ខេត្តបន្ទាយមានជ័យ ៖ គំនរសំរាមបានជះក្លិនស្អុយអសោចប៉ះពាល់ដល់អ្នកលក់ដូរ និងរស់នៅជិតខាងទល់មុខផ្សារសិរីសោភ័ណ ។ ប្រជាពលរដ្ឋរិះគន់ដល់ក្រុមហ៊ុនប្រមូលសំរាមថា បើប្រមូលលុយលឿន តែបើប្រមូលសំរាមវិញមានការយឺតយ៉ាវ ដូច្នេះគួរតែកែលម្អឡើងវិញពីបញ្ហាសេវាកម្មនេះ ។
ខេត្តបន្ទាយមានជ័យ ៖ គំនរសំរាមបានជះក្លិនស្អុយអសោចប៉ះពាល់ដល់អ្នកលក់ដូរ និងរស់នៅជិតខាងទល់មុខផ្សារសិរីសោភ័ណ ។ ប្រជាពលរដ្ឋរិះគន់ដល់ក្រុមហ៊ុនប្រមូលសំរាមថា បើប្រមូលលុយលឿន តែបើប្រមូលសំរាមវិញមានការយឺតយ៉ាវ ដូច្នេះគួរតែកែលម្អឡើងវិញពីបញ្ហាសេវាកម្មនេះ ។
យុវជនពីរនាក់បងប្អូនដែលលក់សាច់ជ្រូកចៀននៅក្បែរគំនរសំរាមបានប្រាប់ថា រាល់ថ្ងៃគាត់ពីរនាក់បងប្អូនបានមកលក់សាច់ជ្រូកចៀនតែងតែពាក់ម៉ាស់ ព្រោះលក់ក្បែរគំនរសំរាមមានក្លិនស្អុយអសោច ហើយស្ទើរតែស៊ាំច្រមុះទៅហើយ ។ គាត់បន្តថាទោះបីគាត់លក់ក្បែរសំរាមក៏ត្រូវបង់ភាស៊ីរាល់ថ្ងៃមិនដែលខានដែរ គឺក្នុងមួយថ្ងៃបង់២.៥០០រៀល។
បុរសរូបនេះបានបញ្ជាក់ថា បើនៅរដូវវស្សាដែលមានភ្លៀងធ្លាក់ជោកជាំ គំនរសំរាមធុំក្លិនស្អុយខ្លាំងស្ទើរតែទ្រាំមិនបាន ប៉ុន្តែបើមិនលក់កន្លែងនេះ ទៅលក់កន្លែងផ្សេងត្រូវបង់ថ្លៃជាងទើបស៊ូទ្រាំលក់នៅទីនេះ ហើយគំនរសំរាមដែលបានឃើញនេះ គឺនៅសល់រយៈពេល៣ថ្ងៃមកហើយ មិនឃើញមានរថយន្តមកដឹកឡើយដោយទុកគំនរសំរាមចោលធ្វើឱ្យមានក្លិនស្អុយប៉ះពាល់ដល់អ្នកលក់ និងអ្នករស់នៅក្បែរផ្សារសិរីសោភ័ណនេះ ។ ប្រជាពលរដ្ឋសំណូមពរដល់ក្រុមហ៊ុនផ្សារសិរីសោភ័ណ ជាពិសេសក្រុមហ៊ុនប្រមូលសំរាមសម្អាតទីក្រុង គួរតែប្រមូលសំរាមឱ្យបានលឿនដូចប្រមូលលុយផង។
តំណាងក្រុមហ៊ុនប្រមូលសំរាមសម្អាតក្រុងបានប្រាប់ថា ការប្រមូលសំរាម គឺទើបតែអាក់ខានរយៈពេល៣ថ្ងៃនេះទេ ពីព្រោះកម្មករបានទៅស្រុក ដើម្បីទៅបោះឆ្នោត ទើបមានការកកស្ទះ តែពេលនេះក្រុមហ៊ុនបានឱ្យកម្មករដើរប្រមូលសំរាមឡើងវិញ និងសំណូមពរឱ្យប្រជាពលរដ្ឋនិងអាជីវករលក់ដូរនៅផ្សារសិរីសោភ័ណវិញផងដែរ ព្រោះរយៈពេលកន្លងមកមានមនុស្សមួយចំនួនតូចបានយកសំរាមចោលក្រៅធុងឥតសណ្តាប់ធ្នាប់ គួរតែចូលរួមសម្អាតផងដែរ ៕
ចែករំលែកព័តមាននេះ