ខេត្តកោះកុង ៖ ការធ្វើកូដកម្មបិទផ្លូវអស់រយៈពេល៣យប់៤ថ្ងៃរបស់ប្រជាពលរដ្ឋប្រមាណជាង១០០នាក់មកពីស្រុកបទុមសាគរ និងស្រុកគិរីសាគរដែលរងការរំលោភយកដីស្រែចំការ និងដីលំនៅឋានរបស់ពួកគាត់ពីសំណាក់ក្រុមហ៊ុនវិនិយោគតំបន់ទេសចរណ៍ចិនមួយឈ្មោះញូញៀនឌីវើឡុបមែនគ្រុប ត្រូវបានបញ្ចប់ហើយកាលពីរសៀលថ្ងៃទី៨ កុម្ភៈ ២០១៤ តាមគោលការណ៍ណែនាំរបស់លោកអភិបាលខេត្តប៊ុនលើត ។
គួររំលឹកឡើងវិញថា កូដកម្មបិទផ្លូវនេះបានធ្វើឡើងតាំងពីរសៀលថ្ងៃទី៥ កុម្ភៈ ២០១៤នៅតាមដងផ្លូវចេញពីផ្លូវជាតិលេខ៤៨ ខាងលិចសាលាស្រុកបទុមសាគរឆ្ពោះទៅកាន់ស្នាក់ការក្រុមហ៊ុនខាងលើដែលស្ថិតក្នុងឃុំកោះស្តេច ស្រុកបទុមសាគរ ឬគេហៅថា តំបន់ក្បាលនាគ៧។
កូដកម្មខាងលើនេះផ្តើមចេញពីការកើតទុក្ខមិនសុខចិត្តរបស់ប្រជាពលរដ្ឋទាំង២ស្រុក ដោយសារតែតំណាងក្រុមហ៊ុនញូញៀនមានឈ្មោះលី តឹកហៃ និងឈ្មោះវីរៈ ដឹកនាំកម្លាំងទាហានមកពីខេត្តកណ្តាល កម្លាំងសន្តិសុខរបស់ក្រុមហ៊ុន រួមនិងមន្ត្រីឧទ្យានជាតិបទុមសាគរសរុបប្រមាណ៣០នាក់ប្រដាប់ដោយអាវុធAK និងដំបងដើររុះរើ និងដុតបំផ្លាញផ្ទះប្រជាពលរដ្ឋចំនួន២ឃុំ គឺឃុំតានូន និងឃុំកោះស្តេចចាប់ពីដើមខែមករា ២០១៤ រហូតមកដល់ដើមខែកុម្ភៈអស់ចំនួន៤៥ខ្នង មិនតែប៉ុណ្ណោះបានចាប់មាន់ ទា ឆ្កែរបស់ពួកគាត់ធ្វើម្ហូបស៊ីយ៉ាងដាច់ដាប។
ប៉ុន្តែទោះជាយ៉ាងណាលោកអភិបាលខេត្តបានយកចិត្តទុកដាក់ និងចាត់មន្ត្រីក្រោមឱវាទទៅទទួលយកការទាមទារ និងសំណូមពររបស់ពួកគាត់ និងកោះហៅតំណាងក្រុមហ៊ុនមកជួបដើម្បីស្វែងរកដំណោះស្រាយឱ្យបានឆាប់ៗ៕
ចែករំលែកព័តមាននេះ