រាជធានីភ្នំពេញ ៖ ស្ត្រីនៅពេលបច្ចុប្បន្ននេះ នៅតែជួបការប្រឈមនឹងឧសបគ្គជាច្រើន រួមមានផ្នែកនយោបាយ និងកិច្ចសាធារណៈ ទោះបីជាចំនួនស្ត្រីមានជាង៥០ភាគរយនៃចំនួនប្រជាជនសរុបក៏ដោយ ។ នេះតាមការបញ្ជាក់របស់រដ្ឋមន្ត្រីក្រសួងកិច្ចការនារី ។
ថ្លែងក្នុងវេទិការជាតិស្តីពី «ស្ត្រីក្នុងភាពជាអ្នកដឹកនាំ និងអភិបាលកិច្ច»នាព្រឹកថ្ងៃទី១៧ ខែឧសភា នៅសណ្ឋាគាសុខា លោកជំទាវ អ៊ឹង កន្ថាផាវី រដ្ឋមន្ត្រីក្រសួងកិច្ចការនារីលើកឡើងថា យោងតាមលទ្ធផលនៃការអនុវត្តន៍ការងារលើកកម្ពស់សមភាពយេនឌ័រ និងភាពអង់អាចដល់ស្ត្រី និងផ្អែកតាមការសិក្សាស្រាវជ្រាវ នៅក្នុងពិភពលោកភ័ស្តុតាងមួយចំនួនបានបង្ហាញយ៉ាងច្បាស់ថា ការចូលរួមស្របច្បាប់ និងពេញលេញរបស់ស្ត្រីនៅក្នុងការធ្វើសេចក្តីសម្រេច និងអភិបាលកិច្ច អាចធ្វើឱ្យគោលនយោបាយច្បាប់ និងកម្មវិធីនានាកាន់តែឆ្លើយតប ទៅនឹងតម្រូវការរបស់ប្រជាជនទាំងអស់ ជាពិសេសលើបញ្ហាសុខុមាលភាពគ្រួសារ និងសង្គមដែលជាមូលដ្ឋានគ្រឹះក្នុងការកាត់បន្ថយភាពក្រីក្រឈានឆ្ពោះទៅរកការអភិវឌ្ឍប្រកបដោយប៊ីរភាព ។
លោកជំទាវថា ការបង្កើនចំនួនស្ត្រីនៅក្នុងតួនាទីធ្វើសេចក្ដីសម្រេចនៅគ្រប់លំដាប់ថ្នាក់អាចធ្វើទៅបាន លុះត្រាតែមានការគាំទ្រ និងការផ្ដល់ឱកាសឱ្យស្ត្រីចូលរួមមានជាអាទិ៍ ៖ ការគាំទ្រផ្នែកនយោបាយ គោលការណ៍នានា ការពង្រឹងសមត្ថភាពស្ត្រី និងការផ្ដល់ធនធាន ដើម្បីធានាថា ស្ត្រីដែលបានទទួលតួនាទីជាអ្នកដឹកនាំមានលទ្ធភាពគ្រប់គ្រាន់ក្នុងការបំពេញតួនាទី និងភារកិច្ចរបស់ពួកគេឱ្យមានប្រសិទ្ធភាព ។
លោកជំទាវបញ្ជាក់ថា ៖«បច្ចុប្បន្នស្ត្រីនៅប្រឈមទៅនឹងឧបសគ្គជាច្រើនទៀត នៅក្នុងការចូលរួមផ្នែកនយោបាយ និងធ្វើសេចក្តីសម្រេច ហើយកម្រិតនៃការចូលរួមរបស់ពួកគេនៅទាបនៅឡើយ ។ ឧបសគ្គទាំងនេះរួមមាន ៖ ឥរិយាបថសង្គមនៅរើសអើងលើស្ត្រីការទទួលបានការសិក្សាអប់រំនៅមានកម្រិត បន្ទុកធ្ងន់ធ្ងរលើការទទួលខុសត្រូវក្នុងគ្រួសារកង្វះខាតការគាំទ្រផ្នែកហិរញ្ញវត្ថុ និងការគាំទ្រពីក្រុមគ្រួសារ ព្រមទាំងទស្សនៈអវិជ្ជមានចំពោះកិច្ចការនយោបាយក្នុងចំណោមស្រី្តខ្លួនឯងដែលធ្វើឱ្យស្ត្រីមិនហ៊ានឈរឈ្មោះបោះឆ្នោត ឬទទួលតួនាទីតាមការចាត់តាំង ។
ហេតុដូច្នេះហើយ ទោះបីជាស្ត្រីមានចំនួនជាង៥០%នៃប្រជាជនសរុបក៏ដោយ ក៏ស្ត្រីជាអ្នក ដឹកនាំផ្នែកនយោបាយ និងក្នុងកិច្ចការសាធារណៈបច្ចុប្បន្ន មិនទាន់មានសមាមាត្រជាមួយនឹងភាគរយនេះនៅឡើយ»។
ជាមួយគ្នានោះដែរ លោកជំទាវថា រាជរដ្ឋាភិបាលបានណែនាំឱ្យគិតគូរបញ្ចូលឱ្យមានស្ត្រីនៅគ្រប់ប្រអប់តួនាទីធ្វើសេចក្តីសម្រេចនៅក្នុងក្រសួង-ស្ថាប័ន និងរដ្ឋបាលថ្នាក់ ក្រោមជាតិ រួមទាំងនៅក្នុងរដ្ឋបាលឃុំ សង្កាត់ និងតាមភូមិជាដើម ។ នៅក្នុងស្ថាប័នរដ្ឋ គិតគូរឱ្យមានការជ្រើសរើសមន្ត្រីមុខងារ សាធារណៈថ្មី ត្រូវមានចំនួនស្ត្រីចាប់ពី២០% ទៅ៥០% ។
ក្រសួង-ស្ថាប័ន បានរៀបចំយន្តការ និងក្រុមការងារយេនឌ័រនៅតាមវិស័យ និងនៅថ្នាក់ក្រោមជាតិ ព្រមទាំងបញ្ចូលកម្មវិធី អភិវឌ្ឍន៍ភាពជាអ្នកដឹកនាំរបស់ស្ត្រីក្នុងស្ថាប័ន និងដែនរដ្ឋបាលរបស់ខ្លួននីមួយៗ ។ សមទ្ធិផលដ៏ធំធេង និងមានតម្លៃដ៏ថ្លៃថ្លាទាំងអស់នេះត្រូវតែពង្រឹងបន្ថែមទៀត ដើម្បីជាឧត្តមប្រយោជន៍ និងការទទួលស្គាល់ពីតម្លៃនៃការចូលរួមរបស់ធនធានមនុស្សដែលមានជាងពាក់កណ្តាល និងជាដៃគូមិនអាចខ្វះបានជាមួយនឹងបុរសក្នុងការចូលរួមអភិវឌ្ឍន៍សេដ្ឋកិច្ច និងសង្គមជាតិ ។
ចំណែកលោកស្រីកែវ មុំ ប្រធានសមាគមន៍សហគ្រិនស្ត្រីកម្ពុជាបានលើកឡើងថា មិនថា ពិភពលោកទេ សូម្បីតែកម្ពុជាបានលើកតម្កើងស្ត្រីក្នុងការចូលរួមធ្វើការងារជាមួយបុរស ។ លោកស្រីបញ្ជាក់ថា ៖«យើងសង្កេតឃើញថា ស្ត្រីបានចូលរួមក្នុងការធ្វើអាជីវកម្មចំនួនច្រើន ប៉ុន្តែយើងឃើញថា អាជីវកម្មនៅមានកម្រិតនៅឡើយ ។
ករណីដោយសារគាត់ពិបាកក្នុងការពង្រីកខ្លួនឲ្យទៅជាសហគ្រាសខ្នាតមធ្យម និងធំនោះ គឺគាត់មានបញ្ហាខ្លួនឯងច្រើន (រវល់ច្រើន)»។ ជាមួយគ្នានោះដែរ លោកស្រីខាងក្រសួងកិច្ចកានារី និងរាជដ្ឋាភិបាលបានកៀងគរបណ្តុះបណ្តាលដល់ស្ត្រីឲ្យមានចំណេះចំនាញ និងបទពិសោធន៍ និងពង្រឹងឲ្យមានភាពអង់អាចក្លាហានរបស់គាត់ឲ្យចូលរួមក្នុងសង្គមបានច្រើនដែរ ៕
ចែករំលែកព័តមាននេះ