ទីក្រុងប៉ារីស៖ ថ្ងៃនេះ ប្រជាជនបារាំងចេញទៅបោះឆ្នោតសភានៅទូទាំងប្រទេសដែលគេគិតថាគណបក្សសមាជជាតិរបស់លោកស្រីឡឺពែនដែលមាននិន្នាការស្ដាំនិយមជ្រុល (ឬជាតិនិយមចង្អៀតចង្អល់) អាចនឹងមានជ័យជម្នះជាប្រវត្តិសាស្ត្រ។ ដូច្នេះពួកគេអាចនឹងសម្រេចក្ដីសុបិនរបស់ខ្លួនដែលចង់ចាត់ការបញ្ហាជនអន្តោប្រវេសន៍ខុសច្បាប់, ការមានអំណាចនៅក្នុងសភាដើម្បីកែ ឬរៀបចំច្បាប់ថ្មី និងការបិទបញ្ចប់ភាពជាប់គាំងនយោបាយដែលនៅទាក់ទើរៗអស់ជាច្រើនឆ្នាំមកហើយ។
ប្រធានាធិបតីបារាំង លោកម៉ាក្រុង បានសម្រេចលេងល្បែងនយោបាយដ៏គ្រោះថ្នាក់១ដែលមានន័យថាបើបក្សរបស់លោកអាចមានជ័យជម្នះលើកនេះវាជាការល្អ។ បើមិនដូច្នេះទេ គណបក្សស្ដាំនិយមជ្រុលអាចនឹងឡើងកាន់អំណាចនាពេលអនាគត។ លោកម៉ាក្រុងសម្រេចចិត្តរំលាយសភាចោល និងរៀបចំការបោះឆ្នោតសភាឡើងវិញបន្ទាប់ពីគណបក្សរបស់លោកទទួលបរាជ័យនៅក្នុងការបោះឆ្នោតសភាអឺរ៉ុបកាលពីថ្ងៃទី៩ ខែមិថុនា។
លទ្ធផលឆ្នោតនៅប្រទេសបារាំងលើកនេះអាចនឹងមានឥទ្ធិពលទៅលើបញ្ហាពិភពលោកដូចជាសង្គ្រាមអ៊ុយក្រែន, នយោបាយការបរទេសអន្តរជាតិ និងស្ថិរភាពសេដ្ឋកិច្ចនៅអឺរ៉ុប។ ការកាន់អំណាចរបស់លោកម៉ាក្រុងរយៈពេល៣ឆ្នាំទៅមុខទៀតក៏នឹងរងផលប៉ះពាល់ដោយសារលទ្ធផលឆ្នោតលើកនេះផងដែរ។ កាលពីពេលបោះឆ្នោតជម្រុះជុំទី១ថ្ងៃទី២០ ខែមិថុនានោះបង្ហាញថាប្រជាជនបារាំងមួយភាគធំបោះឆ្នោតគាំទ្រគណបក្សសមាជជាតិរបស់លោកស្រីឡឺពែន។
បើគណបក្សណាទទួលបានសំឡេងភាគច្រើនដាច់ខាតនៅក្នុងវគ្គផ្ដាច់ព្រ័ត្រ បក្សនោះអាចនឹងកាន់តំណែងនាយករដ្ឋមន្ត្រី។មុនការបោះឆ្នោតនេះមានបញ្ហាល្អក់កករ១ចំនួនដូចជាការរើសអើងជាតិសាសន៍ និងការប្រឆាំងនឹងជនជាតិជ្វីប។ បេក្ខជនអ្នកតំណាងរាស្ត្រជាង៥០នាក់រងការបំពារបំពានរាងកាយដោយអំពើហិង្សា ឬការប៉ះពាល់ផ្សេងៗនៅពេលឃោសនា។ នេះជាទិដ្ឋភាពដ៏កម្រនៅក្នុងឆាកនយោបាយបារាំង។ ដូច្នេះរដ្ឋាភិបាលប្រើប្រាស់កម្លាំង៣ម៉ឺននាក់ការពារសន្តិសុខនៅថ្ងៃនេះ។
ការបោះឆ្នោតនឹងបិទបញ្ចប់ត្រឹមម៉ោង៨យប់នៅប្រទេសបារាំង និងកោះគ័រស៊ីកា (Corsica)។ គេគិតថាយ៉ាងយូរត្រឹមយប់ថ្ងៃអាទិត្យនឹងដឹងលទ្ធផលឆ្នោតជាបណ្ដើរៗហើយ។ លទ្ធផលសរុបអាចនឹងដឹងនៅព្រឹកថ្ងៃចន្ទ។ ដោយឡែក ប្រជាជនបារាំងនៅឯនាយសមុទ្រ ឬនៅក្នុងតំបន់ត្រួតត្រារបស់បារាំងឯក្រៅប្រទេសបានទៅបោះឆ្នោតតាំងពីថ្ងៃសៅរ៍។
បើគណបក្សសមាជជាតិរបស់លោកស្រីឡឺពែនទទួលបានសំឡេងភាគច្រើនដាច់ខាតនៅក្នុងសភាមានន័យថាក្រុមស្ដាំនិយមជ្រុលឡើងកាន់អំណាចនាយករដ្ឋមន្ត្រីជាថ្មីម្ដងទៀតចាប់តាំងពីជំនាន់សង្គ្រាមលោកលើកទី២។ គណបក្សនេះឈរលំដាប់ទី១នៅក្នុងការបោះឆ្នោតជម្រុះជុំទី១ជាមួយនឹងសំឡេងគាំទ្រជាង៣៤%។ លទ្ធផលស្ទង់មតិបង្ហាញថាគណបក្សសមាជជាតិអាចនឹងទទួលសំឡេងនាំមុខគេមែន ប៉ុន្តែមិនអាចគ្រប់៥០+១ ឬ២៨៩អាសនៈដើម្បីគ្រប់គ្រងសភាម្នាក់ឯងទេ។
អាចមានសេណារីយោ២នៅក្នុងការបោះឆ្នោតលើកនេះ។ ទី១-បើគណបក្សសមាជជាតិឈ្នះ៥០+១មានន័យថាបក្សនេះនឹងកាន់តំណែងនាយករដ្ឋមន្ត្រី។ ពេលនោះ លោកម៉ាក្រុងត្រូវចែកអំណាចជាមួយគណបក្សសមាជជាតិ។ ទី២-ប៉ុន្តែបើគ្មានគណបក្សណាទទួលបាន៥០+១ទេ លោកម៉ាក្រុងមិនត្រូវការចងសម្ព័ន្ធភាពជាមួយគណបក្សសមាជជាតិទេ។ ប្រហែលជាងាកទៅចងសម្ព័ន្ធជាមួយក្រុមខាងឆ្វេង។ ទី៣-លោកម៉ាក្រុងអាចនឹងបង្កើតរដ្ឋាភិបាលដែលមិនចំណុះឱ្យគណបក្សនយោបាយ។ មានន័យថាជារដ្ឋាភិបាលបច្ចេកទេស ឬបច្ចេកាធិបតេយ្យ៕
ចែករំលែកព័តមាននេះ