ខេត្តពោធិ៍សាត់ ៖ ជនពិការខ្វិនដៃខ្វិនជើងគ្មានទីពឹងចំនួន១៣នាក់ ដែលអាជ្ញាធរមូលដ្ឋាននិងភ្នាក់ងារកាកបាទក្រហមខេត្តប្រទះឃើញតាមឃុំចំនួន៥គឺ ឃុំតាលោ ស្នាមព្រះ បឹងខ្នារ មេទឹក និងឃុំបឹងបត់កណ្ដាល ក្នុងស្រុកបាកន បានមកទទួលអំណោយពីសាខាកាកបាទក្រហមកម្ពុជាខេត្តកាលពីរសៀលថ្ងៃទី២៦ មិថុនា ដោយមានការអញ្ជើញចូលរួមពីលោកខូយ សុខា អភិបាលខេត្ត និងជាប្រធានកិត្តិយសនៃគណៈកម្មាធិកាសាខាកាកបាទក្រហមខេត្ត លោកជំទាវជា ខេង ស៊ុយ សែម លោកសួន រិនឌី អភិបាលរង ជាប្រធានគណកម្មាធិការសាខាកាកបាទក្រហមកម្ពុជាខេត្ត និងសមាជិកភាពមួយចំនួនទៀត ។
ជនពិការទាំង១៣នាក់ ខ្លះខ្វិនដៃជើង ខ្វាក់ភ្នែក កំបុតជើង និងកើតជំងឺប៉ូលីយ៉ូដើរមិនរួចហើយគ្មានទីពឹងទៀត ។ ម្នាក់ៗទទួលបានរទះរុញជនពិការមួយ អង្ករ២៥គីឡូក្រាម មី១កេស ទឹកស៊ីវអីុវ១យួរ ទឹកត្រី១យួរ សារុង ១ ម្សៅសាប៊ូកន្លះគីឡូក្រាម មុង១ ភួយ១ ក្រមា១ សារុង១ និងថវិកា២០.០០០រៀល ។ លោកខូយ សុខា ប្រធានកិត្តយសកាកបាទក្រហមកម្ពុជាខេត្តបានថ្លែងថា បន្ទាប់ពីអនុសាខាកាកបាទក្រហមកម្ពុជាស្រុកបាកានក៏ដូចអាជ្ញាធរមូលដ្ឋានរកឃើញជនពិការគ្មានទីពឹងខាងលើរស់នៅយ៉ាងលំបាកវេទនានោះក៏បានរាយការណ៍ជូនទៅថ្នាក់លើ ។ ពេលនោះលោកជំទាវជា ខេង ស៊ុយ សែម បានជួបសម្ដេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ដោយចៃដន្យក៏បានជម្រាបជូនដំណឹងនេះ ។ ភ្លាមនោះសម្ដេចកិត្តិពិ្រឹទ្ធបណ្ឌិតមិនអល់អែកទេក៏បានផ្ដល់រទេះរុញជនពិការចំនួន១៣គ្រឿងយកមកជូនជនពិការទាំង១៣នាក់ ទើបធ្វើពិធីប្រគល់នៅថ្ងៃនេះតែម្ដង ។
កាកបាទក្រហមកម្ពុជាក្រោមការដឹកនាំរបស់សម្ដេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន បានដើរតួយ៉ាងសំខាន់ជួយសង្គ្រោះជនរងគ្រោះគ្រប់ប្រភេទ និងបានចូលរួមអភិវឌ្ឍន៍ក្នុងសង្គមច្រើនណាស់ដោយផ្អែកទៅលើគោលការណ៍ទាំង៧ប្រការរបស់កាកបាទក្រហមកម្ពុជា ។ លោកខូយ សុខា បានផ្ដាំផ្ញើដល់ជនពិការដែលទទួលបានអំណោយ និងរទេះរុញថ្ងៃនេះកុំឱ្យអស់សង្ឃឹមក្នុងជីវិត ត្រូវមានសង្ឃឹមជានិច្ចដរាបណាមានសម្ដេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ជាប្រធានកាកបាទក្រហមកម្ពុជា និងសម្ដេចតេជោ ហ៊ុន សែន ជានាយករដ្ឋមន្ត្រីនៃព្រះរាជាណាចក្រកម្ពុជា ៕
ចែករំលែកព័តមាននេះ