រាជធានីភ្នំពេញ ៖ រដ្ឋបាលខេត្តព្រះសីហនុបានប្រាប់ទៅប្រជាពលរដ្ឋចំនួន ២៣ គ្រួសារដែលរស់នៅតំបន់ភ្នំត្រង៉ោល ភូមិចំណោតរាម ឃុំបិតត្រាំង ស្រុកព្រៃនប់ ខេត្តព្រះសីហនុ ឲ្យចាកចេញពីតំបន់ខាងលើនេះជាបន្ទាន់…
រាជធានីភ្នំពេញ ៖ រដ្ឋបាលខេត្តព្រះសីហនុបានប្រាប់ទៅប្រជាពលរដ្ឋចំនួន ២៣ គ្រួសារដែលរស់នៅតំបន់ភ្នំត្រង៉ោល ភូមិចំណោតរាម ឃុំបិតត្រាំង ស្រុកព្រៃនប់ ខេត្តព្រះសីហនុ ឲ្យចាកចេញពីតំបន់ខាងលើនេះជាបន្ទាន់ ចាប់ពីថ្ងៃទី ៤ ខែសីហា និងត្រូវប្រគល់ដីទៅក្រសួងបរិស្ថានគ្រប់គ្រងវិញ មិនអញ្ចឹងទេពលរដ្ឋទាំង ២៣គ្រួសារនឹងត្រូវប្រឈមមុខចំពោះផ្លូវច្បាប់ ជុំវិញការកាន់កាប់ រុករាន ឆ្ការ ដុត និងឈួសឆាយដីព្រៃជាកម្មសិទ្ធឯកជន ។
នេះបើយោងតាមសេចក្តីជូនដំណឹងរបស់រដ្ឋបាលខេត្តព្រះសីហនុ ចុះថ្ងៃទី៤ សីហា ឆ្នាំ២០២០ និងចុះហត្ថលេខាដោយអភិបាលខេត្តលោក គួច ចំរើន ។
ប្រភពដដែលបាននិយាយថា តំបន់ភ្នំត្រង៉ោលដែលជាទីតាំងដីដែលពលរដ្ឋ ២៣ គ្រួសារ កំពុងកាន់កាប់នេះ គឺស្ថិតនៅក្នុងអនុក្រឹត្យលេខ ១១៦ អនក្រ.បក ចុះថ្ងៃទី០៥ មិថុនា ឆ្នាំ២០១៦ ស្តីពីការកែសម្រួលមាត្រា ១ នៃអនុក្រឹត្យលេខ ៧៨ អនក្រ.បក ចុះថ្ងៃទី ០៩ ឧសភា ឆ្នាំ ២០១៦ ស្តីពីការបង្កើតតំបន់ប្រើប្រាស់ច្រើនយ៉ាងព្រែកទឹកសាបក្បាលឆាយ ។
រដ្ឋបាលខេត្តព្រះសីហនុបានបញ្ជាក់ថា បងប្អូនត្រូវចាកចេញពីតំបន់ខាងលើនិងប្រគល់ដីជូនក្រសួងបរិស្ថានគ្រប់គ្រងវិញ ព្រោះថា «ការកាន់កាប់ រុករាន ឆ្ការ ដុត និងឈួសឆាយដីព្រៃជាកម្មសិទ្ធឯកជន ត្រូវផន្ទាទោសជាបទល្មើសធនធានធម្មជាតិថ្នាក់ទី ៤ ដោយត្រូវដាក់ពន្ធនាគារពី ៥ ទៅ ១០ ឆ្នាំ និងពិន័យជាប្រាក់ពី ១៥ លាន ទៅ ១៥០ លានរៀល ។
រដ្ឋបាលខេត្តព្រះសីហនុបានព្រមានថា «ករណីមិនព្រមចាកចេញ រដ្ឋបាលខេត្តនឹងចាត់វិធានការតាមវិធានផ្លូវច្បាប់ជាធរមាន» ៕
ចែករំលែកព័តមាននេះ