មន្ត្រីនគរបាលម្នាក់ បើកឡានរេចង្កូតជ្រុលបុ.កបង្កាន់ដៃស្ពានព្រះមុន្នីវង្សចាស់
- ភ្នំពេញ
រាជធានីភ្នំពេញ ៖ បុរសជាមន្ត្រីនគរបាលម្នាក់ បានបើករថយន្តមួយគ្រឿង ម៉ាក Hilux Vigo ពាក់
រាជធានីភ្នំពេញ ៖ បុរសជាមន្ត្រីនគរបាលម្នាក់ បានបើករថយន្តមួយគ្រឿង ម៉ាក Hilux Vigo ពាក់ស្លាកលេខនគរបាល ដោយមិនប្រយ័ត្នជ្រុលចង្កូតរេទៅបុ.កនឹងបង្កាន់ដៃស្ពានព្រះមុន្នីវង្សចាស់យ៉ាងពេញទំហឹង បណ្តាលអោយរងការខូចខាត បង្កអោយមានការភ្ញាក់ផ្អើលឡើងកាលពីវេលាម៉ោង៨យប់ថ្ងៃទី២៨ ខែកញ្ញា ឆ្នាំ២០២២ នៅចំណុចគល់ស្ពានព្រះមុន្នីវង្សចាស់ត្រើយខាងកើត ស្ថិតក្នុងសង្កាត់ច្បារអំពៅ២ ខណ្ឌច្បារអំពៅ រាជធានីភ្នំពេញ ។
យោងតាមប្រភពព័ត៌មានពីសាក្សីនៅកន្លែងកើតហេតុ អោយដឹងថា មុនកើតហេតុ គេសង្កេតឃើញរថយន្តបង្ក ម៉ាក Hilux Vigo មួយគ្រឿង ពណ៌ខ្មៅ ពាក់ស្លាកលេខ នគរបាល 2-7070 បើកបរដោយបុរសជាមន្ត្រីនគរបាលម្នាក់ ធ្វើដំណើរតាមបណ្តោយផ្លូវជាតិលេខ១ ឆ្ពោះសំដៅឆ្លងកាត់ស្ពានព្រះមុន្នីវង្សចាស់ខាងលើ ។ លុះមកដល់ចំណុចកើតហេតុ មិនដឹងថាមានបញ្ហាអ្វីនោះទេ ក៏ស្រាប់តែរថយន្តនោះរេចង្កូតទៅខាងឆ្វេងដៃជ្រុលបុ.កបង្កាន់ដៃស្ពានពេញទំហឹង បណ្តាលរថយន្តគៀបជាប់នឹងបង្កាន់ដៃទៅមុខលែងរួច ហើយបង្កាន់ដៃស្ពានចំនួន២ផ្ទាំងត្រូវបាក់ រងការខូចខាត ។
ភ្លាមៗនោះ បុរសជាម្ចាស់រថយន្តបានបើកទ្វាររថយន្តចេញក្រៅ នឹងបានចាកចេញពីកន្លែងកើតហេតុ បាត់ស្រមោលសូន្យ ។ តាមប្រភពពីសាក្សីដដែលអោយដឹងថា ផ្អែកតាមអាការៈខាងក្រៅរបស់បុរសជាម្ចាស់រថយន្ត គឺមានអាការៈហាក់ស្រវឹង ព្រោះគាត់ដើរលែងត្រង់ផ្លូវ ។
យ៉ាងណាមិញ ក្រោយកើតហេតុ កម្លាំងសមត្ថកិច្ចមូលដ្ឋាន បានចុះដល់ទីតាំងខាងលើ នឹងបានសហការជាមួយជំនាញ ចុះអន្តរាគមន៍ធ្វើការវាស់វែង ស្ទូចយករថយន្តបង្កខាងលើ ទៅរក្សាទុកនៅ ការិយាល័យនគរបាលចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ រងចាំដោះស្រាយទៅតាមនីតិវិធីច្បាប់នៅពេលក្រោយ ៕
ចែករំលែកព័តមាននេះ