មនុស្សយ៉ាងតិច៥៧នាក់បានត្រូវស្លាប់កាលពីថ្ងៃទី២២ មេសា កន្លងមកនេះដោយសាររថភ្លើងមួយធ្លាក់ពីផ្លូវដែកនៅភាគអាគ្នេយ៍នៃសាធារណរដ្ឋប្រជាធិបតេយ្យកុងហ្គោ បុ៉ន្តែកន្លែងកើតមានគ្រោះថ្នាក់នេះពិបាកទៅដល់នាំឱ្យគេយល់ថា ចំនួនអ្នកស្លាប់មានច្រើនជាងនេះទៀត ព្រោះតែការជួយសង្គ្រោះមានភាពយឺតយ៉ាវ ។
សោកនាដកម្មនេះកើតមាននៅកន្លែងមួយចម្ងាយប្រមាណជា៦៥គីឡូម៉ែត្រភាគខាងជើងក្រុងកាមីណា ជាមូលដ្ឋានមួយនៅចម្ងាយប្រមាណជា៦០០គីឡូម៉ែត្រភាគពាយ័ព្យទីក្រុងលូបុមបាស៊ី ទីប្រជុំជននៃខេត្តសំបូររ៉ែកាតានហ្គា ដែលមានទីតាំងរបស់ក្រុមហ៊ុនផ្លូវដែកជាតិកុងហ្គោ ។អ្នកនាំពាក្យម្នាក់របស់រដ្ឋាភិបាលកុងហ្គោលោក LAMBERT MENDE ថ្លែងកាលពី ថ្ងៃទី២៣ មេសាថា តុល្យការថ្មីបណ្តោះអាសន្នចំនួនអ្នកស្លាប់ឡើងដល់៥៧នាក់ ។ ចំណែកអ្នកកាសែតម្នាក់ដែលចូលដល់កន្លែងគ្រោះថ្នាក់រៀបរាប់ពីមនុស្សស្លាប់ប្រមាណជា៦០នាក់ ហើយមនុស្ស៨៦នាក់ទៀតត្រូវរបួស ។ ចំណែកលោក TIMOTHEE MBUYA ប្រធានអង្គការសិទ្ធិមនុស្ស JASTICIA និយាយថា រហូតមកទល់ពេលនេះសាកសពមនុស្សយ៉ាងតិច១០០នាក់ត្រូវបានប្រមូល ហើយគេកំពុងកប់សាកសពទាំងនេះ ព្រោះគ្មានកន្លែងតម្កល់សព ។
រថភ្លើងនេះចាកចេញពីទីក្រុងកាមីណាទៅកាន់ក្រុង MWENE-DITU ភាគខាងជើងប្រទេសក្នុងខេត្តសំបូរពេជ្រកាសៃខាងកើត ។ យោងតាមប្រភពព័ត៌មាននានាថា ក្រៅពីដឹកទំនិញយ៉ាងច្រើនមានមនុស្សជាច្រើនរយនាក់ជិះក្នុងទូរថភ្លើង ឬលើដំបូល ។ ក្នុងចំណោមទូរថភ្លើងទាំង១៩ ទូ សរុបដល់ទៅ១៥បានក្រឡាប់។ អ្នកកាសែតម្នាក់រៀបរាប់ថា មនុស្សទាំងឡាយជាប់ក្នុងទូរថភ្លើង ហើយគេត្រូវការឧបករណ៍ស្ទូច១០០តោនដើម្បីស្ទូចទូរថភ្លើងទាំងនេះដែលក្រឡាប់សង្កត់មនុស្ស តែកន្លែងគ្រោះថ្នាក់នោះពិបាកចូលទៅ ៕
ចែករំលែកព័តមាននេះ