ខេត្តកណ្តាល៖ តាមរយៈកាមេរ៉ាសុវត្ថិភាព សមត្ថកិច្ចបានឃាត់ខ្លួនជនសង្ស័យម្នាក់ និង ម្នាក់ទៀត កំពុងរត់គេចខ្លួន ក្នុងករណីពួកគេសកម្មភាពឆក់កាបូបរបស់ជនរងគ្រោះជាប្តីប្រពន្ធ ទើបចេញពីមន្ទីរពេទ្យ ។ ហេតុការណ៍ឆក់កាបូបនេះ កើតឡើងកាលពីរសៀលថ្ងៃទី២ ធ្នូ កន្លងទៅ ស្ថិតនៅចំណុចផ្លូវបេតុង ភូមិត្រពាំងក្រពើ ឃុំក្រាំងម្កាក់ ស្រុកអង្គស្នួល ខេត្តកណ្ដាល ។
សេចក្តីរាយការណ៍បន្តថា ម្ចាស់កាបូបមានឈ្មោះ ខៀវ ចរិយា ភេទស្រី អាយុ៥៥ឆ្នាំ ។ ចំណែកជនសង្ស័យឃាត់ខ្លួនបានឈ្មោះ ប៊ិន សុធិ ហៅតុង ភេទប្រុស អាយុ១៧ឆ្នាំ ។
តាមមន្ត្រីប៉ូលិសស្រុកអង្គស្នួលបានអោយដឹងថា នៅមុនពេលកើតហេតុ ជនរងគ្រោះនិងស្វាមី បានជិះម៉ូតូឌុបគ្នាចេញពីមន្ទីរពេទ្យ នៅខេត្តកំពង់ស្ពឺ ហើយជិះឆ្ពោះទៅផ្ទះនៅភូមិខ្ចៅ សង្កាត់បឹងធំ ខណ្ឌកំបូល រាជធានីភ្នំពេញ ។
នៅពេលជិះដល់ចំណុចកើតហេតុ ស្រាប់តែមានម៉ូតូ២គ្រឿងជិះគ្នា២នាក់ បានជិះមកពីក្រោយ ហើយម៉ូតូម៉ាក និច ពណ៌សលាយពណ៌លឿង បានវ៉ាខាងស្ដាំរួចលូកដៃទៅឆក់កាបូបស្ពាយចំហៀងរបស់ជនរងគ្រោះបាន ហើយក៏នាំគ្នាជិះទៅទិសខាងត្បូងបាត់ទៅ ។
ជនរងគ្រោះស្រែកថា ចោរៗនិងជិះដេញពីក្រោយតែដេញមិនទាន់ឡើយ។ តាមការឆែកកាមរ៉ាសុវត្តិភាពនៅកន្លែងកើតហេតុ បានឃើញភិនភាគជនសង្ស័យនិងម៉ូតូរបស់ជនសង្ស័យ ទើបកំណត់មុខសញ្ញាបានតែម្តង ។
ពេលនេះ សមត្ថកិច្ចបានបញ្ជូនជនសង្ស័យទៅតុលាការ ដើម្បីចាត់ការតាមផ្លូវច្បាប់ហើយ ។
ចែករំលែកព័តមាននេះ