានគេស្គាល់ជុំវិញពិភពលោកថាជាអ្នកនៅពីក្រោយភាពជោគជ័យនៃខ្សែភាពយន្តដែលរកចំណូលបានខ្ពស់បំផុត គឺ រឿង Titanic និង រឿង Avatar។ ប្រភព៖ BBC NEWS