រាជធានីភ្នំពេញ ៖ បុរសម្នាក់បានស្លាប់បាត់បង់ជីវិតភ្លាមៗ នៅនឹងកន្លែង ខណៈដែលរូបគាត់ជិះម៉ូតូឌ្រីម ១គ្រឿង ពណ៌ខ្មៅ ពាក់ស្លាកលេខ ភ្នំពេញ 1CC-7798 ធ្វើដំណើរតាមមហាវិថីសហព័ន្ធរុស្ស៊ី ក្នុងទិសដៅពីជើងទៅត្បូង លុះមកដល់ចំណុចខាងលិចអាកាសយានដ្ឋានអន្តរជាតិភ្នំពេញ ក៏ត្រូវរថយន្តតាកូម៉ា ១គ្រឿង ពណ៌ឈាមជ្រូក អត់ចាំស្លាកលេខ ជិះដោយបុរស ២នាក់ ធ្វើដំណើរច្រាសទិសគ្នា បុកចំពេញទំហឹង ហើយរថយន្តបង្កបានបើករត់ទាំងបែកកង់ និងធ្លាក់កាង រហូតមកដល់បុរី ឡឹម ឈាងហាក់ ស្ថិតក្នុងសង្កាត់ដង្កោ ខណ្ឌដង្កោ ទើបសមត្ថកិច្ចចាប់ឃាត់បាន។
ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង ៩ និង ៥០នាទី យប់ថ្ងៃទី២៦ ធ្នូ ២០១៣ ចំណុចខាងលិចអាកាសយានដ្ឋានអន្តរជាតិភ្នំពេញ ស្ថិតក្នុងភូមិព្រៃជីសាក់ សង្កាត់ចោមចៅ ខណ្ឌពោធិ៍សែនជ័យ។ ជនរងគ្រោះស្លាប់មានឈ្មោះ អ៊ឹម ចន្ធូ ភេទប្រុស អាយុ ៣១ឆ្នាំ ជាសិស្សរៀនភាសាកូរ៉េ។
ក្រោយកើតហេតុ សពជនរងគ្រោះសមត្ថកិច្ចបានទាក់ទងសាច់ញាតិឲ្យមកទទួលយកទៅធ្វើបុណ្យ ចំណែកម៉ូតូ និងរថយន្តបង្ក ត្រូវបាននាំទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ រង់ចាំការដោះស្រាយតាមផ្លូវច្បាប់៕
ចែករំលែកព័តមាននេះ