ខេត្តពោធិ៍សាត់ ៖ ប្រេងម្រះព្រៅភ្នំចំនួន២៨ប៊ីដុង ស្មើនឹង៩៧៧,៣គីឡូក្រាម និងរថយន្តម៉ាក TITAN ពណ៌ខៀវមួយគ្រឿងពាក់ ស្លាកលេខច០២៣៣ ភព២ ត្រូវបានមន្ត្រីមេព្រៃចាប់ឃាត់ ទុកកាលពីថ្ងៃទី២៩ សីហា ឆ្នាំ២០១០ វេលាម៉ោង១និង៣០នាទីរសៀល ត្រង់ចំណុចភូមិកំពែង ឃុំព្រងិល ស្រុកភ្នំក្រវាញ ។ លោកជា ហួត នាយផ្នែករដ្ឋបាលព្រៃឈើស្រុកភ្នំក្រវាញឱ្យដឹងថា ជាមួយគ្នានឹងការចាប់ឃាត់រថយន្ត និងប្រេងម្រះព្រៅភ្នំនេះ សមត្ថកិច្ចក៏បានឃាត់ខ្លួនអ្នកបើកបររថយន្តឈ្មោះសុខ វិចិត្ត ភេទប្រុស អាយុ២៦ឆ្នាំ មានទីលំនៅភូមិដើមច័ន្ទ សង្កាត់ច្បារអំពៅ ខណ្ឌមានជ័យ រាជធានីភ្នំពេញផងដែរ ។
ទាក់ទិននឹងសកម្មភាពបង្ក្រាបបទល្មើសដឹកប្រេងម្រះព្រៅភ្នំនេះ លោកបានឱ្យដឹងថា កន្លងមកភ្នាក់ងារធ្លាប់ផ្តល់ព័ត៌មានមកថា គេតែងឃើញរថយន្តខាងលើដឹកឥដ្ឋពីទីរួមខេត្តពោធិ៍សាត់ឡើងទៅលើ ប៉ុន្តែមិនដឹងដឹកយកទៅដាក់នៅកន្លែងណាប្រាកដ លុះពេលត្រឡប់មកវិញរថយន្តដដែលនេះតែងតែលួចផ្ទុកឈើគ្រញូង ឬប្រេងម្រះព្រៅភ្នំមិនដែលខាន ។ លោកជា ហួត បន្តថា បន្ទាប់ពីដឹងព័ត៌មាននេះភ្លាម រូបលោកបានចាត់វិធានការតាមឃ្លាំមើលសកម្មភាពរថយន្តនោះគ្រប់ពេលវេលា លុះនៅថ្ងៃទី២៩ សីហា ឆ្នាំ២០១០ ឃើញរថយន្តខាងលើដឹកឥដ្ឋពេញឡើងទៅលើទៀតមែន ហើយក៏នាំគ្នាចាំពួនស្ទាក់ពេលត្រឡប់មកវិញ ។
នៅវេលាម៉ោងប្រហែល១រសៀលទើបរថយន្តនោះត្រឡប់មកវិញ មិនមានឃើញដឹកអ្វីទេ ប៉ុន្តែធុំក្លិនប្រេងម្រះព្រៅឡើងឆួល ។ ដោយមានការសង្ស័យលោកបានដឹកនាំកំលាំងដេញតាមរថយន្តនោះជាប់រហូត លុះមកដល់ត្រង់ ចំណុចឃុំព្រងិល ទើបកំលាំងស្ទាក់ចាប់បាន ។ ពេលសមត្ថកិច្ចសុំត្រួតពិនិត្យមើលក៏ឃើញប៊ីដុងប្រេងម្រះព្រៅភ្នំចំនួន២៨ប៊ីដុង ដែលគេផ្សារដែកធ្វើជាឃ្លុបដាក់តំរៀបគ្នាពីក្រោមបាត រថយន្តដែលមើលទៅឃើញទ្រុងរថយន្តទទេរាបស្មើមិនអាចមើលដឹងទេ ។ ភ្លាមៗនោះសមត្ថកិច្ចក៏ចាប់ឃាត់ខ្លួនអ្នកបើកបរទាំងរថយន្ត និងប្រេងម្រះព្រៅបញ្ជូនទៅកាន់ខណ្ឌរដ្ឋបាលព្រៃឈើខេត្តពោធិ៍សាត់តែម្តង ។ នៅថ្ងៃទី៣១ សីហា ឆ្នាំ២០១០ ជនសង្ស័យដែលដឹកជញ្ជូនប្រេងម្រះព្រៅភ្នំខុសច្បាប់នោះត្រូវបានបញ្ជូនទៅកាន់សាលាដំបូងខេត្តពោធិ៍សាត់ចាត់ការតាមនីតិវិធី ៕
ចែករំលែកព័តមាននេះ