កងទ័ពភូមារាយការណ៍កាលពីថ្ងៃទី២០ មេសា ថា ការប្រយុទ្ធគ្នារវាងកងទ័ពភូមា និងពួកឧទ្ទាមនៃជនជាតិភាគតិចកាជីន បណ្តាលឱ្យមនុស្សស្លាប់យ៉ាងតិច២២នាក់ ក្នុងខែមេសានៅភាគខាងជើងប្រទេស ដែលនាំឱ្យបាត់ក្តីសង្ឃឹមលើកិច្ចព្រមព្រៀងឈប់បាញ់គ្នាមួយ ។
រដ្ឋកាជីន នៅជាប់ព្រំដែនជាមួយចិន ជាទីលាននៃសង្គ្រាមស៊ីវិលចុងក្រោយ ដែលនៅបន្តក្នុងប្រទេសភូមា ដែលនាំឱ្យមនុស្សជាច្រើនសិបពាន់នាក់ រត់ភៀសខ្លួន ហើយដែលធ្វើឱ្យស្រអាប់ដល់ការកែទម្រង់នានារបស់របបភូមាបច្ចុប្បន្ន ដែលឡើងកាន់អំណាចបន្តពីរបបយោធា ។
យោងតាមសេចក្តីប្រកាសមួយរបស់កងទ័ពចេញផ្សាយដោយកាសែតក្នុងស្រុក Myawaddy ថា ទាហានភូមា៨នាក់ ក្នុងនោះមាននាយទាហានម្នាក់ បានត្រូវស្លាប់ក្នុងការប៉ះទង្គិចគ្នានានាកាលពីដើមខែមេសានេះ ។ កងទាហានក៏បានរកឃើញផងដែរ នូវសាកសពយុទ្ធជនកងទ័ពឯករាជ្យកាជីន KIA ចំនួន១៤នាក់ ។ កងកម្លាំង KIA ជាក្រុមឧទ្ទាមប្រដាប់អាវុធខ្លាំងមួយនៅភូមា ពុំបានធ្វើអត្ថាធិប្បាយពីរឿងនេះឡើយ ។ យោងតាមប្រភពព័ត៌មានពីរដ្ឋកាជីនថា អ្នកភូមិជាច្រើនពាន់នាក់បានរត់គេចចេញពីការប្រយុទ្ធគ្នា ហើយភៀសខ្លួនទៅកាន់ព្រំដែនចិន ៕
ចែករំលែកព័តមាននេះ