តូបលក់ដូរនៅតាមដងផ្លូវលេខ១៥០ ជាប់របងមន្ទីរពេទ្យមិត្តភាពកម្ពុជា-ចិនព្រះកុសុៈមៈ ហៅមន្ទីរពេទ្យលោកសង្ឃ ត្រូវបានអាជ្ញាធរខណ្ឌទួលគោក ចុះទៅរុះរើកាលពីព្រឹកថ្ងៃទី១៦ ខែវិច្ឆិកា ឆ្នាំ២០២៣ ដើម្បីរៀបចំសណ្តាប់ធ្នាប់នៅជុំវិញមន្ទីរពេទ្យ បន្ទាប់ពី
រាជធានីភ្នំពេញ ៖ តូបលក់ដូរនៅតាមដងផ្លូវលេខ១៥០ ជាប់របងមន្ទីរពេទ្យមិត្តភាពកម្ពុជា-ចិនព្រះកុសុមៈ ហៅមន្ទីរពេទ្យលោកសង្ឃ ត្រូវបានអាជ្ញាធរខណ្ឌទួលគោក ចុះទៅរុះរើកាលពីព្រឹកថ្ងៃទី១៦ ខែវិច្ឆិកា ឆ្នាំ២០២៣ ដើម្បីរៀបចំសណ្តាប់ធ្នាប់នៅជុំវិញមន្ទីរពេទ្យ បន្ទាប់ពីធ្វើជួលឱ្យអាជីវករលក់ដូរបានតែប៉ុន្មានខែ ។
ការរុះរើតូបលក់ដូរខាងលើនេះ ត្រូវបានគេដឹងថា ធ្វើទៅតាមបទបញ្ជាពីលោក ឃួង ស្រេង អភិបាលរាជធានីភ្នំពេញ បន្ទាប់ពីមានទំនាស់គ្នារឿងផលប្រយោជន៍ ហើយមន្ទីរពេទ្យបានធ្វើសំណើរទៅរដ្ឋបាលរាជធានីភ្នំពេញ។
តាមអាជ្ញាធរខណ្ឌ ដែលបានចុះទៅរុះរើស បានប្រាប់ឱ្យដឹងថា តូបចំនួន៦ ដែលមិនមានអ្នកលក់ដូរត្រូវបានអាជ្ញាធររុះរើ ជាជំហានដំបូងនៅព្រឹកនេះ និងប្រមាណជាង៤០តូបទៀត ដែលកំពុងតែលក់ដូរ ដោយទុករយៈពេល១សប្តាហ៍ ដើម្បីអោយរុះរើចេញពីរបងមន្ទីរពេទ្យមិត្តភាព កម្ពុជា-ចិនព្រះកុសុមៈ។
ទោះបីជាយ៉ាងណា អាជីវករមានការមិនពេញចិត្តចំពោះប្រធានមន្ទីរពេទ្យ ដោយអះអាងថា នឹងរួមគ្នាផ្តិតមេដៃប្តឹង ព្រោះតូបនេះ ត្រូវបានពួកគាត់ជួលពីមន្ទីរពេទ្យក្នុងតម្លៃមួយខែចំនួន១៥០ដុល្លារ និងទឹកមួយខែ១០ម៉ឺនរៀល និងភ្លើងមួយខែ១០ម៉ឺន ស្រាប់តែពេលនេះខាងមន្ទីរពេទ្យស្នើទៅរដ្ឋបាលរាជធានីភ្នំពេញ ដើម្បីមានវិធានការរុះរើទៅវិញ។
គួរបញ្ជាក់ថា ទីតាំងតូបលក់ដូរនេះ ស្ថិតនៅចិញ្ចើមផ្លូវលេខ១៥០ ជាប់របងខាងត្បូងមន្ទីរពេទ្យមិត្តភាពកម្ពុជា-ចិន ព្រះកុសុមៈ ស្ថិតក្នុងសង្កាត់ទឹកល្អក់ទី២ ខណ្ឌទួលគោក រាជធានីភ្នំពេញ។
តាមព័ត៌មាន បានអោយដឹងថា ដើមឡើយតូបនោះ គឺជាឃ្លាំងដាក់សម្ភារៈចាស់ៗរបស់មន្ទីរពេទ្យ ។ បន្ទាប់ពីមន្ទីរពេទ្យស្ថាបនារួចកាលពីដើមឆ្នាំ២០២៣ ក៏បានសហការជាមួយអាជ្ញាធររៀបចំធ្វើជាតូបជួល ក្នុងគោលបំណងរៀបចំសណ្តាប់ធ្នាប់មិនអោយមានការលក់ដូរអនាធិបតេយ្យតាមដងផ្លូវ។
តាមព័ត៌មានដដែលទម្លាយអោយដឹងទៀតថា នៅក្នុងដំណើរការជួលតូប ប្រាក់ដែលបានពីថ្លៃតូបទំនងជាយកទៅចែកគ្នា ហើយមានអ្នកខ្លះពីមុនធ្លាប់បានហើយ ក្រោយអត់បាន ក៏រាយការណ៍ទៅសាលារាជធានីភ្នំពេញ ដើម្បីមានវិធានការរុះរើតែម្តង។ ទោះបីជាយ៉ាងណា កោះសន្តិភាពពុំទាន់ទទួលបានការបំភ្លឺណាមួយពីនាយកមន្ទីរពេទ្យឡើយ។
ព័ត៌មានបន្ថែមនឹងមានផ្សាយជូននៅលើកាសែតកោះសន្តិភាព។
ចែករំលែកព័តមាននេះ