ខេត្តព្រះវិហារ ៖ ហេតុការណ៍ផ្ទុះកក្រើកនៅលើផ្ទៃមេឃ បានធ្វើឱ្យមានការភ្ញាក់ផ្អើលនៅតំបន់ប្រាសាទព្រះវិហារ កាលពីវេលាម៉ោង១០និង៤០នាទី ថ្ងៃទី៩ ធ្នូ និងក្រោយបន្តិចមកក៏មានបំណែកមួយចំនួនត្រូវបានធ្លាក់រាយបា៉យនៅក្រោយវត្តកែវសិក្ខាគិរីស្វារៈដែលមន្ត្រីយោធាបានអះអាងថា ជាបំណែកយន្តហោះគ្មានមនុស្សបើក ប៉ុន្តែប្រភពដែលបង្ហាញថាជាយន្តហោះរបស់ប្រទេសណានោះ នៅតែមិនមានការរកប្រភពឃើញនោះឡើយ ។
នេះមិនមែនជាលើកទី១ទេ ដែលមានការផ្ទុះបែបនេះទៅលើមេឃគឺជាលើកទី៤ ហើយគិតចាប់តាំងពីឆ្នាំ២០០៦មក ។ មន្ដ្រីក្នុងតំបន់បានឱ្យដឹងថា តាមការកត់សម្គាល់តំបន់មួយចំនួនក្នុងខេត្ដព្រះវិហារធ្លាប់មានការភ្ញាក់ផ្អើលពីការផ្ទុះនេះដែលលើកទី១ ក្នុងខែមិថុនា ឆ្នាំ២០០៦ នៅភូមិសាស្រ្ដស្រុកជាំក្សាន្ដក៏មានការផ្ទុះ ហើយធ្លាក់មកលើដីជាច្រើនកន្លែង ។ លើកទី២នៅឆ្នាំ២០១១ ក៏មានការផ្ទុះដូចគ្នានេះដែរនៅលើតំបន់ប្រាសាទព្រះវិហារតែម្ដង ។ ចំណែកលើកទី៣នៅឆ្នាំ២០១២ ក៏មានការផ្ទុះកក្រើកមេឃលើភូមិសាស្រ្ដស្រុកគូលែន និងលើកទី៤គឺនៅថ្ងៃទី៩ ធ្នូ ម្សិលមិញនេះបានផ្ទុះនៅលើតំបន់ប្រាសាទព្រះវិហារ ។ ហេតុការណ៍នេះត្រូវបានមន្ត្រីយោធាកម្ពុជាដែលប្រចាំការនៅតំបន់ប្រាសាទព្រះវិហារបានប្រាប់ឱ្យដឹងថា ការផ្ទុះនេះស្ថិតនៅក្នុងដែនអាកាសកម្ពុជា និងជាការផ្ទុះដ៏ខ្លាំងមួយគួរឱ្យមានការភ្ញាក់ផ្អើលផងដែររហូតដល់មានសកម្មភាពប្រុងជើងការផងដែរ ។ ការភ្ញាក់ផ្អើលនេះមិនមែនតែយោធាខ្មែរនោះទេ សូម្បីភាគីទាហានថៃក៏ភ្ញាក់ផ្អើលដែរ និងបានទាក់ទងសួរគ្នាទៅវិញទៅមកពីហេតុការណ៍នេះភ្លាមៗដែរ ។
មន្ត្រីយោធាកម្ពុជាដដែលបានឱ្យដឹងថា មានបំណែកមួយចំនួនបានធ្លាក់នៅចំណុចក្រោយវត្តកែវសិក្ខាគីរីស្វារៈ និងត្រូវបានក្រុមមន្ត្រីសណ្តាប់ធ្នាប់នៃអាជ្ញាធរព្រះវិហារ បានប្រមូលយកទៅរក្សាទុកនៅស្នាក់ការអាជ្ញាធរជាតិ ដើម្បីប្រគល់ដល់មន្ត្រីជំនាញមកធ្វើការត្រួតពិនិត្យពីបំណែកទាំងអស់នេះ ។ មន្ត្រីដដែលនិយាយជាច្រើនលើកមកហើយដែរ យើងនៅតែមិនដឹងថា យន្តហោះដែលគ្មានអ្នកបើកបរនេះបានផ្ទុះ និងធ្លាក់មកលើតំបន់ប្រាសាទព្រះវិហារ តែយើងមិនអាចដឹងដដែលថា យន្តហោះគ្មានមនុស្សបើកដែលផ្ទុះធ្លាក់នេះមកពីប្រទេសណានោះទេ គឺងងឹតសូន្យឈឹងដដែល ។ មន្ត្រីដដែលបញ្ជាក់ថា ការធ្លាក់បំណែកយន្តហោះគ្មានមនុស្សបើកនេះ មាននៅច្រើនកន្លែងទៀត តែមិនបង្កឱ្យមានការប៉ះពាល់លំនៅឋាន ឬក៏រងគ្រោះដល់មនុស្សណាម្នាក់ទេ ។ មិនទាន់មានការអះអាងឱ្យបានពិស្តារជុំវិញការផ្ទុះធ្លាក់នេះនៅឡើយ នារសៀលថ្ងៃដដែលនេះ ។
គេមានការឆ្ងល់ណាស់ ហេតុអីក៏យន្តហោះប្រភេទនេះ ចូលចិត្តតែប្រល័យជីវិតខ្លួនឯងនៅតំបន់ប្រាសាទព្រះវិហាររបស់យើងម៉្លេះ?ប្រល័យជីវិតខ្លួនឯងម្តងៗលាន់កក្រើកមេឃ ភ្ញាក់ផ្អើលគ្រប់គ្នានៅក្នុងតំបន់នោះ ។ តើយន្តហោះប្រភេទណា? អត់ដឹង ?!
ចែករំលែកព័តមាននេះ