ខេត្តកំពត ៖ រថយន្តកូរ៉េចំណុះ១តោនកន្លះច្នៃទ្រុងលាបពណ៌ក្រហម ជារថយន្តដឹកឧបករណ៍ភ្លេង របស់ក្រុមនាយគ្រួច តារាកំប្លែងជួបឧបទ្ទវហេតុគ្រោះថ្នាក់ចរាចរណ៍នៅលើកំណាត់ផ្លូវជាតិលេខ៣ កំពត-ព្រះសីហនុ កាលពីវេលាម៉ោង៧ និង៣០នាទីព្រឹក ថ្ងៃទី២៤ ឧសភា ស្ថិតក្នុងភូមិព្រែកត្នោត ឃុំព្រែកត្នោត ស្រុកទឹកឈូ ដោយរថយន្តបានបុកក្មេងប្រុសកំពុងជិះកង់ បណ្តាលឱ្យស្លាប់ ចំណែកក្រុមភ្លេងរងរបួស៨នាក់ ក្នុងនោះនាយគ្រួច របួសបាក់ឆ្អឹងជំនីរបីកង់ ។
មន្ត្រីសមត្ថកិច្ចឱ្យដឹងថា មុនពេលកើតហេតុ ក្មេងប្រុសឈ្មោះ យាប់ សាន់ អាយុ១៣ឆ្នាំ ជិះកង់ពីលិចទៅកើត លុះមកដល់ចំណុចកើតហេតុជាផ្លូវកោង គេឃើញរថយន្តក្រុមភ្លេងរបស់នាយគ្រួចបួងចង្កូតមិនទាន់ ជ្រុលទៅបុកកង់ក្មេងពីក្រោយពេញទំហឹង បណ្តាលឱ្យខូចខាតកង់យ៉ាងដំណំ ឯក្មេងនោះផ្លោងបោកទៅលើផ្លូវរងរបួសធ្ងន់ បញ្ជូនទៅសង្គ្រោះនៅមន្ទីរពេទ្យបង្អែកខេត្តកំពត តែជាអកុសលក្រោយមកក៏បានស្លាប់ ។
ឯរថយន្ត បន្ទាប់ពីបុកកង់ក៏រេចង្កូតធ្លាក់ចូលស្នាមភ្លោះ បណ្តាលឱ្យខ្ទាតមនុស្ស៨នាក់ចេញពីរថយន្តរងរបួស ចំណែកនាយគ្រួចក៏នៅក្នុងរថយន្តនោះដែរ រងរបួសធ្ងន់ជាងគេបាក់ឆ្អឹងជំនីរអស់៣កង់ បញ្ជូនទៅសង្គ្រោះនៅមន្ទីរបង្អែកពេទ្យកំពត ។ ក្រោយពេលកើតហេតុ រថយន្ត និងកង់ត្រូវសមត្ថកិច្ចយកមករក្សាទុកនៅអធិការដ្ឋាននគរបាលស្រុកទឹកឈូ ដោះស្រាយតាមផ្លូវច្បាប់ ឯសពប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណី ៕
ចែករំលែកព័តមាននេះ