ប្រភពពីបរទេសនាពេលថ្មីៗបានបង្កនូវរឿងរ៉ាវដ៏គួរឱ្យភ្ញាក់ផ្អើលមួយ ខណៈដែលស្ថិតនៅក្នុងរដូវរងាមានអាកាសធាតុត្រជាក់យ៉ាងខ្លាំង តែបែរជាប្រទេសចិនបានបង្កើតកម្មវិធីប្រកួតដោយអង្គុយក្នុងបន្ទប់ទឹកកក ស្ថិតនៅក្នុងសីតុណ្ហភាពដក៥អង្សាក្នុងរយៈពេល៤៨ម៉ោង ។ នេះគឺជាកម្មវិធីមួយថ្មី និងចម្លែកបំផុតនៅក្នុងប្រទេសចិន ដែលបង្កើតកម្មវិធីដំបូង ហើយជាទីចាប់អារម្មណ៍បំផុតសម្រាប់ប្រជាជនរបស់គេនារដូវរងាប្រចាំឆ្នាំ២០១៤ ។
ប្រភពដដែលបានឱ្យដឹងទៀតថា «កម្មវិធីប្រកួតអង្គុយនៅក្នុងបន្ទប់ទឹកកកនេះ បានប្រារព្ធឡើងកាលពីថ្ងៃពុធ ខែមករា ឆ្នាំ២០១៤ ស្ថិតនៅក្នុងទីក្រុង Changsa នៃប្រទេសចិន ហើយមានបេក្ខជន-បេក្ខនារីជាច្រើនបានចូលរួមប្រកួត ដើម្បីគ្រងក្នុងតំណែងជើងឯក។ កម្មវិធីនេះតម្រូវឱ្យបេក្ខជនទាំងអស់ស្លៀកសម្លៀកបំពាក់ខាងក្នុង (ឈុតហែលទឹក) បន្ទាប់មកចូលអង្គុយទៅក្នុងបន្ទប់ទឹកកកដែលមានសីតុណ្ហភាពដក៥អង្សាក្នុងរយៈពេល៤៨ម៉ោង ។ ជាងនេះទៅទៀត គេមិនអនុញ្ញាតឱ្យបេក្ខជនទទួលទានទឹក និងចំណីអាហារបន្តិចសោះឡើយ ក្នុងអំឡុងពេលដែលអង្គុយនៅក្នុងបន្ទប់ទឹកកកដែលមានភាពត្រជាក់ខ្លាំងបំផុត ។ ថ្វីដ្បិតតែលក្ខខណ្ឌនៃការប្រកួតមានភាពតឹងរឹងបន្តិចមែន តែរាល់ការចូលរួមរបស់បេក្ខជន គឺជាការស្ម័គ្រចិត្ត ។ ជាងនេះទៅទៀត រាល់បេក្ខជនទាំងនោះមុននឹងចូលរួមប្រកួតមានក្រុមគ្រូពេទ្យពិនិត្យសុខភាពជាមុនសិន ហើយប្រសិនជាគ្រូពេទ្យបញ្ជាក់ពួកគេមានសុខភាពល្អនោះ គេអនុញ្ញាតឱ្យចូលរួមការប្រកួត តែបើពិនិត្យទៅឃើញថា សុខភាពមិនល្អគេមិនអនុញ្ញាតទេ ។ អ្វីដែលសំខាន់គឺអ្នករៀបចំកម្មវិធីយកចិត្តទុកដាក់ខ្លាំងនោះ គឺការដាក់ឧបករណ៍ជាប់នឹងខ្លួនរបស់បេក្ខជនទាំងអស់ក្នុងគោលបំណងតាមដានសុខភាពរបស់ពួកគេ ។ ប្រសិនបើអំឡុងពេលដែលបេក្ខជនអង្គុយនៅក្នុងបន្ទប់ទឹកកកនោះ មានសុខភាពមិនប្រក្រតីគេនឹងធ្វើការបញ្ឈប់ការប្រកួតភ្លាមៗតែម្តង ព្រោះដើម្បីទប់ស្កាត់បញ្ហាណាមួយដែលអាចបង្កឱ្យមានគ្រោះថ្នាក់រហូតដល់ការបាត់បង់ជីវិតជាយថាហេតុនោះ» ៕
ចែករំលែកព័តមាននេះ