រាជធានីភ្នំពេញ ៖ រដ្ឋមន្ត្រីក្រសួងរុក្ខាប្រមាញ់ និងនេសាទថ្មី ដែលទើបនឹងចូលកាន់តំណែងបានប៉ុន្មានខែ បានផ្តល់គំនិតដល់និស្សិតថា និស្សិតត្រូវមានគោលដៅជីវិតច្បាស់លាស់ និងតស៊ូប្រឹងប្រែង ដើម្បីភាពជោគជ័យនៅក្នុងជីវិត។
![](https://kohsantepheapdaily.com.kh/wp-content/uploads/2022/12/e2c420d928d4bf8ce0ff2ec19b371514-5.jpg)
យោងតាមបណ្តាញសង្គមផ្ទាល់ខ្លួនឯកឧត្តម ឌិត ទីណា រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ ក្នុងឱកាសជួបជាមួយនិស្សិតនៅសាកលវិទ្យាល័យភូមិន្ទភ្នំពេញកាលពេលថ្មីៗកន្លងមកនេះ បានលើកឡើងថា ខ្ញុំបានជួបសំណេះសំណាលជាមួយ សាស្ត្រាចារ្យ លោកគ្រូ អ្នកគ្រូ និងក្មួយៗនិស្សិតនៃសាកលវិទ្យាល័យភូមិន្ទកសិកម្ម។ ខ្ញុំមានមតិផ្តាំផ្ញើ ៣ចំណុច សម្រាប់ជួយគិតទាំងអស់គ្នាថា សាកលវិទ្យាល័យ គឺជាកន្លែងផ្តល់កិត្តិយស កិត្តិស័ព្ទ មោទកភាព និងទំនុកចិត្ត ដល់សាស្ត្រាចារ្យ និងនិស្សិត។ កេរ្តិ៍ឈ្មោះល្អ កើតចេញពី ការខិតខំចូលរួមកសាងទាំងអស់គ្នាឥតឈប់ឈរ។ សាកលវិទ្យាល័យយើងមានប្រវត្តិយូរមកហើយក៏មានកិត្តិនាមល្អបានបណ្ដុះបណ្ដាលថ្នាក់ដឹងនាំវិស័យកសិកម្មជាច្រើន ដូច្នេះយើងត្រូវបន្តកសាងនិងថែរក្សាកេរ្តិ៍ឈ្មោះនេះ។
![](https://kohsantepheapdaily.com.kh/wp-content/uploads/2022/12/735b90b4568125ed6c3f678819b6e058-4.jpg)
ឯកឧត្តមថា សាស្ត្រាចារ្យ គឺជាអ្នកផ្តល់ចំណេះដឹង និងបណ្តុះបណ្តាលធនធានមនុស្ស។ កាលណាធនធានមនុស្សយើងខ្លាំង នោះយើងអាចបង្កើតស្នាដៃ និងអភិវឌ្ឍប្រទេសបានគ្រប់វិស័យ រួមទាំងកសិកម្មផងដែរ។ លោកគ្រូ អ្នកគ្រូ គឺជាអ្នកចាក់សោរបើកទ្វារឱ្យសិស្សគ្រប់រូបបានចូលចាប់យកចំណេះដឹង ហើយនៅពេលបានឃើញសិស្សជោគជ័យ កំលាំងចិត្តពីមោទកភាពរបស់លោកគ្រូ អ្នកគ្រូគឺជារង្វាន់ដ៏ធំបំផុត។
![](https://kohsantepheapdaily.com.kh/wp-content/uploads/2022/12/a3f390d88e4c41f2747bfa2f1b5f87db-5.jpg)
ឯកឧត្តមបានបញ្ជាក់ថា ៖ «និស្សិតត្រូវមានគោលដៅជីវិតច្បាស់លាស់ និងតស៊ូប្រឹងប្រែង ដើម្បីភាពជោគជ័យនៅក្នុងជីវិត។ គ្មានអ្នកណាអាចទទួលខុសត្រូវលើអនាគតរបស់យើងជាងយើងខ្លួនឯងនោះទេ។ យើងត្រូវមានផែនការជាក់លាក់ ត្រូវធ្វើការងារតូចតាចឱ្យបានសម្រេចនិងឱ្យកាន់តែបានល្អ។ បើយើងជាធនធានមនុស្សល្អ មិនខ្វះទេអ្នកត្រូវការយើង»។
![](https://kohsantepheapdaily.com.kh/wp-content/uploads/2022/12/14bfa6bb14875e45bba028a21ed38046-4.jpg)
សូមជម្រាបថា ឯកឧត្តម ឌិត ទីណារដ្ឋមន្ត្រីក្រសួងកសិកម្ម បន្ទាប់ពីចូលកាន់ដំណែងបានប៉ុន្មានលោកបានធ្វើកម្មភាពយ៉ាងសកម្មដោយបានចុះជួបជាមួយប្រជាពលរដ្ឋនៅតាមបណ្តាខេត្តនានា ដើម្បីសួរសុខទុកនឹងចង់ដឹងពីផលវិបាកផ្ទាល់របស់ប្រជាពលរដ្ឋ ដើម្បីស្វែងរកដំណោះស្រាយជូនពួកគាត់៕
ចែករំលែកព័តមាននេះ