រាជធានីភ្នំពេញ ៖ សាលាដំបូងរាជធានីបានប្រកាសសាលក្រមជាសាធារណៈ កាលពីវេលាម៉ោង២និង៣០នាទីរសៀលថ្ងៃទី២៧ មិថុនា លើសំណុំរឿងក្រុមដេវីដ ឆាណាយវា ពីបទបានប្រើអំពើហិង្សាដោយចេតនាទៅលើអ្នកកាសែតជិត១០នាក់ ក្នុងហេតុការណ៍គ្រោះថ្នាក់ចរាចរណ៍មួយនាពេលរាត្រី ។ សាលក្រមបានប្រកាសផ្តន្ទាទោសឈ្មោះដេវីដ ឆាណាយវា ដាក់ពន្ធនាគាររយៈពេល៣ឆ្នាំ និងពិន័យជាប្រាក់ចូលថវិការដ្ឋចំនួន៦លានរៀល ។
ជាមួយនេះ គូកន២នាក់ផ្សេងទៀតគឺឈ្មោះប្រាក់ អ៊ូហ្វី ក្មួយប្រុសរបស់ដេវីដ ឆាណាយវា ដាក់ពន្ធនាគាររយៈពេល២ឆ្នាំ និងពិន័យជាប្រាក់ចំនួន៤លានរៀល និងឈ្មោះយាន ស៊ីណា អតីតអនុរដ្ឋលេខាធិការក្រសួងយុត្តិធម៌ដាក់ពន្ធនាគាររយៈពេល២ឆ្នាំ គិតពីថ្ងៃចាប់ខ្លួន និងពិន័យជាប្រាក់ចូលថវិការដ្ឋចំនួន៤លានរៀល ។
ជនរូបនេះបានគេចខ្លួននៅក្រោយពេលកើតហេតុ ។ ក្រោយពីសាលក្រមបានប្រកាស ជនជាប់ចោទឈ្មោះដេវីដ ឆាណាយវា និងឈ្មោះ ប្រាក់ អ៊ូហ្វី តម្រូវឱ្យផ្តិតមេដៃទទួលស្គាល់លើសាលក្រមនោះ បន្ទាប់មកទាំងឪពុកមា និងក្មួយប្រុសត្រូវបានអនុរក្សនាំទៅឃុំខ្លួននៅពន្ធនាគារព្រៃសវិញ ។ មុនពេលឡើងរថយន្តប៉ូលិសឆ្ពោះទៅកន្លែងឃុំខ្លួន ជនជាប់ចោទដេវីដ ឆាណាយវា បានប្រាប់អ្នកយកព័ត៌មានថា លោកនឹងប្តឹងទាស់លើសាលក្រមនេះទៅសាលាឧទ្ធរណ៍ ។ លោកដេវីដ ឆាណាយវា បានបន្តថា បានជាលោកប្តឹងទាស់ទៅសាលាឧទ្ធរណ៍ ពីព្រោះការកាត់ក្តីរបស់សាលាដំបូងរាជធានីភ្នំពេញ មិនបានផ្តល់ភាពយុត្តិធម៌សម្រាប់រូបលោកនិងក្មួយប្រុសនោះទេ ។
តាមបទប្បញ្ញតិ្តនៃក្រមព្រហ្មទណ្ឌក្នុងមាត្រា២១៧បានចែងថា អំពើហិង្សាប្រព្រឹត្តដោយចេតនាលើអ្នកដទៃ ត្រូវផ្តន្ទាទោសដាក់ពន្ធនាគារពី១ឆ្នាំទៅ៣ឆ្នាំ និងពិន័យជាប្រាក់ពី២លានរៀលទៅ៦លានរៀល ។ សាលក្រមនេះពិតណាស់មិនបានបន្ធូរបន្ថយទោសលើរូបគេទាំង៣នាក់ឡើយ បើទោះបីសំណងរដ្ឋប្បវេណីត្រូវបានដោះស្រាយសងភាគីដែលអះអាងថាជាជនរងគ្រោះក៏ដោយ ។ លោកស្រីចាំង ស៊ីណាត ចៅក្រមសាលាដំបូងរាជធានីភ្នំពេញ កាលពីថ្ងៃទី២៤ មិថុនា បានលើកយកសំណុំរឿងព្រហ្មទណ្ឌទាក់ទិននឹងការវាយដំទៅលើអ្នកកាសែតដែលជាអំពើហិង្សាដោយចេតនា ហើយស្ថានទម្ងន់ទោសនេះ មានជនជាប់ចោទឈ្មោះដេវីដ ឆាណាយវា ភេទប្រុស និងឈ្មោះប្រាក់ អូ៊ហ្វី ភេទប្រុស អាយុ២២ឆ្នាំ ជាក្មួយត្រូវបាននាំមកកាន់សវនាការដើម្បីសួរដេញដោលនៅចំពោះមុខចៅក្រម និងព្រះរាជអាជ្ញារងលោកជេត ខេមរា ។
ចំណែកឈ្មោះយាន ស៊ីណា អតីតអនុរដ្ឋលេខាធិការក្រសួងយុត្តិធម៌មិនមានវត្តមាននៅក្នុងសវនាការទេ ពីព្រោះជននេះបានរត់គេចខ្លួនក្រោយថ្ងៃកើតហេតុ ។ ការសួរដេញដោលនៅក្នុងសវនាការបានប្រើពេលអស់ជាង៣ម៉ោង ដោយមានការចាក់មើលវីដេអូឃ្លីបស្តីពីអំពើហិង្សាដែលជនជាប់ចោទបានវាយដំទៅលើអ្នកកាសែត ។ បន្ទាប់ពីសួរដេញដោលរួចមក ចៅក្រមសាលាដំបូងរាជធានីភ្នំពេញបានប្រកាសពន្យារពេលប្រកាសសាលក្រមលើសំណុំរឿងក្រុមដេវីដ ឆាណាយវា វាយអ្នកកាសែតទៅថ្ងៃទី២៧ មិថុនា ។
នៅចំពោះមុខអង្គសវនាការ ជនជាប់ចោទបានទាមទារឱ្យតុលាការអនុញ្ញាតឱ្យមានការថតវីដេអូចាក់ផ្សាយតាមស្ថានីយទូរទស្សន៍ និងសារព័ត៌មានជាតិដែលបានចុះផ្សាយ ឬចាក់ផ្សាយរូបភាពដែលក្រុមរបស់ខ្លួនបានធ្វើសកម្មភាព កាលពីយប់ថ្ងៃទី១៩ មីនា ឆ្នាំ២០១៣ កន្លងមក ។ ចំពោះការលើកឡើងនេះត្រូវបានចៅក្រមជំនុំជម្រះលោកស្រីចាំង ស៊ីណាត និងតំណាងអយ្យការលោកព្រះរាជអាជ្ញារង ជេត ខេមរា បដិសេធ ព្រោះមិនចាំបាច់ថតរូបទេ ហើយបទបញ្ជាផ្ទៃក្នុងរបស់តុលាការ មិនអនុញ្ញាតឱ្យមានការថតក្នុងសវនាការឡើយ ។
ជនជាប់ចោទឈ្មោះ អូ៊ហ្វី បាននិយាយប្រាប់តុលាការថា នៅថ្ងៃកើតហេតុ កាលពីថ្ងៃទី១៩ មីនា ឆ្នាំ២០១៣ ខ្លួនបានបើករថយន្តពណ៌ក្រហម តាមបណ្តោយមហាវិថីព្រះមុនីវង្ស ។ នៅពេលបត់ឆ្វេងតាមផ្លូវលេខ២១៤ ក៏មានរថយន្តមួយគ្រឿងទៀតមកបុករថយន្តរបស់គេពីក្រោយ បណ្តាលឱ្យរថយន្តគេទៅបុកនឹងបង្គោលភ្លើង ។ នៅពេលកើតហេតុ រូបគេបានទូរស័ព្ទទៅឪពុកមារបស់ខ្លួនឈ្មោះដេវីដ ឆាណាយវា ឱ្យមកជួយខ្លួន ព្រោះមិនអាចបើករថយន្តបាន ។ នៅពេលនោះពិតជាមានការវាយតប់គ្នា ប៉ុន្តែជាការវាយទៅវិញទៅមកជាមួយអ្នកកាសែត ខណៈពេលក្រុមអ្នកកាសែតបានព្យាយាមថតរូបកន្លែងកើតហេតុ ហើយក្រុមខ្លួនបានហាមមិនឱ្យអ្នកកាសែតថត ។
ជនជាប់ចោទឈ្មោះដេវីដ ឆាណាយវា បានរៀបរាប់ប្រាប់តុលាការថា ខ្លួនគេបានវាសដៃដើម្បីការពារឈ្មោះប្រាក់ អូ៊ហ្វី ដែលត្រូវជាក្មួយប្រុស ហើយគ្រាហ៍ក្មួយរុញបញ្ចូលរថយន្ត ខណៈពេលមានក្រុមប្រជាជន និងអ្នកកាសែតបានព្យាយាមវាយមិនឱ្យគាត់ចេញ ពីកន្លែងកើតហេតុ ។ នៅពេលនោះឈ្មោះយាន ស៊ីណា បានចេញពីរថយន្តរបស់ខ្លួនទៅជួួយកុំឱ្យមានការវាយតប់គ្នា ។ ប៉ុន្តែឈ្មោះយាន ស៊ីណា ត្រូវបានក្រុមអ្នកកាសែតនិងអ្នកដទៃទៀតចាប់ជាប់ ។ ដោយឃើញស្ថានភាពដូចនេះ ខ្លួនបានព្យាយាមរំដោះឈ្មោះយាន ស៊ីណា ឱ្យចេញពីក្រុមមនុស្សដែលមានគ្នាប្រមាណពី៤០នាក់ទៅ៥០នាក់ ។
មន្ត្រីប៉ូលិសខណ្ឌដូនពេញនិងប៉ូលិសប៉ុស្តិ៍បឹងរាំងបាននិយាយប្រាប់តុលាការថា ពួកលោកបានសាកសួរប្រជាពលរដ្ឋនៅកន្លែងកើតហេតុនិងត្រូវបានចង្អុលបង្ហាញថា ឈ្មោះដេវីដ ឆាណាយវា បានវាយអ្នកកាសែតពិតមែនបន្ទាប់ពីកើតមានករណីគ្រោះថ្នាក់ចរាចរណ៍នោះ ។ មានការអះអាងថា ដើមបណ្តឹងបានសម្រេចដកពាក្យបណ្តឹងក្នុងរឿងនេះមានចំនួន៥នាក់ ។ តាមការបញ្ជាក់ជូនតុលាការ ជនរងគ្រោះទាំងនេះបានទាមទារសំណងជំងឺចិត្តរាប់ពាន់ដុល្លារអាមេរិកនិងសំណងការខូចខាតលើករណីនេះ ។ បើទោះជាយ៉ាងណា ជនរងគ្រោះទាំង៥នាក់ ដែលបានដាក់ពាក្យបណ្តឹងប្តឹងជនល្មើសទាំងបីនាក់ មិនបានចូលមកក្នុងសវនាការទេ កាលពីថ្ងៃទី២៤ មិថុនានោះ ។
ក្រុមគ្រួសាររបស់ជនរងគ្រោះជាអ្នកកាសែតចំនួនពីរនាក់បានសម្រេចដកពាក្យបណ្តឹងប្រឆាំងនឹងជនជាប់ចោទទាំងបីនាក់ខាងលើ ព្រោះពួកគាត់រវល់បំពេញការងារនិងបានទទួលសំណងជាប្រាក់មួយចំនួន តែរឿងបណ្តឹងអាជ្ញាទុកសិទ្ធិជូនតុលាការជាអ្នកសម្រេច ។ យោងតាមពាក្យបណ្តឹងរបស់ជនរងគ្រោះដែលបានដាក់ចូលទៅសាលាដំបូងរាជធានីភ្នំពេញ បានទាមទារសំណងការខូចខាតនិងជំងឺចិត្តពី២.៥០០ដុល្លារអាមេរិកទៅ១ម៉ឺនដុល្លារអាមេរិក ៕
ចែករំលែកព័តមាននេះ