ខេត្តប៉ៃលិន ៖ នៅស្នងការដ្ឋាននគរបាលខេត្តកាលពីព្រឹកថ្ងៃទី២៥ មិថុនា មានរៀបចំពិធីប្រគល់ជូនម៉ូតូម៉ាកយ៉ាមា៉ហា ចំនួន៨គ្រឿងជូនដល់ប៉ុស្តិ៍រដ្ឋបាលទាំង៨ឃុំ-សង្កាត់ នៅក្នុងខេត្ត ដោយមានការអញ្ជើញចូលរួមពី លោកឧត្តមសេនីយ៍ត្រី ឡី ចាន់ឆាយ ស្នងការនគរបាលខេត្ត និងមន្ត្រីនគរបាលគ្រប់ប៉ុស្តិ៍រដ្ឋបាល ។ សូមបញ្ជាក់ថា ការប្រគល់ម៉ូតូជូនដល់ប៉ុស្តិ៍នគរបាលរដ្ឋបាលឃុំ-សង្កាត់ទាំង៨នេះបានធ្វើឡើងចំនួន២ដង រួចមកហើយ ហើយពេលនេះជាលើកទី៣ ដូច្នេះប៉ុស្តិ៍នីមួយៗ ទទួលបានចំនួន៣គ្រឿងហើយរហូតមកដល់ពេលនេះ ។
លោកឧត្តមសេនីយ៍ត្រី ឡី ចាន់ឆាយ ថ្លែងថា ម៉ូតូទាំង៨គ្រឿងនេះជាជំនួយរបស់ក្រសួងមហាផ្ទៃ ផ្តល់ជូនប៉ុស្តិ៍រដ្ឋបាលទាំង៨ឃុំ-សង្កាត់ ដើម្បីអនុវត្តការងារភូមិ-ឃុំមានសុវត្ថិភាព និងដើម្បីការពារសន្តិសុខ សណ្តាប់ធ្នាប់ក្នុងការរៀបចំការបោះឆ្នោតថ្ងៃទី២៨ កក្កដា ២០១៣ ខាងមុខ ។ ពេលទទួលបានម៉ូតូទាំងអស់នេះហើយ មិនត្រូវយកទៅឱ្យអ្នកផ្សេងប្រើប្រាស់ខុសគោលការណ៍ឡើយ ពេលបំពេញភារកិច្ចចប់មន្ត្រីសមត្ថកិច្ចទាំងអស់ត្រូវយកទៅរក្សាទុកនៅអង្គភាព ។
លោកស្នងការបានណែនាំថា មិនត្រូវជិះម៉ូតូនគរបាលចូលច្រៀងខារ៉ាអូខេ ឬកន្លែងផឹកស៊ីឡើយ ព្រោះនាំឱ្យបាត់បង់អត្តសញ្ញាណមន្ត្រីសមត្ថកិច្ចល្អ ជាពិសេសយើងជាមន្ត្រីការពារប្រជាពលរដ្ឋត្រូវធ្វើជាគំរូល្អដល់ពួកគាត់ ។ ម៉្យាងទៀត បើបានយកម៉ូតូទៅប្រើប្រាស់ខុសបណ្តាលឱ្យបាត់បង់ខូចខាត ត្រូវទទួលខុសត្រូវដោយខ្លួនឯង ៕
ចែករំលែកព័តមាននេះ