ខេត្តពោធិ៍សាត់ ៖ ជនមិនស្គាល់មុខមួយក្រុមបានធ្វើសកម្មភាពបំពុលឆ្កែងាប់អស់៨ក្បាល ហើយបានលួចយកម៉ូតូ១គ្រឿង កាលពីយប់ថ្ងៃទី៣០ កក្កដា នៅភូមិអូររំចង់ ឃុំបាក់ចិញ្ចៀន ស្រុកភ្នំក្រវាញ ។លោក នង់ សម្បត្តិ មន្ត្រីនគរបាលព្រហ្មទណ្ឌស្រុកភ្នំក្រវាញឱ្យដឹងថា ម៉ូតូដែលចោរយកនេះមា៉កហុងដាស៊េរី២០០៩ ពណ៌ខ្មៅ ពាក់ស្លាកលេខបាត់ដំបង 1D-6965 ជាកម្មសិទ្ធិរបស់ឈ្មោះ ភួង សុង ភេទប្រុស អាយុ៥២ឆ្នាំ រស់នៅភូមិ-ឃុំកើតហេតុខាងលើ ។
តាមការសាកសួរឱ្យដឹងថា នៅយប់នោះលោក ភួង សុង បានចាក់សោកម៉ូតូដាក់នៅខាងក្រោមផ្ទះ ហើយគាត់ដេកនៅក្បែរម៉ូតូនោះដែរ ។ លុះដល់ពាក់កណ្តាលអធ្រាត្រ ខណៈពេលគាត់ភ្ញាក់ពីដេក ដើរទៅនោមម្តងឃើញឆ្កែងាប់ចំនួន២ក្បាលនៅក្បែររបង ប៉ុន្តែម៉ូតូនៅក្រោមផ្ទះនោះនៅដដែល ។ ភ្លាមៗនោះគាត់បានចុចពិលមើលជុំវិញភូមិ មិនឃើញមានមនុស្សទេ ទើបគាត់ដេកទៅវិញ ទៀត ។ លុះព្រឹកឡើងស្រាប់តែបាត់ម៉ូតូ ហើយឃើញឆ្កែងាប់ចំនួន៨ក្បាលនៅក្នុងភូមិ ទើបរាយការណ៍ប្រាប់សមត្ថកិច្ច ។
លោក គង់ សម្បត្តិ មានប្រសាសន៍ថា នេះគឺជាការធ្វេសប្រហែសរបស់ម្ចាស់ផ្ទះដែលមើលស្រាលសភាពការណ៍ ព្រោះថាពេលភ្ញាក់នោមកណ្តាលអធ្រាត្រដឹងថាមានឆ្កែងាប់ចំនួន២ក្បាលហើយ មិនប្រញាប់រាយការណ៍ប្រាប់សមត្ថកិច្ចឬក៏ការពារម៉ូតូរបស់ខ្លួនហើយបែរជាដេកទៅវិញទៀតទើបចោរលួចបាន ៕
ចែករំលែកព័តមាននេះ