អណ្តើកនិងពស់ជិត៥០០គីឡូក្រាមបំរុងឆ្លងដែនត្រូវប៉េអឹមបង្ក្រាប
ដោយ ៖ អប្សរា
ថ្ងៃអាទិត្យ ទី៥ ខែកញ្ញា ឆ្នាំ២០១០ ម៉ោង ១០:០០
ខេត្តកណ្តាល ៖ សត្វពស់ និងអណ្តើក ប្រមាណជិត៥០០គីឡូក្រាម ដែលឈ្មួញដឹកតាមទូកចំណុះ១តោនកន្លះ តាមដងទន្លេបាសាក់ បំរុងលោតឆត្រទៅប្រទេសវៀតណាម បានត្រូវកំលាំងកងរាជអាវុធហត្ថខេត្ត សហការជាមួយកំលាំងកងរាជអាវុធហត្ថស្រុកកោះធំ ធ្វើការបង្ក្រាបបានកាលពីវេលាម៉ោង១១យប់ថ្ងៃទី២ខែកញ្ញា ឆ្នាំ២០១០ នៅចំណុចភូមិចុងខ្សាច់ ឃុំឈើខ្មៅ ស្រុកកោះធំ ។ លោកអនុសេនីយ៍ឯកស្វាយ សុខា អនុប្រធានមន្ទីរស្រាវជ្រាវនិងយុត្តិធម៌នៃកងរាជអាវុធហត្ថខេត្តបានឱ្យដឹងថា ដោយអនុវត្តតាមបទបញ្ជាលោកនាយឧត្តមសេនីយ៍សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ក៏ដូចជាបទបញ្ជារបស់លោកអភិបាលខេត្តកណ្តាល ក្នុងការបង្ក្រាបបទល្មើសផ្សេងៗដូចជា ។
បទល្មើសព្រៃឈើ សត្វព្រៃ អំពើរត់ពន្ធ ជាដើម ជាក់ស្តែងនៅថ្ងៃទី២ កញ្ញា វេលាម៉ោង១១យប់ កងរាជអាវុធហត្ថខេត្ត សហការជាមួយកងរាជអាវុធហត្ថស្រុក ដែលដឹកនាំផ្ទាល់ដោយលោកឧត្តមសេនីយ៍ត្រីមាស សុវណ្ណ មេបញ្ជាការកងរាជអាវុធហត្ថខេត្ត បានបញ្ជាឱ្យចាប់បង្ក្រាបរឹបអូសបានសត្វព្រៃចំនួន៤៦៧គីឡូក្រាម ។ សត្វព្រៃទាំងនេះត្រូវបានឈ្មួញដឹកតាមទូកចំណុះ១តោនកន្លះតាមដងទន្លេបាសាក់ បំរុងនាំចេញទៅប្រទេសវៀតណាម ក្នុងនោះមាន អណ្តើកចំនួន២៧៨គីឡូក្រាម ពស់សាំងសឿ ពស់ចាន់តាមម ពស់ក្រាយ សរុបចំនួន៣៩គីឡូក្រាម ពស់ថ្លាន់១៥០គីឡូក្រាម ។ លោកស្វាយ សុខា បានឱ្យដឹងទៀតថា ចំពោះការចុះចាប់សត្វព្រៃទាំងអស់នេះ គឺដោយមានការផ្តល់ព័ត៌មានពីកំលាំងសំងាត់របស់កងរាជអាវុធហត្ថទើបបង្ក្រាបបាននាពេលនេះ ប៉ុន្តែម្ចាស់និងអ្នកបើកទូកបានគេចខ្លួនបាត់ ។
លោកអនុសេនីយ៍ឯក បានបញ្ជាក់ថា ក្រោយពេលចាប់បានកំលាំងកងរាជអាវុធហត្ថក៏បានប្រគល់ទៅឱ្យសង្កាត់រដ្ឋបាលព្រៃឈើតាខ្មៅ និងប្រគល់បន្តទៅអង្គការ វ៉ាយអេដ ដើម្បីយកទៅលែងក្នុងតំបន់អភិរក្សសត្វព្រៃ ។ ប្រភពពីប្រជាពលរដ្ឋដែល រស់នៅស្រុកកោះធំបានឱ្យដឹងថា ចំពោះការរត់ពន្ធសត្វព្រៃទៅកាន់ប្រទេសវៀតណាមតាមដងទន្លេបាសាក់នេះក្នុង១ខែៗ មិនតិចជាង១០០តោនឡើយ ។ ក្រុមឈ្មួញដែលគិតតែពី ប្រយោជន៍ផ្ទាល់ខ្លួនពិតជាកំពុងបំផ្លាញធនធានជាតិ ៕
