ខេត្តកំពត ៖ សប្បុរសជនជាច្រើននាក់បានរួមគ្នាជួយឧបត្ថម្ភដល់ក្មេងប្រុសពិការអត់ដៃជើងពីកំណើតម្នាក់ឈ្មោះ មាស សំណាង ហៅណុត រស់នៅភូមិកោះទ្រមួង ឃុំបឹងសាលាខាងជើង ស្រុកកំពង់ត្រាច ។ អំណោយតាមរយៈកោះសន្តិភាពត្រូវបាននាំទៅប្រគល់នៅថ្ងៃទី២៦ មិថុនា មាន១-ថវិកាចំនួន៣៣ម៉ឺនរៀល បានទទួលពីយុវជនឈ្មោះ ផល្លា ផលសម្បត្តិ និស្សិតឆ្នាំទី៣ សាលាច្បាប់រស់នៅសង្កាត់បឹងព្រលឹត ខណ្ឌ៧មករា រាជធានីភ្នំពេញ។
២-លោក សេង គី ផ្ទះលក់ទាខ្វៃច្បារអំពៅចំនួន២ម៉ឺនរៀល ៣-លោក តែ សុខឡុង និងក្រុមគ្រួសារឧបត្ថម្ភ២០ម៉ឺនរៀល ៤-លោកគ្រូធម្មបញ្ញា វ័ន្ត វណ្ណោ គ្រូសូត្រស្តាំវត្តក្រពើហា និងព្រះគ្រូធម្មចារោ យឹង ស្តា បាឡាត់ វត្តក្រពើហា ឧបត្ថម្ភ៦ម៉ឺនរៀល ៥-លោក សោម អ៊ុយ អតីតនាយកសាលាបឋមសិក្សាព្រែកឫស្សី ក្រុងតាខ្មៅ ៦ម៉ឺនរៀល ៦-បុគ្គលិកអង្គការ IDP តំណាងដោយលោក ជៀប ពិសិដ្ឋ បានផ្តល់ប្រាក់ឧបត្ថម្ភ៦២ដុល្លារអាមេរិក និង២៥.០០០រៀល ព្រមទាំងសៀវភៅសរសេរ២០ក្បាល គូល័រ១ប្រអប់ ខ្មៅដៃ១ប្រអប់ និងជ័រលុប៥ដុំ ។
ដោយឡែកសៀវភៅ២៤ក្បាល ប៊ិកហ្វឺត១២ដើម ខ្មៅដៃ១ឡូ គឺបានទទួលពីសប្បុរសជនម្នាក់ ។ ៧-កុមារា ហីុង សុវណ្ណមុនីរក្ស និងប្អូនប្រុស ឧបត្ថម្ភរទេះរុញមួយគ្រឿង ។ ចូលរួមក្នុងការប្រគល់អំណោយនោះមានលោក ចាន់ សាម៉ន មេឃុំបឹងសាលាខាងជើងផងដែរ ។ ស្ត្រីជាម្តាយក្មេងប្រុសឈ្មោះ ខែក សាវឿន បានថ្លែងអំណរគុណចំពោះសប្បុរសជនដែលមានក្តីអាណិតអាសូរដល់កូនប្រុសគាត់មានទាំងរទេះរុញ និងសម្ភារៈជាច្រើនមុខទៀត ស្របពេលប្តីរបស់គាត់ចេញទៅរកស៊ីបាត់នៅស្រុកថៃ ។
ស្ត្រីជាម្តាយបានបន្តថា តាមរយៈរទេះរុញមួយនេះ កូនរបស់គាត់អាចនិងបានចូលសាលារៀនដូចគេមិនខានឡើយ គឺជាគុណខ្ពស់ណាស់ ។ គាត់មិនភ្លេចទេកាលដែលកូនប្រុសពៅគាត់កើតមកបាន៩ថ្ងៃបានកាសែតកោះសន្តិភាពផ្សព្វផ្សាយដំណឹងនេះរហូតដឹងដល់លោកអភិបាលខេត្ត និងលោកស្នងការនគរបាលខេត្តចុះមកមើលដល់ផ្ទះដែលកាលណោះផ្ទះខ្ញុំជាខ្ទមប្រក់ស្លឹកតូចមួយធ្លាយឆ្លុះមើលឃើញមេឃ ពេលនោះដោយមើលឃើញជាក់ស្តែងលោក ខូយ ឃុនហួរ អភិបាលខេត្តកំពត និងលោកជំទាវ អ៊ុន សុគន្ធា ជាភរិយា រួមទាំងអាជ្ញាធរមូលដ្ឋានជួយធ្វើផ្ទះឱ្យខ្ញុំបានសមល្មមជ្រកកោនដោយប្រក់សង្ក័សី ទើបខ្ញុំបានចេញទៅរកស៊ីស្រុកថៃតាមប្តីមួយរយៈខ្លី និងសន្សំបានលុយខ្លះរួមផ្សំនិងខ្ចីលុយអង្គការផង បានធ្វើផ្ទះថ្មីនេះស្នាក់នៅ។
ប្រការគួរឱ្យកត់សម្គាល់នោះ ក្មេងប្រុសពិការរូបនេះស្រលាញ់សៀវភៅសរសេរខ្លាំងណាស់ សូម្បីតែអ្នកភូមិមកមើល ហើយម្តាយចែកសៀវភៅខ្លះទៅកូនអ្នកភូមិក្រីក្រ ក៏គេស្រែកយំដែរព្រោះស្តាយសៀវភៅសម្រាប់សរសេរ ។ លោក ចាន់ សាម៉ន ប្រធានឃុំបានថ្លែងអំណរគុណចំពោះសប្បុរសនដែលបានជួយឧបត្ថម្ភថវិកា និងសម្ភារមួយចំនួនដល់គ្រួសារក្មេងប្រុសពិការដៃជើងនេះ ។ កាលពីព្រឹកថ្ងៃទី២៣ មិថុនា កន្លងទៅនេះផងដែរលោក ស្រូយ រតនា សប្បុរសជននៅក្រុងភ្នំពេញក៏បាននាំយកអំណោយទៅប្រគល់ជូនដល់ដៃកុមារអភ័ព្វនេះផងដែរ ព្រោះមានក្តីអាណិតអាសូរដល់ក្មេងប្រុសនោះ ជាពិសេសចង់ចុះមកមើលដល់ផ្ទះតែម្តង ទើបឃើញរឿងនេះជារឿងពិតមិនអាចរំលងបាន ។
អ្នកធ្វើការជាមួយលោកក៏បានជួយឧបត្ថម្ភផងដែរ ក្នុងនោះមានលោក ហុក សុធា ជួយឧបត្ថម្ភ២០ដុល្លារ លោក សេង ប៊ុនថុល ១០ដុល្លារ លោក គួន សំណាង ៣០ដុល្លារ លោក ឌៀប សន្តិរដ្ឋ ៥០ដុល្លារ លោកស្រី ម៉េង សុគន្ធា ៥ដុល្លារ លោក តាំង ប៊ុនចាយ ១០ដុល្លារ រួមជាមួយអង្ករ១បាវ៥០គីឡូក្រាម ទឹកត្រី និងទឹកស៊ីអីុវ១២ដប មី១កេស សៀវភៅ២៤ក្បាល កាតាប១ ប៊ិកហ្វឺត ប៊ិកចុច២ឡូ និងភួយ២ ។
លោក ស្រូយ រតនា បានប្រាប់ថា លោកបានឧបត្ថម្ភបន្ថែមប្រាក់ចំនួន២០០ដុល្លារពីលើទៀតដើម្បីរៀបចំជាបង្គន់អនាម័យឱ្យក្មេងប្រុសពិការនេះ ព្រោះឪពុករបស់គេទៅរកស៊ីនៅស្រុកថៃបាត់ទៅហើយនៅតែម្តាយ ពិបាកលើកចុះឡើងនៅពេលគេកាន់តែធំ ដូច្នេះពិតជាលំបាកណាស់ក្នុងការបត់ដៃបត់ជើង ។ លោក ស្រូយ រតនា ក៏បានហៅជាងធ្វើបង្គន់ឱ្យមកពិនិត្យជាបន្ទាន់ ហើយលោកនឹងវិលមកផ្ទះក្មេងពិការនេះជាលើកទី២ ដើម្បីទូទាត់ពីការចំណាយការធ្វើបង្គន់នេះ ។
ស្របពេលដែលកាសែតចេញផ្សាយកាលពីថ្ងៃទី២២ មិថុនា លោកជំទាវ អ៊ុន សុគន្ធា ភរិយាលោក ខូយ ឃុនហួ៊រ អភិបាលខេត្តកំពតបានដឹកនាំគណៈប្រតិភូយកអំណោយមកឧបត្ថម្ភដល់ក្មេងប្រុសពិការអត់ដៃជើងនេះដល់ផ្ទះរបស់គេ រួមមានអង្ករ៥០គីឡូក្រាម ខោអាវ និងថវិកាចំនួន២០ម៉ឺនរៀល និងសម្ភារមួយចំនួនទៀត ។ លោកជំទាវបានសន្យាផ្តល់ប្រាក់ឧបត្ថម្ភចំនួន១០ម៉ឺនរៀលក្នុងមួយខែ សម្រាប់ជាជំនួយក្នុងការចិញ្ចឹមក្មេងប្រុសអភ័ព្វរូបនេះ ៕
ចែករំលែកព័តមាននេះ