ខេត្តសៀមរាប ៖ កសិដ្ឋានចិញ្ចឹមសត្វក្រពើមួយកន្លែង ស្ថិតនៅភូមិខ្នារ សង្កាត់ជ្រាវ ក្រុងសៀមរាប បានយកក្រពើងាប់១ក្បាល ហើយភ្លេចបិទទ្រូងវិញ បណ្តាលឱ្យក្រពើចេញពីទ្រុងចំនួន២២ក្បាល ដែលមានអាយុ១០ឆ្នាំឡើង…
ខេត្តសៀមរាប ៖ កសិដ្ឋានចិញ្ចឹមសត្វក្រពើមួយកន្លែង ស្ថិតនៅភូមិខ្នារ សង្កាត់ជ្រាវ ក្រុងសៀមរាប បានយកក្រពើងាប់១ក្បាល ហើយភ្លេចបិទទ្រូងវិញ បណ្តាលឱ្យក្រពើចេញពីទ្រុងចំនួន២២ក្បាល ដែលមានអាយុ១០ឆ្នាំឡើង ប្រវែង១,៥ម៉ែត្រ បង្កការភ្ញាក់ផ្អើលពេញភូមិ តែយ៉ាងណា ត្រូវមន្ត្រីជំនាញចាប់បានដាក់ចូលទ្រុងវិញទាំងអស់ ហើយមិនមានមនុស្សណាម្នាក់រងគ្រោះឡើយ។
ហេតុការណ៍ក្រពើ រួចចេញពីទ្រុងកើតឡើងនៅវេលាម៉ោង១២និង ២៥នាទី រំលងអាធ្រាត្រឈានចូលថ្ងៃទី០៣ ខែកក្កដា ឆ្នាំ២០២៤ ស្ថិតនៅបរិវេញដីឡូត៍អាងក្រពើ ក្នុងភូមិខ្នារ សង្កាត់ជ្រាវ ក្រុង ខេត្តសៀមរាប ។
ក្រោយទទួលបានព័ត៌មាននេះភ្លាម លោក មាឃ ច័ន្ទវិរិទ្ធ នាយសង្កាត់រដ្ឋបាលជលផលផ្សារលើ បានឱ្យដឹងថា លោកបានដឹកនាំ មន្ត្រីជំនាញរដ្ឋបាលជលផល ចុះទៅដល់កន្លែងកសិដ្ឋានចិញ្ចឹមក្រពើ និង ហៅម្ចាស់ យកមកធ្វើកិច្ចសន្យា និង បានណែនាំឱ្យ ម្ចាស់ កសិដ្ឋាន មានការប្រុង ប្រយ័ត្នខ្ពស់ថែមទៀត ក្នុងការចូលចាប់ លក់ត្រូវមើលឱ្យបានគ្រប់ជ្រុងជ្រោយ មុននឹងចាកចេញពី កន្លែងនោះ។
លោកបានបន្ថែមថា អ្នកមើលថែក្រពើ ឈ្មោះ មុំ ចាន់់ណា ភេទប្រុស អាយុ៣៥ឆ្នាំ រស់នៅភូមិខ្នារ សង្កាត់ជ្រាវ ក្រុងសៀមរាប បានរៀបរាប់ប្រាប់ មន្ត្រីជំនាញយើងថា ម្ចាស់កសិដ្ឋានចិញ្ចឹមក្រពើខាងលើ ឈ្មោះ តាមី រស់នៅស្រុកពួក ខេត្តសៀមរាប ។ លោក មុំ ចាន់ណា បានរៀបរាប់បន្តទៀតថា កាលពីវេលាម៉ោង ៤ និង៥០ នាទី រូប លោក បានដើរមើលក្រពើ បន្ទាប់ពីឱ្យចំណី វាស៊ីរួច ក៏ឃើញមានងាប់មួយក្បាល រួចក៏ដាក់ខ្សែទាក់អូសយកមកលើ ខណៈពេលនោះ រូបលោក ភ្លេចបិទទ្រុង ។
បន្ទាប់មក លោកបាន ដើរមើលនៅម៉ោងប្រមាណជា១២និង២៥នាទីរំលងអាធ្រាតឈានចូលថ្ងៃទី០៣ ខែកក្កដា ឆ្នាំ២០២៤ ក៏ឃើញទ្វារ ទ្រុងក្រពើបើកចំហ ក៏សង្ស័យ រួច ដើរលើ ក៏ឃើញរួចចេញមកក្រៅ ក្នុងទ្រុង ដែលសត្វក្រពើងាប់នោះ រាប់ឃើញ រួចចេញពីទ្រុងចំនួន២២ក្បាល អាយុ១០ឆ្នាំ ប្រវែង ១,៥ ម៉ែត្របានរួចចេញពីទ្រុង។
មូលហេតុដែលក្រពើរួចចេញពីទ្រុង គឺដោយសារពេលបើកទ្វារចូលទៅយកក្រពើដែលងាប់ ១ក្បាល ពេលចេញមកវិញភ្លេចបិទទ្វារ ។ លោក នាយសង្កាត់ ជលផលបានបន្តទៀតថា ក្រោយពីរួច អ្នកមើលថែក្រពើ និងអ្នកជិតខាង បានចាប់ប្រមូលក្រពើដែលរួច រហូតដល់ម៉ោង៤និង៤៥ នាទីទៀបភ្លឺបានចាប់ប្រមូលក្រពើទាំង២២ក្បាលនោះមកវិញ ទាំងអស់សំណាងល្អគ្មាននរណាម្នាក់រងគ្រោះថ្នាក់ឡើយ។
ក្នុងនោះដែរ ម្ចាស់ក្រពើឈ្មោះ តាមី បានរៀបរាប់ប្រាប់ភ្នាក់ងារកោះសន្តិភាពនៅអាងកសិដ្ឋានថា លោកបើកកសិដ្ឋានចិញ្ចឹមក្រពើនេះយូរឆ្នាំមកដល់ បច្ចុប្បន្ននេះ ដែលមានអាងចំនួន៩អាង និង មានក្រពើ តូចធំ ចំនួន ប្រមាណ២០០០ក្បាល ហើយខាតជារៀងរាល់ឆ្នាំ ហើយ ងាប់ ក្នុង១ ថ្ងៃៗ ចាប់ពី៣ក្បាល ទៅ៥ ក្បាល ។
ម្ចាស់ក្រពើបញ្ជាក់ទៀតថា បន្ថែមនៅកន្លែង ម្ចាស់ក្រពើថា ក្រពើទាំងអស់នេះ គាត់ឈប់ចិញ្ចឹមក្រពើតទៅទៀតហើយ ព្រោះ វា ងាប់ ក្នុង មួយថ្ងៃ ៗ មិន ក្រោម ពី ៥ ទៅ ១០ ក្បាល ទេ ហើយ លក់ចេញ ក៏មិនចំណេញទៀត ដូច្នេះ ទើបគាត់សម្រេចចិត្ត ឈប់ចិញ្ចឹម នៅឆ្នាំក្រោយនេះ។
លោកនាយសង្កាត់ បានបញ្ជាក់ទៀតថា ក្រោយពីចុះដល់ទីតាំង កសិដ្ឋានចិញ្ចឹមក្រពើ រួចមកករណីនេះ ពុំបានធ្វើឱ្យមានគ្រោះ ថ្នាក់ដល់អ្នកដ៏ទៃនោះទេ ។ ក្នុងនោះដែរ មន្ត្រីជំនាញក៏បាន ហៅ មកណែនាំ នៅប៉ុស្តិ៍.នគរបាល សង្កាត់ជ្រាវ ដើម្បីឱ្យម្ចាស់ កសិដ្ឋានចិញ្ចឹមក្រពើ នោះ ធ្វើកិច្ចសន្យា និង បង្កើនការប្រុប្រយ័ត្នឱ្យបានខ្ពស់ ព្រោះវាអាចបង្កឱ្យមានគ្រោះថ្នាក់ជាយថាហេតុបាន៕
ចែករំលែកព័តមាននេះ