មូលហេតុអ្វីបានជាមហាសេដ្ឋី Bill Gates ដើរចេញពី Microsoft ?
ពេលដែលលោកមហាសេដ្ឋី ប៊ីល ហ្គេតស៍ (Bill Gates) និងមិត្តជិតស្និទ្ធបង្កើតបានក្រុមហ៊ុន Microsoft នៅឆ្នាំ ១៩៧៥ លោក…
ពេលដែលលោកមហាសេដ្ឋី ប៊ីល ហ្គេតស៍ (Bill Gates) និងមិត្តជិតស្និទ្ធបង្កើតបានក្រុមហ៊ុន Microsoft នៅឆ្នាំ ១៩៧៥ លោក ហ្គេតស៍ បានលះបង់ជាច្រើនដើម្បីធ្វើឲ្យក្រុមហ៊ុនជោគជ័យ ។ លោកធ្លាប់បានចែករំលែកកាលពីឆ្នាំមុនថា ពេលដែលលោកចាប់ផ្តើមក្រុមហ៊ុនដំបូង លោកមិនចូលចិត្តការសម្រាកវិស្សមកាល ឬការសម្រាកនៅថ្ងៃចុងសប្តាហ៍ទេ ។
ពេលនោះ លោកជាអ្នកដែរសរសេរកូដភាគច្រើនសម្រាប់កម្មវិធីដែលបានបង្កើតមក ហើយទោះជាអ្នកដទៃបានសរសេរពិតមែនក្តីក៏លោកត្រូវសរសេរវាឡើងវិញដែរ ។ លោកបានសម្ភាសន៍បុគ្គលិកទាំងអស់ដែលក្រុមហ៊ុនជ្រើសរើសដោយផ្ទាល់ ហើយលោកធ្លាប់ទន្ទេញផ្លាកលេខរថយន្តរបស់បុគ្គលិកទៀតដើម្បីដឹងថា នរណាមកដល់ការិយាល័យមុន និងនរណាចេញពីធ្វើការយឺតជាងគេ ។
ប៉ុន្តែលោកបានរៀនដើរចេញពីក្រុមហ៊ុនបន្តិចម្តងៗ ។ លោកធ្លាប់បាននិយាយកាលពីឆ្នាំ ២០១៨ នៅសាកលវិទ្យាល័យ Harvard ថា ប្រសិនបើអ្នកចង់ជះឥទ្ធិពល ការបែងចែកការងារពិតជាសំខាន់ណាស់ ។
លោកបានបន្ថែមថា ពេលដែល Microsoft មានបុគ្គលិកប្រមាណ ១០នាក់ លោកបានដឹងខ្លួនថាលោកមិនអាចសរសេរកូដរបស់បុគ្គលិកទាំងអស់ឡើងវិញទេ ហើយវាពិតជាពិបាកណាស់សម្រាប់លោកផ្ទាល់ ។ យ៉ាងណាក្តីលោកនៅតែសម្ភាសន៍បុគ្គលិកទាំងអស់ផ្ទាល់ដែរមុនពេលសម្រេចចិត្តជ្រើសរើស ព្រោះលោកអាចមើលគំរូកូដរបស់ពួកគេបាន ។
លោកបាននិយាយថា ការធ្វើដូច្នេះបានអនុញ្ញាតឲ្យ Microsoft រីកធំធាត់ដល់មានបុគ្គលិកប្រមាណ ៤០នាក់ ប៉ុន្តែតម្រូវការសម្រាប់ផលិតផល Microsoft បានកើនឡើងយ៉ាងលឿនហួសពីសមត្ថភាពរបស់ក្រុមហ៊ុន ។
ដោយហេតុដូចនេះទើបលោក ហ្គេតស៍ បានជ្រើសរើសលោក ស្ទីវ បលមើ (Steve Ballmer) នៅឆ្នាំ ១៩៨០ ដើម្បីជួយក្រុមហ៊ុន និងជួយជ្រើសរើសបុគ្គលិកថ្មីៗ ។ លោកបានបន្តរៀនបែងចែកការងារឲ្យទៅបុគ្គលិកដែលលោកទុកចិត្តតាំងពីពេលនោះមក ។
បច្ចុប្បន្ន Microsoft មានបុគ្គលិកប្រមាណ ១៤៤,០០០នាក់ និងរកចំណូលបាន ១៣៨.៦ប៊ីលានដុល្លារកាលពីឆ្នាំមុន ។ លោកបន្តកាន់តំណែងជានាយកប្រតិបត្តិរបស់ក្រុមហ៊ុនរហូតដល់ឆ្នាំ ២០០០ ដែលជាពេលលោកលាលែងពីតំណែង តែបន្តនៅជាសមាជិកក្រុមនាយកគ្រប់គ្រងក្រុមហ៊ុនរហូតដល់ដើមឆ្នាំនេះដែលលោកបានប្រកាសថា លោកក៏ចាកចេញពីក្រុមនាយកនេះដែរដើម្បីផ្តោតស្មារតី និងកម្លាំងលើមូលនិធិសប្បុរសធម៌ Bill and Melinda Gates របស់លោកវិញ ៕
ចែករំលែកព័តមាននេះ