ស្វី​ស ៖ ធនាគារ​ធំ​បំផុត​របស់​ប្រទេស​ស្វី​ស «UBS» ត្រូវ​បាន​រាយការណ៍​មក​ថា កំពុង​ស្ថិត​ក្នុង​កិច្ច​ពិភាក្សា​កម្រិត​ខ្ពស់ ដើម្បី​ទិញ​យក​ទាំងអស់ ឬ​ជា​ផ្នែក​នៃ​ភាគហ៊ុន​ធនាគារ​កំពុង​មាន​បញ្ហា «Credit Suisse» ដែល​ជា​គូប្រជែង​របស់​ខ្លួន​។

បើ​យោង​តាម​ប្រភព​ពី​សារព័ត៌មាន BBC ដែល​ចេញផ្សាយ​នៅ​ថ្ងៃ​ទី​១៩ មីនា​នេះ បានឱ្យ​ដឹង​ថា ភាគហ៊ុន​ក្នុង​ធនាគារ Credit Suisse ដែល​មាន​មូលដ្ឋាន​ក្នុង​ទីក្រុង​ហ្ស៊ូ​រិច (Zürich) បាន​ធ្លាក់​ចុះ​យ៉ាង​ខ្លាំង​ក្នុង​រយៈពេល​ប៉ុន្មាន​ថ្ងៃ​ថ្មី​ៗ​នេះ បន្ទាប់​ពី​ធនាគារ​បាន​ប្រកាស​ថា ខ្លួន​បាន​រក​ឃើញ​ភាព​ទន់ខ្សោយ​ផ្នែក​ខាង​សម្ភារៈ នៅ​ក្នុង​របាយការណ៍​ហិរញ្ញវត្ថុ​របស់​ខ្លួន ខណៈ​ដែល​កិច្ចព្រមព្រៀង​ត្រួតពិនិត្យ​សង្គ្រោះ​បន្ទាន់ ដែល​មាន​ចំនួន​៥៤​ពាន់​លាន​ដុល្លារ​ពី​ធនាគារជាតិ​ស្វី​ស មិន​បាន​ដោះស្រាយ​បញ្ហា​នេះ​ទេ​។

មក​ទល់​ពេល​នេះ និយតករ​កំពុង​ព្យាយាម​សម្របសម្រួល​កិច្ចព្រមព្រៀង​មួយ មុន​ពេល​ទីផ្សារ​បើក​ឡើង​វិញ នៅ​ថ្ងៃ​ទី​២០ មីនា ស្អែក​នេះ​។ ទន្ទឹម​ជាមួយ​គ្នា ក៏​មានការ​ព្រួយបារម្ភ​ថា ភាគហ៊ុន​ធនាគារ Credit Suisse អាច​បន្ត​ធ្លាក់​ចុះ​ប​ន្ថ​ឬ​ម​ទៀត បន្ទាប់​ពី​បាន​ធ្លាក់​ចុះ​ដល់ ២៤% កាលពី​ថ្ងៃ​ទី​១៥ មីនា កន្លង​ទៅ​។ កត្តា​នេះ បាន​ជំរុញ​ឱ្យ​មានការ​លក់​ចេញ​ជា​ទូទៅ​នៅ​លើ​ទីផ្សារ​អឺរ៉ុប និង​ការ​ភ័យ​ខ្លាច​នៃ​វិបត្តិ​ហិរញ្ញវត្ថុ​កាន់តែ​ទូលំទូលាយ​។

រដ្ឋាភិបាល​ប្រទេស​ស្វី​ស បាន​បើក​កិច្ចប្រជុំ​បន្ទាន់​មួយ​កាលពី​យប់​ថ្ងៃ​ទី​១៨ មីនា កន្លង​ទៅ ប៉ុន្តែ​រហូត​មក​ដល់​ពេល​នេះ មិន​ទាន់​មាន​សេចក្តីថ្លែងការណ៍​ផ្លូវការ​ណាមួយ​ស្តី​ពី​វឌ្ឍនភាព​នៃ​ការ​ចរចា​ពាក់ព័ន្ធ​បញ្ហា​នេះ​នៅឡើយ​ទេ​។

ធនាគារ UBS ដែល​ជា​ស្ថាប័ន​ធនាគារ​ស្វី​ស​ដ៏​ធំ​បំផុត និង​ជា​ធនាគារឯកជន​ធំ​បំផុត​នៅ​លើ​ពិភពលោក ដែល​មាន​មូលដ្ឋាន​ទីក្រុង​ហ្ស៊ូ​រិច ត្រូវ​បាន​រាយការណ៍​ថា បាន​ស្នើ​សុំ​ឱ្យ​រដ្ឋាភិបាល​ស្វី​ស​រ៉ាប់រង​ការ​ចំណាយ​ប្រហែល ៦​ពាន់​លាន​ដុល្លារ ប្រសិនបើ​ត្រូវ​បាន​ទិញ​ភាគហ៊ុន​ធនាគារ Credit Suisse ពិតប្រាកដ​មែន​។ នេះ​បើ​យោង​តាម​ប្រភព​ដែល​បាន​ដកស្រង់​ដោយ​ទីភ្នាក់ងារសារព័ត៌មាន Reuters​។

យ៉ាងណាមិញ កិច្ចព្រមព្រៀង​ណាមួយ​ក៏​អាច​បណ្តាល​ឱ្យ​បាត់បង់​ការងារ​យ៉ាង​សំខាន់​ផង​ដែរ​។ បញ្ហា​នេះ កើតឡើង​ស្រប​ពេល​ជាមួយនឹង​ការ​ដួល​រលំ​របស់​ធនាគារ​ផ្តល់​កម្ចី​ចំនួន​២ នៅ​សហរដ្ឋអាមេរិក​គឺ Silicon Valley Bank និង Signature Bank ដែល​បង្កើន​ការ​ភ័.យ​ខ្លា.ច​ចំពោះ​សុខភាព​របស់​ប្រព័ន្ធ​ធនាគារ​។

ធនាគារ Credit Suisse ដែល​ត្រូវ​បាន​បង្កើត​ឡើង​ក្នុង​ឆ្នាំ​១៨៥៦ បាន​ប្រឈម​មុខ​នឹង​រឿងអាស្រូវ​ជា​ច្រើន​ក្នុង​ប៉ុន្មាន​ឆ្នាំ​ថ្មី​ៗ​នេះ ដោយ​ក្នុង​នោះ​រួម​ទាំង​ការ​ចោទប្រកាន់​ពី​ការ​លាង​លុយ​ផង​ដែរ ជាមួយនឹង​របាយការណ៍​អំពី​ការ​ខាតបង់​ចំនួន ៧.៩​ពាន់​លាន​ដុល្លារ​ក្នុង​ឆ្នាំ​២០២២ ដែល​ជា​ឆ្នាំ​ដ៏​អាក្រក់​បំផុត​ចាប់តាំងពី​វិបត្តិ​ហិរញ្ញវត្ថុ​ឆ្នាំ​២០០៨ ហើយ​បាន​ព្រមាន​ថា ធនាគារ​នេះ​មិន​រំពឹង​ថា នឹង​ទទួល​បាន​ប្រាក់​ចំណេញ​រហូត​ដល់​ឆ្នាំ​២០២៤​។

នៅ​ចុងឆ្នាំ​២០២២ ធនាគារ Credit Suisse មាន​បុគ្គលិក​ទូ​ទាំង​ពិភពលោក​ចំនួន ៥០,៤៨០​នាក់ រួម​ទាំង ១៦,៧០០​នាក់​នៅ​ក្នុង​ប្រទេស​ស្វី​ស​ផង​ដែរ បើ​ទោះបីជា​ការងារ​ចំនួន​៩,០០០​នាក់ នឹង​ត្រូវ​កាត់​ចោល​យ៉ាងណា​ក៏​ដោយ​។ នេះ​បើ​យោង​តាម​របាយការណ៍​ចេញផ្សាយ​ដោយ​ទូរទស្សន៍ SRF របស់​ស្វី​ស​៕