ខេត្តកំពង់ស្ពឺ ៖ ក្រុមជនខិលខូចបានដាក់គ្រឿងចក្រ (អេស្កាវ៉ាទ័រ) ជីកកកាយភ្នំមួយ ក្បែរវត្តប្រាក់សំបូរ ដើម្បីយកអាចម៍ដីតាមរថយន្តធុនធំពាក់ផ្លាកលេខខេមរភូមិន្ទ (ខម) ទៅលក់បន្តសង្ស័យគ្មានច្បាប់អនុញ្ញាត ហើយអាជ្ញាធរឃុំ-ស្រុកមិនទាន់ដឹងរឿងជីកកាយភ្នំនោះទេ…
ខេត្តកំពង់ស្ពឺ ៖ ក្រុមជនខិលខូចបានដាក់គ្រឿងចក្រ (អេស្កាវ៉ាទ័រ) ជីកកកាយភ្នំមួយ ក្បែរវត្តប្រាក់សំបូរ ដើម្បីយកអាចម៍ដីតាមរថយន្តធុនធំពាក់ផ្លាកលេខខេមរភូមិន្ទ (ខម) ទៅលក់បន្តសង្ស័យគ្មានច្បាប់អនុញ្ញាត ហើយអាជ្ញាធរឃុំ-ស្រុកមិនទាន់ដឹងរឿងជីកកាយភ្នំនោះទេ ។
ប្រភពព័ត៌មានពីប្រជាពលរដ្ឋឈ្មោះ ធីវ អាយុជាង៣០ឆ្នាំ រស់នៅក្បែរវត្តប្រាក់សំបូរបានប្រាប់អ្នកយកព័ត៌មានយើងឱ្យដឹងថា ក្រុមជនខិលខូចបានដាក់គ្រឿងចក្រចូលជីកកាយភ្នំនេះ មានរយៈពេល៥-៦ថ្ងៃមកហើយ ដោយដឹកអាចម៌ដីតាមរថយន្តធុនតូច-ធំកង់១០ក៏មាន ហើយរថយន្តធុនធំពាក់ផ្លាកលេខខេមរភូមិន្ទ(ខម)ថែមទៀតផង ។ ការជីកកាយភ្នំនេះ ក្រុមរថយន្តបានដឹកអាចម៍ដីយកទៅលក់បន្តនៅម្តុំភូមិត្រពាំងឱប ក្នុងឃុំមហាសាំងជាច្រើនគ្រឿង បង្កឱ្យបែកភក់រងការខូចខាតផ្លូវថែមទៀតផង។
ប្រជាពលរដ្ឋដដែលបន្តថា ការជីកកាយភ្នំយកអាចម៌ដីទៅលក់បន្តរបស់ក្រុមជនខិលខូចឆ្លៀតឱកាសនេះ តែងតែលួចធ្វើជាយូរខែឆ្នាំណាស់មកហើយ។ ពេលខ្លះ ក្រុមជនឆ្លៀតឱកាសបានលួចដាក់គ្រឿងចក្រ ចូលជីកកាយដីភ្នំម្តងពី២០០ ទៅ៣០០រថយន្តហើយ ទើបដកគ្រឿងចក្រចេញទៅវិញ ។ ទង្វើរបស់ក្រុមជនខិលខូចឆ្លៀតឱកាសធ្វើបែបនោះ មិនដឹងថា មានការបើកភ្លើងខៀវពីអាជ្ញាធរ ឬសមត្ថកិច្ចជំនាញខាងណានោះទេ ទើបហ៊ានដាក់គ្រឿងចក្រជីកកាយដីភ្នំយកអាចម៌ដីទៅលក់សង្ស័យចែកគ្នាជាប្រព័ន្ធមិនខ្លាចញញើតច្បាប់បែបនេះទាល់តែសោះ ។
ប្រជាពលរដ្ឋដាក់ការសង្ស័យថា ប្រសិនបើគ្មានការបើកភ្លើងខៀវពីជំនាញនោះទេ ក្រុមជនខិលខូចក៏មិនហ៊ានធ្វើការដាក់គ្រឿងចក្រចូលជីកកាយដីភ្នំក្បែរវត្តប្រាក់សំបូរនេះបានដែរ។ ពាក់ព័ន្ធនិងការលើកឡើងខាងលើរបស់ប្រជាពលរដ្ឋនេះដែរ លោក គាវ លាងគា អភិបាលស្រុកភ្នំស្រួចបានឱ្យដឹងតាមទូរស័ព្ទថា រឿងគេដាក់គ្រឿងចក្រជីកកាយភ្នំយកអាចម៌ដីទៅលក់នោះ លោកមិនទាន់បានដឹងទេ។ លោកនិងចាត់ឱ្យមន្ត្រីចុះទៅពិនិត្យមើលនិងធ្វើការងារនេះ ។
លោកថា កន្លងទៅ មានក្រុមយោធាបានធ្វើការស្នើសុំទៅរដ្ឋបាលស្រុកសុំដឹកយកកំទេចថ្មរបស់ក្រុមហ៊ុនក្ស័យធុនមួយ ដើម្បីយកទៅធ្វើការជួសជុលផ្លូវម្តងដែរ ៕
ចែករំលែកព័តមាននេះ