ទីក្រុងប្រ៊ុចសែល៖ នាយករដ្ឋមន្ត្រីហូឡង់ លោកម៉ាករ៉ាត់ (Mark Rutte) នឹងឡើងធ្វើជាអគ្គលេខាធិការអង្គការណាតូនៅអាណត្តិថ្មីបន្តតំណែងពីលោកស្តុលថឹនបឺក (Jens Stoltenberg) ដែលនឹងត្រូវបញ្ចប់អាណត្តិនាពេលឆាប់ៗនេះ។ សមាជិកអង្គការណាតូទាំង៣២ប្រទេសបានបោះឆ្នោតជាឯកច្ឆន្ទគាំទ្របេក្ខភាពលោកម៉ាករ៉ាត់ដើម្បីដឹកនាំបក្សសម្ព័ន្ធយោធាមួយនេះបន្ទាប់ពីបេក្ខជនប្រកួតប្រជែងម្នាក់ទៀតដែលជាប្រធានាធិបតីប្រទេសរ៉ូម៉ានីសម្រេចចិត្តដកខ្លួនថយចេញពីការប្រកួត។
លោកម៉ាករ៉ាត់ជាកម្លាំងចលករដ៏សំខាន់ម្នាក់ក្នុងការដើរកៀរគរជំនួយយោធាពីទ្វីបអឺរ៉ុបដើម្បីផ្ដល់ទៅឱ្យអ៊ុយក្រែន។ រដ្ឋជាសមាជិកភាគច្រើនក៏ពេញចិត្តពេញថ្លើមសម្បើមណាស់ដែរក្នុងការឃើញលោកម៉ាករ៉ាត់ឡើងមកដឹកនាំស្ថាប័ននេះ។ ជាគោលការណ៍របស់អង្គការណាតូ អ្នកដែលអាចនឹងឡើងមកកាន់តំណែងជាអគ្គលេខាធិការបានលុះត្រាតែទទួលបានសំឡេងគាំទ្រពីរដ្ឋជាសមាជិកទាំងអស់។ មានន័យថាគ្មានសំឡេងជំទាស់ទេ។
កាលពីមុននេះ លោកម៉ាករ៉ាត់ក៏ធ្លាប់ជួបនឹងសំឡេងជំទាស់ពីប្រធានាធិបតីប្រទេសហុងគ្រី លោកវិចទ័រ អ័របេន (Viktor Orban) ដែលជាសម្ព័ន្ធមិត្តរបស់លោកពូទីន។ ប៉ុន្តែក្រោយមក លោកអ័របេនក៏លែងជំទាស់តទៅទៀត ហើយសុខចិត្តបើកផ្លូវឱ្យលោកម៉ាករ៉ាត់កាន់តំណែងនេះចុះ។ ប៉ុន្តែក្រោមលក្ខខណ្ឌមួយ «ហុងគ្រីសូមមិនផ្ដល់ជំនួយហិរញ្ញវត្ថុ ឬជំនួយយោធាទៅឱ្យអ៊ុយក្រែនទេ»។
សារព័ត៌មាននៅទ្វីបអឺរ៉ុបចុះផ្សាយថាយ៉ាងយូរត្រឹមតែប៉ុន្មានថ្ងៃខាងមុខនេះ លោកម៉ាករ៉ាត់នឹងទទួលការតែងតាំងជាផ្លូវការហើយ។ លោកម៉ាករ៉ាត់នឹងជំនួសតំណែងលោកស្តុលថឹនបឺកដែននឹងបញ្ចប់អាណត្តិនៅខែតុលា ខាងមុខនេះ។ ប៉ុន្តែលោកម៉ាករ៉ាត់ឡើងទៅអង្គុយកៅអីអគ្គលេខាធិការអង្គការណាតូមិនប្រាកដជាស្រណុកខ្លួនប៉ុន្មានឡើយ។ បើលោកបៃដិនបន្តឈ្នះឆ្នោតនៅចុងឆ្នាំ២០២៤នេះមិនអីទេ។ ផ្ទុយទៅវិញ បើលោកត្រាំឈ្នះឆ្នោត សេណារីយោអាចនឹងប្រែប្រួលនៅក្នុងកម្មវិធីនយោបាយរបស់ណាតូ។ លោកត្រាំធ្លាប់និយាយជាច្រើនដងហើយថាលោកនឹងកាត់ផ្ដាច់ជំនួយសម្រាប់អ៊ុយក្រែន៕
ចែករំលែកព័តមាននេះ