ខេត្តប៉ៃលិន ៖ នារីរូបស្រស់ម្នាក់ដែលបានបាត់ខ្លួនកាលពីថ្ងៃទី១១ ឧសភា ២០១៣ ត្រូវបានគេប្រទះឃើញសពហើមស្អុយរលួយកាលពីម៉ោង១០និង៣០នាទីព្រឹកថ្ងៃទី៣១ ឧសភា នៅក្នុងគុម្ពោតព្រៃមួយកន្លែង ចម្ងាយប្រមាណ៣៧០ម៉ែត្រពីភូមិអូរទទឹង ឃុំសំឡូត ស្រុកសំឡូត ខេត្តបាត់ដំបង ។ ចំណែកឪពុកម្តាយនារីរងគ្រោះបានស្គាល់ដោយសារសម្លៀកបំពាក់ និងស្បែកជើង ហើយក៏យកសពទៅផ្ទះដើម្បីរៀបចំធ្វើបុណ្យតាមប្រពៃណីនៅខេត្តប៉ៃលិន ។
សូមបញ្ជាក់ថា នារីរងគ្រោះដែលបានបាត់ខ្លួនអស់រយៈពេលជាង២០ថ្ងៃនេះឈ្មោះ ពិន សុភ័ស្ត អាយុ២៣ឆ្នាំ ជាអ្នកលក់បង្អែមនៅជាប់របងសាលាខេត្តប៉ៃលិន មានឪពុកឈ្មោះ ពិន ប៉ន អាយុ៥៣ឆ្នាំ ម្តាយឈ្មោះ ឡុំ សុខន អាយុ៤៣ឆ្នាំ រស់នៅភូមិប៉ាហ៊ីខាងត្បូង សង្កាត់ប៉ៃលិន ក្រុងប៉ៃលិន ។
ប្រភពព័ត៌មានពីឪពុកម្តាយនារីរងគ្រោះបានឱ្យដឹងថា តាមការពិនិត្យសពបញ្ជាក់ថា នេះពិតជាកូនស្រីរបស់ពួកគាត់មែន ដោយនាងបាត់ខ្លួនកាលពីវេលាម៉ោង១២ថ្ងៃត្រង់ថ្ងៃទី១១ ឧសភា ២០១៣ ។
នៅព្រឹកថ្ងៃបាត់ខ្លួន នាងពាក់អាវយឺតដៃវែងពណ៌កាហ្វេ ស្លៀកខោខូវប៊ុយពណ៌ខៀវព្រលែតជើងវែង និងពាក់ស្បែកជើងចំពាមពណ៌លឿង ។ នាងបានសុំឪពុកម្តាយយកម៉ូតូមួយគ្រឿងម៉ាកឌ្រីមពណ៌ខ្មៅ ពាក់ស្លាកលេខប៉ៃលិន 1A-7909 ជិះទៅព្រំដែនកម្ពុជា-ថៃ ព្រោះមានមិត្តភក្តិម្នាក់ឈ្មោះស្រីណែត ភេទស្រី អាយុប្រហែល២៣ឆ្នាំ រស់នៅភូមិអូរតាប្រាង្គ សង្កាត់ប៉ៃលិន ក្រុងប៉ៃលិន ទូរស័ព្ទបបួលនាងថានាំទៅយកលិខិតឆ្លងដែនទៅស្រុកថៃ ។
ប្រភពដដែលបានបន្តទៀតថា លុះក្រោយមកទៀតស្រាប់តែមានមិត្តប្រុសរបស់នាងឈ្មោះរិន អាយុប្រហែល២៥ឆ្នាំ រស់នៅភូមិទួលខៀវ សង្កាត់ប៉ៃលិន ក្រុងប៉ៃលិន បានទូរស័ព្ទប្រាប់ថា រូបគេឱ្យនាងជិះម៉ូតូទៅយកលុយចំនួន៥០ដុល្លារដោយរូបគេទុកនៅឯស្រុកសំឡូត ។ តាំងពីនោះមកក៏បាត់ដំណឹងនាងរៀងរហូត មិនដឹងថា ទៅព្រំដែនជាមួយមិត្តស្រីរបស់នាងឬទៅស្រុកសំឡូត ខេត្តបាត់ដំបង ។
លុះនៅថ្ងៃទី៣១ ឧសភា វេលាម៉ោងជាង១០ព្រឹក ខណៈមានអ្នកភូមិម្នាក់រស់នៅភូមិអូរទទឹង ឃុំសំឡូត ស្រុកសំឡូត ខេត្តបាត់ដំបង ទៅចងគោឱ្យស៊ីស្មៅនៅក្បែរគុម្ពោតព្រៃមួយធុំក្លិនស្អុយ ក៏ចូលទៅមើលស្រាប់តែប្រទះឃើញសពតែម្តង រួចផ្តល់ដំណឹងមកពួកគាត់ជាឪពុកម្តាយ ទើបទៅពិនិត្យមើលដឹងច្បាស់ថាជាកូនស្រីរបស់គាត់ប្រាកដមែន ។
សមត្ថកិច្ចផ្នែកកោសល្យវិច័យខេត្តបានទៅពិនិត្យ និងសន្និដ្ឋានថា នេះជាករណីប្លន់សម្លាប់ព្រោះនៅក្បែរសពគេសង្កេតឃើញមានដំបងមួយធំប៉ុនកជើងប្រវែងជាងកន្លះម៉ែត្រ តែដោយសារសពស្អុយរលួយមិនអាចពិនិត្យឱ្យដឹងថា ជនរងគ្រោះត្រូវគេវាយចំកន្លែងណាខ្លះនោះទេ ។ ទាក់ទិនទៅនឹងបញ្ហានេះសមត្ថកិច្ចបានបំភ្លឺថា ការស្លាប់របស់នារីរងគ្រោះគឺសង្ស័យថាជាមនុស្សស្និទ្ធស្នាលនឹងនាង ល្បួងបបួលនាំជិះម៉ូតូតាមផ្លូវទៅកន្លែងកើតហេតុ ហើយពេលស្ងាត់មនុស្សមានឱកាសក៏ប្លន់សម្លាប់នាងយកម៉ូតូតែម្តងទៅ ។ ពេលនេះ ក្រុមគ្រួសារបានយកសពមកផ្ទះ ដើម្បីរៀបចំធ្វើបុណ្យបូជាតាមប្រពៃណី៕
ចែករំលែកព័តមាននេះ