រាជធានីភ្នំពេញ ៖ ផ្នូរសពមួយត្រូវបានគេប្រទះឃើញនៅជាប់របងក្បែរចិញ្ចើមផ្លូវលេខ៥៩៨ ក្នុងភូមិស្ពានខ្ពស់ សង្កាត់គីឡូម៉ែត្រលេខ៦ ខណ្ឌឫស្សីកែវ បង្កឱ្យមានការភ្ញាក់ផ្អើលយ៉ាងខ្លាំងកាលពីព្រឹកថ្ងៃទី៧ កញ្ញា ២០១០ ដោយគេនឹកក្រែងថា ជាផ្នូរសពមនុស្សត្រូវជនសង្គមងងឹតសម្លាប់រួចយកទៅកប់ដើម្បីបំបិទតាង ។ការភ្ញាក់ផ្អើលនេះបានឈូឆរឡើងកាលពីវេលាម៉ោង៩ព្រឹកថ្ងៃទី៧ កញ្ញា ២០១០ ដោយសារមានប្រជាពលរដ្ឋធ្វើដំណើរឆ្លងកាត់តាមផ្លូវលេខ៥៩៨នោះប្រទះឃើញផ្នូរគួរឱ្យសង្ស័យក៏រាយការណ៍ទៅសមត្ថកិច្ចឱ្យចុះមកធ្វើការត្រួតពិនិត្យក្រែងក្រុមជនសង្គមងងឹតកប់សពមនុស្ស… ហើយអាណិតសពដែលមិនត្រូវបានសាច់ញាតិយកទៅធ្វើបុណ្យ ។ ការប្រទះឃើញផ្នូរសពមួយនេះ ធ្វើឱ្យអ្នករស់នៅក្បែរនោះនឹករលឹកនៅដល់ហេតុការណ៍កន្លងមកថា កាលពីវេលាម៉ោង៨និង២០នាទីយប់ថ្ងៃទី៦ កញ្ញា មានរថយន្ត១គ្រឿង និងម៉ូតូ១គ្រឿងបាននាំគ្នាមកឈប់កន្លែងនោះ ប្រហែលជាយកសពមនុស្សមកកប់ហើយ…។
លុះដល់ព្រឹកថ្ងៃទី៧ កញ្ញា ប្រជាពលរដ្ឋដែលទៅចោមរោមអ៊ូអរបានសន្និដ្ឋានថា ផ្នូរសពដែលប្រទះឃើញនេះជាផ្នូរសពកូនក្មេង ព្រោះមានដុតធូប៣សរសៃ ប៉ុន្តែលុះសមត្ថកិច្ចមកដល់ចាប់ផ្តើមជីកកកាយនៅវេលាម៉ោង១០ព្រឹកថ្ងៃដដែល ស្រាប់តែពិនិត្យឃើញខ្មោចឆ្កែ១ក្បាលទៅវិញ ។ ខ្មោចឆ្កែនេះត្រូវបានគេច្រកថង់ ហើយចូកដីកប់ពីលើ ។ បន្ទាប់ពីឃើញខ្មោចឆ្កែ ម្នាក់ៗសើចហួសចិត្តគ្រប់ៗគ្នា ប៉ុន្តែអស់ការសង្ស័យ ៕
ចែករំលែកព័តមាននេះ