ជនជាតិចិនមួយក្រុមបើករថយន្តចំនួន២គ្រឿងបណ្តើរគ្នា រួចដកកាំភ្លើ.ងខ្លីបា.ញ់រះចេញពីក្នុងរថយន្តសំដៅទៅកន្លែងផ្តល់ព័ត៌មានរបស់ខុនដូមួយកន្លែង រួចក៏បើករថយន្ត
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ជនជាតិចិនមួយក្រុមបើករថយន្តចំនួន២គ្រឿងបណ្តើរគ្នា រួចដកកាំភ្លើ.ងខ្លីបាញ់រះចេញពីក្នុងរថយន្តសំដៅទៅកន្លែងផ្តល់ព័ត៌មានរបស់ខុនដូមួយកន្លែង រួចក៏បើករថយន្តគេចខ្លួនបាត់ស្រមោល ដោយបន្សល់ទុកក្រដាសរូបថត ដែលមានពាក្យពេចន៍គំរា.មកំហែងជាច្រើនសន្លឹក បង្កឲ្យអោយមានការភ្ញាក់ផ្អើលដល់សមត្ថកិច្ចចុះអន្តរាគមន៍កាលពីវេលាម៉ោង២និង៤០នាទីរំលងអធ្រាត្រឈានចូលថ្ងៃទី២០ ខែតុលា ឆ្នាំ២០២២ នៅត្រង់ចំណុចខាងមុខអគារខុនដូ Theskyline តាមបណ្ដោយផ្លូវ១៣៤ ស្ថិតក្នុងសង្កាត់វាលវង់ ខណ្ឌ៧មករា។
តាមប្រភពព័ត៌មានបានឲ្យដឹងថា នៅមុនពេលកើតហេតុ គេបានឃើញជនជាតិចិនមួយក្រុមបើកបររថយន្ដចំនួន២គ្រឿង ដោយមួយគ្រឿងម៉ាក ALPHARD និងមួយគ្រឿងទៀតមិនចាំម៉ាកជាប្រភេទពីរបាំង ដែលរថយន្ដទាំងពីរគ្រឿងនោះ គឺបិទស្លាកលេខទាំងពីរគ្រឿង និងបានបើកតាមបណ្តោយផ្លូវ១៣៤ ទិសដៅពីលិចទៅកើត។
ប្រភពដដែលបានបន្តថា លុះមកដល់ចំណុចកើតហេតុ ក៏មានជនជាតិចិនម្នាក់ ក្នុងចំណោម បក្សពួកជាច្រើននាក់ដែលអង្គុយនៅក្នុងរថយន្តប្រភេទពីរបាំងនោះ បានបើកកញ្ចក់រថយន្ត រួចក៏ដកកាំភ្លើ.ងខ្លីមួយបាញ់សំដៅទៅកន្លែងផ្តល់ព័ត៌មានរបស់ខុនដូ Theskyline ជាច្រើនគ្រាប់ បណ្តាលឲ្យត្រូវកញ្ចក់ទ្វារចំនួនពីរផ្ទាំង។ បន្ទាប់មកជនជាតិចិនមួយក្រុមនោះ ក៏បានបាចក្រដាសជាច្រើនសន្លឹកចេញពីក្នុងរថយន្តខ្ទាតរាយប៉ាយពេញផ្លូវ រួចក៏នាំគ្នាបើករថយន្តចេញពីកន្លែងកើតហេតុបាត់ស្រមោលដោយសុវត្ថិភាព។
ប្រភពដដែលបន្តទៀតថា បន្ទាប់មកក៏មានសមត្ថកិច្ចមូលដ្ឋាន ក៏បានចុះមកធ្វើការអន្តរាគមន៍ភ្លាមៗ និងបានប្រមូលក្រដាសដែលបន្សល់ទុកពីក្រុមជនសង្ស័យ ដែលជាក្រដាសមានរូបថតមនុស្សប្រុសស្រី៥ទៅ៦នាក់ និងបានសរសេរជាអក្សរចិន អក្សរវៀតណាម និងអក្សរខ្មែរថា «ប្រយ័ត្ននៅតាមផ្លូវ» និងប្រមូលបានសំបកគ្រាប់ចំនួន១៦គ្រាប់។
ក្រោយពេលកើតហេតុ សមត្ថកិច្ចមូលដ្ឋានក៏បានប្រមូលវត្ថុតាង យកទៅរក្សាទុករង់ចាំធ្វើការស្រាវជ្រាវតាមចាប់ជនសង្ស័យទាំងអស់នោះយកមកផ្តន្ទាទោសទៅតាមផ្លូវច្បាប់នៅពេលក្រោយជាបន្តទៀត៕
ចែករំលែកព័តមាននេះ