ប្រធានគណបក្សសង្គ្រោះជាតិ លោក សម រង្ស៊ី បានបញ្ជាក់នៅក្នុងសន្និសីទកាសែតនាព្រឹកថ្ងៃទី២៩ សីហា ២០១៣នេះថា គណបក្សសង្គ្រោះជាតិនៅតែប្រកាន់គោលជំហរធ្វើមហាបាតុកម្មអហិង្សាដដែល បើសិនជាគ្មានដំណោះស្រាយតាមការចង់បានរបស់គណបក្សសង្គ្រោះជាតិទេនោះ ។
លោក សម រង្ស៊ី បានបញ្ជាក់បន្ថែមថា មហាបាតុកម្មអហិង្សានេះ លោកនឹងយកលំនំាតាមមហាត្មះគន្ឋី ដែលជាវីរបុរសទាមទារឯករាជ្យដោយអហិង្សា និងសន្តិភាពរបស់ប្រទេសឥណ្ឌា ។ មេបក្សប្រឆាំងរូបនេះបានអះអាងទៀតថា ចាប់ពីថ្ងៃទី២៩សីហានេះទៅ អ្នកដែលនឹងចូលរួមធ្វើមហាបាតុកម្មនឹងត្រូវចូលហ្វឹកហាត់ដោយមានគ្រូជំនាញជនជាតិបារំាងធ្វើការបង្ហាត់បង្រៀននោះថែមទៀត ។
គួរបញ្ជាក់ថា កាលពីថ្ងៃទី២៨ សីហាម្សិលមិញ លោកសម រង្ស៊ី បានសរសេរលិខិតមួយច្បាប់ផ្ញើជូនសម្តេច ជា ស៊ីម ប្រធានគណបក្សប្រជាជនកម្ពុជា ដោយសុំឲ្យសម្តេចចាត់បញ្ជូនមន្រ្តី ដើម្បីចរចាជាថ្មីម្តងទៀត ។
មកដល់ព្រឹកថ្ងៃទី២៩ សីហានេះ គេនៅមិនទាន់ឃើញមានការឆ្លើយតបយ៉ាងណានៅឡើយទេ ពីខុទ្ទកាល័យសម្តេច ជា ស៊ីម ឬ ពីគណបក្សប្រជាជនកម្ពុជា ។
យ៉ាងណាក៏ដោយ ទាក់ទងទៅនឹងការប្រកាសធ្វើមហាបាតុកម្មរបស់គណបក្សសង្គ្រោះជាតិ ប្រសិនបើគ្មានដំណោះស្រាយនេះ ត្រូវបានមន្រ្តីរាជរដ្ឋាភិបាលកម្ពុជាបញ្ជាក់ថា គណបក្សសង្គ្រោះជាតិ ត្រូវតែគោរពតាមច្បាប់ស្តីពីការធ្វើបាតុកម្មអហិង្សា ហើយមេដឹកនំាធ្វើមហាបាតុកម្ម ត្រូវតែទទួលខុសត្រូវចំពោះមុខច្បាប់ ប្រសិនបើមានអំពើហិង្សាឬ ចលាចលសង្គមណាមួយដែលអាចនឹងកើតឡើងនោះ ៕
ចែករំលែកព័តមាននេះ