រាជធានីភ្នំពេញ៖ ក្នុងនាមជាបងប្រុស គឺលោកមាស សុខរតនៈ បានស្នើដល់មហាជនមួយចំនួនកុំមានការគិតបែបអវិជ្ជមានច្រើនចំពោះអត្ថន័យ និងការសម្តែងបទបងកុំបាញ់ទឹកដាក់មុខអូន របស់មាស សុខសោភា ដែលកំពុងទទួលការគាំទ្រផង និងការរិះគន់ផងសម្រាប់ប្រិយមិត្តអ្នកទស្សនា…
រាជធានីភ្នំពេញ៖ ក្នុងនាមជាបងប្រុស គឺលោកមាស សុខរតនៈ បានស្នើដល់មហាជនមួយចំនួនកុំមានការគិតបែបអវិជ្ជមានច្រើនចំពោះអត្ថន័យ និងការសម្តែងបទបងកុំបាញ់ទឹកដាក់មុខអូន របស់មាស សុខសោភា ដែលកំពុងទទួលការគាំទ្រផង និងការរិះគន់ផងសម្រាប់ប្រិយមិត្តអ្នកទស្សនា ។
តារាចម្រៀងនាង មាស សុខសោភា បានបញ្ចេញឈុតខ្លី(Trailer) MV នៃបទបងកុំបាញ់ទឹកដាក់មុខអូន នៅលើបណ្តាញសង្គម សម្រាប់បណ្តាអ្នកគាំទ្រ ដើម្បីត្រៀមចេញនាឱកាសបុណ្យចូលឆ្នាំថ្មីដែលនឹងឈានចូលមកដល់នាពេលដ៏ខ្លីខាងមុខនេះ ។
តាមរយៈការសម្តែងក្នុងបទចម្រៀងមួយនេះ គេបានឃើញមានការលាយបញ្ចូលគ្នាទាំងសិល្បៈបុរាណ និងសម័យជាមួយចង្វាក់រាំរស់រវើក ហើយនឹងបង្ហាញពីទិដ្ឋភាពសប្បាយរីករាយនៅក្នុងឱកាសបុណ្យចូលឆ្នាំថ្មី ដែលធ្វើឲ្យអ្នកទស្សនាមានការចាប់អារម្មណ៍យ៉ាងខ្លាំង ។
យ៉ាងណាទន្ទឹមគ្នានោះដែរ រូបភាពសម្តែងនៃបទចម្រៀងរបស់មាស សុខសោភា ខាងលើនេះ ក៏ទទួលបានការរិះគន់ពីមហាជនមួយចំនួនផងដែរ ដោយនៅក្នុងនោះចំពោះចំណងជើងមានអ្នកខ្លះបានគិតទៅដល់អត្ថន័យអ្វីផ្សេងៗដែលមិនល្អ ជាពិសេស ឈុតសម្តែងនោះក៏បានបង្ហាញពីកាំភ្លើងបាញ់ទឹកដែលយល់ថា វាជាប្រពៃណីរបស់ប្រទេសថៃ ។
ពាក់ព័ន្ធបញ្ហាខាងលើនេះ លោកមាស សុខរតនៈ ដែលជាបងប្រុសរបស់តារាចម្រៀងនាងមាស សុខសោភា បានចេញមុខស្នើសុំទៅកាន់មហាជនដែលកំពុងរិះគន់ទៅលើបទចម្រៀង បងកុំបាញ់ទឹកដាក់មុខអូន ដោយភាពវិជ្ជមានឲ្យបានច្រើន និងគិតល្អ ដើម្បីរាំលេងសប្បាយទទួលទេវតាឆ្នាំថ្មីទាំងអស់គ្នា ។
លោកមាស សុខរតនៈ បានអះអាងប្រាប់កោះសន្តិភាពតាមសារអេឡិចត្រូនិចថា សម្រាប់លោកគឺអត់មានយោបល់អ្វីជាដុំកំភួនទេចំពោះរឿងនេះ ព្រោះលោកមិនអាចហាមឃាត់ការគិតរបស់មិត្តអ្នកស្តាប់បានទេបើគាត់គិតល្អគាត់នឹងបានឃើញនូវអ្វីដែលជាចំណុចវិជ្ជមានរាំលេងសប្បាយ តែបើគាត់គិតថាមិនល្អគឺច្បាស់ជាទទួលបាននូវចំណុចអវិជ្ជមានប៉ុណ្ណឹងឯង ។
លោកបញ្ជាក់ថា សម្រាប់ការប្រើប្រាស់រូបភាពនៃការប្រើប្រាស់កាំភ្លើងបាញ់ទឹកនោះលោកក៏សុំមិនមានការបកស្រាយអីឡើយ ប៉ុន្តែលោកចាំបានថាការប្រើប្រាស់កាំភ្លើងបាញ់ទឹកនេះដូចជាក្មេងៗមិនថាកូនលោក ឬកូនគេនិយមទិញប្រើលេងពេលរដូវចូលឆ្នាំនេះប្រហែលជាចូលជិត១០ឆ្នាំហើយ ហើយក៏គ្មានឃើញមានប្រតិកម្មអីទេ តែឆ្នាំនេះទើបតែមានប្រតិកម្មរឿងហ្នឹងលោកក៏មិនដឹងធ្វើម៉េចដែរ ព្រោះរូបភាពយើងថតរួចហើយ ។
ដោយឡែក សម្រាប់ករណីនៃការទាមទារអោយលុបបទចម្រៀងខាងលើនេះចោល ដូចជាករណីបទចម្រៀងលោក ខេមរៈ សិរីមន្ត នោះ លោក មាស សុខរតនៈ បញ្ជាក់ថា ចំណុចនេះលោកមិនដឹងដែរ តែបើទាមទារឲ្យលុបនោះគ្នាអ្នកខំប្រឹងផលិតអស់ទឹកចិត្ត ហើយអនាគតប្រហែលគ្មានអ្នកចង់ផលិតMV ឲ្យបងប្អូនមើល និងរិះគន់ទៀតទេ ៕
ចែករំលែកព័តមាននេះ