រាជធានីភ្នំពេញ ៖ ជនសង្ស័យចំនួន២នាក់ត្រូវបានកម្លាំងនគរបាលប៉ុស្តិ៍ផ្សារថ្មីទី២ ចាប់ឃាត់ខ្លួន ក្រោយពីពួកគេបាននាំគ្នាជិះម៉ូតូមួយគ្រឿងធ្វើសកម្មភាពឆក់ទូរស័ព្ទដៃពីបុរសវ័យចំណាស់ម្នាក់ជាជនបរទេស ហើយព្យាយាមរត់គេចខ្លួន ក៏ត្រូវកម្លាំងល្បាតដេញចាប់បានហើយ ពួកគេប្រាប់ថា «ធ្លាប់នាំគ្នាឆក់នៅក្នុងភូមិសាស្ត្រខណ្ឌដូនពេញចំនួន៨លើកមកហើយ»។ ករណីនេះបានកើតឡើងកាលពីម៉ោង៩និង៣០នាទីព្រឹក ថ្ងៃទី៤ ខែតុលា ឆ្នាំ ២០២០ នៅចំណុចបេនឡានបាត់ដំបង(ខាងលិចផ្សារធំថ្មី) ស្ថិតក្នុងសង្កាត់ផ្សារថ្មីទី២ ខណ្ឌដូនពេញ។
តាមប្រភពពីនគរបាលបានប្រាប់ឱ្យដឹងថា បុរសជាជនសង្ស័យខាងលើ ១-ឈ្មោះ សុង ពេជ្រ អាយុ៣១ឆ្នាំ មុខរបរជាកម្មករលីសែងឥវ៉ាន់នៅបេនឡាន មានទីលំនៅមិននពិតប្រាកដ និង២-ឈ្មោះ ស្រ៊ុន ណារ៉ុង អាយុ២៥ឆ្នាំ មុខរបរមិនពិតប្រាកដ មានទីលំនៅនៅខេត្តកណ្តាល។
នគរបាលបន្តថា មុនពេលកើតហេតុ មានបុរសវ័យចំណាស់ជាជនបរទេសម្នាក់បានដើរនៅចំណុចបេនឡានខាងលើ ដោយដាក់ទូរស័ព្ទម៉ាក IphoneX ពណ៌ស មួយគ្រឿង នៅក្នុងហោប៉ៅអាវខាងមុខ ហើយក៏ស្រាប់តែលេចមុខជនសង្ស័យទាំង២នាក់ជិះម៉ូតូម៉ាក ICON ពណ៌ស្វាយលាយខ្មៅ ពាក់ស្លាកលេខភ្នំពេញ១AG-៧១៣៣ មួយគ្រឿងឌុបគ្នាមកអែបក្បែរ និងឆក់យកទូរស័ព្ទតែម្តង។
ប្រភពដដែលប្រាប់បន្តទៀតថា ពេលដែលក្រុមជនសង្ស័យឆក់យកទូរស័ព្ទដៃពីក្នុងហោប៉ៅអាវរបស់ជនរងគ្រោះបានហើយក៏នាំគ្នាព្យាយាមជិះម៉ូតូរត់គេចខ្លួន តែត្រូវបុរសជាជនបរទេសបានស្រែកឆោឡោឡើង ស្របពេលនោះកម្លាំងល្បាតនៅក្បែរនោះផង បានឃើញក៏ការធ្វើអន្តរាគមន៍ដេញចាប់បានភ្លាមៗតែម្តង។
ប្រភពដដែលបញ្ជាក់ថា ក្រុមជនសង្ស័យទាំងពីរនាក់ខាងលើនេះ គឺសុទ្ធតែជាមុខសញ្ញាដែលតែងតែនាំគ្នាធ្វើសកម្មភាពឆក់យ៉ាងសកម្មនៅក្នុងភូមិសាស្ត្រខណ្ឌដូនពេញនាពេលកន្លងមក ហើយពួកគេក៏បានសារភាពថា «ពួកគេធ្លាប់នាំគ្នាធ្វើសកម្មភាពឆក់ចំនួន៨លើកមកហើយ» លុះដល់លើកទី៩នេះ ក៏ត្រូវបានកម្លាំងសមត្ថកិច្ចចាប់ឃាត់ខ្លួនបានតែម្តង។
ក្រោយពេលកើតហេតុ កម្លាំងមានសមត្ថកិច្ចនគរបាលប៉ុស្តិ៍ផ្សារថ្មីទី២ ក៏បានធ្វើការប្រគល់ទូរស័ព្ទដៃម៉ាក IphoneX ទៅឱ្យបុរសជាជនបរទេសវិញ ចំណែកឯបុរសជនសង្ស័យជាចោរឆក់ទាំង២នាក់ រួមទាំងម៉ូតូមួយគ្រឿងដែលជិះធ្វើសកម្មភាព ត្រូវបានបញ្ជូនទៅកាន់អធិការដ្ឋាននគរបាលខណ្ឌដូនពេញ ដើម្បីចាត់ការទៅតាមនីតិវិធីជាបន្តទៅទៀត។
ចែករំលែកព័តមាននេះ