រាជធានីភ្នំពេញ ៖ ថ្លែងក្នុងកិច្ចប្រជុំប្រចាំសប្ដាហ៍ជាមួយថ្នាក់ដឹកនាំ នៃអគ្គនាយកដ្ឋានទាំង៥ នៅព្រឹកថ្ងៃទី២២ ខែកុម្ភៈ ឆ្នាំ ២០២១នេះ ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន បានធ្វើការបកស្រាយ ទាក់ទងទៅនឹងការផ្សព្វផ្សាយព័ត៌មានមិនពិតថា កម្ពុជាបានលាក់បាំងព័ត៌មាន ពីការស្លាប់ នៃអ្នកកើតជំងឺកូវីដ-១៩ ។
ឯកឧត្តម ខៀវ កាញារីទ្ធ ថ្លែងថា នេះជាព័ត៌មានមិនពិត ព្រោះថា កិច្ចការងារនេះ ក្រសួងសុខាភិបាលកម្ពុជា បានសហការយ៉ាងជិតស្និតជាមួយ គណៈកម្មាធិការត្រួតពិនិត្យជំងឺឆ្លង សហរដ្ឋអាមេរិក CDC និងអង្គការសុខភាពពិភពលោកប្រចាំកម្ពុជា ដូច្នេះមិនអាចលាក់បាំងពីការស្លាប់ដោយ សារជំងឺកូវីដ-១៩ នេះបានឡើយ ។
ឯកឧត្តម បានបញ្ជាក់ថា គណៈកម្មាធិការត្រួតពិនិត្យជំងឺ ឆ្លងសហរដ្ឋអាមេរិក CDC គេធ្វើកិច្ចការងារនេះច្បាស់លាស់ណាស់ មិនអាចភូតកុហក រដ្ឋាភិបាលរបស់គេនោះទេ ។ ប្រការនេះហើយដែល កម្ពុជាមានសាក្សីសំខាន់ចំនួន២ គឺ អង្គការសុខភាពពិភពលោក និងគណៈកម្មាធិការត្រួតពិនិត្យជំងឺឆ្លង សហរដ្ឋអាមេរិក CDC ហើយ ក្រសួងសុខាភិបាលកម្ពុជា មិនអាចធ្វើតែម្នាក់ឯង ក្នុងកិច្ចការប្រយុទ្ធប្រឆាំងជំងឺកូវីដ ១៩ នេះបាននោះទេ ។ ស្ថាប័នអន្តរជាតិធំៗ ២នេះ ជាមូលដ្ឋានក្នុងការបង្ហាញថា កម្ពុជាមិនបាន លាក់បាំងព័ត៌មាននោះទេ ៕
ចែករំលែកព័តមាននេះ