ខេត្តប៉ៃលិន ៖ គេសង្កេតឃើញមានហ្គាសគេចពន្ធជាច្រើនធុងត្រូវបានឈ្មួញលួចលាក់នាំចូលតាមច្រករបៀងជារៀងរាល់ថ្ងៃ ស្ថិតនៅខាងលិចឈៀងខាងជើងច្រកទ្វារអន្តរជាតិកម្ពុជា-ថៃ ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ដោយដឹកយកទៅចែកចាយតាមដេប៉ូក្នុងខេត្តប៉ៃលិន និងដឹកឆ្លងទៅដល់ខេត្តបាត់ដំបង។
ខេត្តប៉ៃលិន ៖ គេសង្កេតឃើញមានហ្គាសគេចពន្ធជាច្រើនធុងត្រូវបានឈ្មួញលួចលាក់នាំចូលតាមច្រករបៀងជារៀងរាល់ថ្ងៃ ស្ថិតនៅខាងលិចឈៀងខាងជើងច្រកទ្វារអន្តរជាតិកម្ពុជា-ថៃ ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ដោយដឹកយកទៅចែកចាយតាមដេប៉ូក្នុងខេត្តប៉ៃលិន និងដឹកឆ្លងទៅដល់ខេត្តបាត់ដំបង។
ទាក់ទិននឹងបញ្ហានាំហ្គាសចូលតាមច្រករបៀងដោយលួចលាក់នេះ គេសង្ស័យថា មានមន្រ្តីសមត្ថកិច្ចចាំយាមនៅច្រករបៀង និងមន្រ្តីច្រកព្រំដែនមួយចំនួនជាអ្នកនៅពីក្រោយខ្នងពួកឈ្មួញទាំងនោះ។ ជាក់ស្តែង កាលពីវេលាម៉ោង ១២ និង ៣០នាទី ថ្ងៃត្រង់ ថ្ងៃទី១៣ ធ្នូ ២០១៣ ស្ថិតនៅចំណុចច្រករបៀងខាងលើ គេឃើញមានរថយន្តដឹកហ្គាសគេចពន្ធ ១គ្រឿង ជាប្រភេទរថយន្តកាមរីគូទហើម ពណ៌ខ្មៅ ពាក់ស្លាកលេខ កំពង់ចាម 2A-1187 ចតចាំដឹកធុងហ្គាស ចំនួន ១០ធុង ចេញពីច្រករបៀងនោះ លុះពេលអ្នកយកព័ត៌មានទៅដល់ពួកគេក៏ប្រញាប់យកកន្ទេលគ្របពីលើ ដើម្បីបិទបាំងហ្គាសគេចពន្ធទាំងនោះ។
ជួបជាមួយអ្នកយកព័ត៌មានកោះសន្តិភាព ស្រ្តីជាឈ្មួញម្នាក់មិនបញ្ចេញឈ្មោះ បានរៀបរាប់ឲ្យដឹងថា គាត់ និងប្តី បានរកស៊ីជួញដូរហ្គាសដោយដឹកតាមច្រករបៀងនេះ ជាយូរមកហើយ ដោយទិញពីថៃក្នុងតម្លៃថោក និងមិនបានបង់ពន្ធអ្វីច្រើននោះទេ គឺអស់តែថ្លៃជួលកម្មករឲ្យឆ្លងទឹកអូរទៅលីពីទឹកដីថៃ យកមកដាក់នៅទឹកដីខ្មែរ រួចដឹកតាមរថយន្តបន្តយកទៅលក់ឲ្យថៅកែម្នាក់ឈ្មោះ គា រស់នៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ដោយក្នុង ១ធុង ទម្ងន់ ១៥គីឡូក្រាម លក់តម្លៃ ៤៦០បាត (លុយថៃ) ហើយបើគិតទាំងថ្លៃបង់ឲ្យសមត្ថកិច្ចនៅច្រករបៀង (ទាហាន ប៉េអឹម និងកន្លែងផ្សេងទៀត) ព្រមទាំងថ្លៃជួលកម្មករលីសែងផងនោះ គឺនៅសល់ចំណេញត្រឹមតែ ៩០បាត ប៉ុណ្ណោះ។
ស្រ្តីរូបនោះ បន្តថា គាត់ធ្លាប់យកទៅចែកចាយដល់ក្រុងប៉ៃលិន និងតាមដេប៉ូផ្សេងៗទៀត ហើយក៏បានយកទៅចែកចាយដល់ខេត្តបាត់ដំបងថែមទៀតផង ដោយបង់លុយជូនមន្រ្តីសមត្ថកិច្ចតាមផ្លូវជាហូរហែ តែនៅសល់ចំណេញតិចតួចដែរ។ ស្រ្តីជាឈ្មួញបានបញ្ជាក់ទៀតថា ចំពោះការយកហ្គាសចេញមកតាមច្រករបៀងនេះ គាត់មិនភ័យព្រួយបារម្ភខ្លាចសមត្ថកិច្ចចាប់ដាក់ពន្ធនាគារដូចជាឈើប្រណីតគ្រញូងនោះទេ ព្រោះនេះ ជាហ្គាសអត់មានទោសទេ ពេលណាសមត្ថកិច្ចចាប់ពួកគាត់បាន គឺបង់តែលុយឲ្យគេទៅចប់ហើយ និងអាចយករថយន្តរបស់ខ្លួនមកប្រកបមុខរបរដដែលវិញបាន។
តាមប្រភពផ្សេងទៀតបានឲ្យដឹងដែរថា នៅច្រករបៀងមួយនេះ ជាកន្លែងឈ្មួញនាំធុងហ្គាសគេចពន្ធចូលមកទឹកដីខ្មែរជាយូរមកហើយ ថែមទាំងនាំយកនូវត្រី សាច់មាន់ ជង្គង់មាន់ បន្លែផ្លែឈើជាច្រើនប្រភេទជារៀងរាល់ព្រឹកចូលមកទឹកដីខ្មែរ ដោយពួកគេមិនសូវនាំចូលតាមច្រកព្រំដែនអន្តរជាតិនោះទេ ព្រោះតាមច្រកទ្វារធំបង់ពន្ធខ្ពស់។ ចំណែកការនាំចូលតាមច្រករបៀងដោយលួចលាក់នេះ គឺបង់លុយឲ្យទាហាន និងប៉េអឹម នៅយាមច្រករបៀងបន្តិចបន្តួចប៉ុណ្ណោះ អាចបន្តយកមកលក់នៅក្នុងផ្សារប៉ៃលិន និងបន្តទៅដល់ខេត្តបាត់ដំបង ថែមទៀតផង។
សូមបញ្ជាក់ថា ការនាំចេញនូវទំនិញគេចពន្ធទាំងនេះ គេពុំដែលឃើញមានមន្រ្តីច្រកទ្វារអន្តរជាតិណាម្នាក់ចេញមុខអន្តរាគមន៍ចុះបង្រ្កាបនោះទេ ដោយពួកគេបើកដៃឲ្យឈ្មួញទាំងនោះ ដឹកនាំយកឥវ៉ាន់ឆ្លងដែនខុសច្បាប់មកលក់នៅទឹកដីខ្មែរ បានយ៉ាងរំភើយ មានទាំងទំនិញជិតផុតកាលកំណត់ ដែលជាមូលហេតុនាំឲ្យខូចសុខភាពបងប្អូនប្រជាពលរដ្ឋ ចំណែកហ្គាសវិញ គឺជញ្ជូនចូលទឹកដីខ្មែរទាំងកណ្តាលថ្ងៃត្រង់ពុំខ្លាចញញើតមន្រ្តីសមត្ថកិច្ចឡើយ។
ប្រជាពលរដ្ឋបានសំណូមពរដល់សមត្ថកិច្ចពាក់ព័ន្ធឲ្យចុះត្រួតពិនិត្យសារឡើងវិញ ព្រោះពួកឈ្មួញនាំទំនិញគេចពន្ធចូលមកទឹកដីខ្មែរ លួចលាក់ជាច្រើនពុំមានភ្នាក់ងារត្រួតពិនិត្យទំនិញនាំចូលឲ្យបានត្រឹមត្រូវនោះទេ។
ជុំវិញបញ្ហានាំហ្គាសចូលមកទឹកដីខ្មែរតាមច្រករបៀងដោយលួចលាក់នេះដែរ ភ្នាក់ងារកោះសន្តិភាពបានទាក់ទងទៅ លោក អ៊ុក វណ្ណច័ន្ទ ប្រធានសាខាគយខេត្តប៉ៃលិន ដើម្បីសុំការបំភ្លឺ តែមិនអាចទាក់ទងបាន ព្រោះលោកបានបិទទូរស័ព្ទ។ ចំណែក លោក សុខ សាវុធ ប្រធានការិយាល័យច្រកព្រំដែនកម្ពុជា-ថៃ ក៏មិនអាចរកលេខទូរស័ព្ទ ដើម្បីធ្វើការទាក់ទងបំភ្លឺបានដែរ៕
ចែករំលែកព័តមាននេះ