នៅម៉ោង៨និង៣០នាទីព្រឹកថ្ងៃទី២៣ ឧសភា ២០១៣នេះ គណៈកម្មាធិការជាតិរៀបចំការបោះឆ្នោត(គជប) នឹងរៀបចំពិធីចាប់ឆ្នោត ដើម្បីកំណត់លំដាប់លេខរៀងឈ្មោះគណបក្សនយោបាយនៅលើសន្លឹកឆ្នោត ។
ពិធីនេះនឹងប្រព្រឹត្តទៅនៅទីស្តីការគជប ក្នុងបរិវេណក្រសួងមហាផ្ទៃ អគារ H ដោយមានការយាងនិមន្តសម្តេចព្រះសង្ឃរាជទំាងពីរគណៈ ប្រោសប្រទានការចាប់ឆ្នោត ។
គួរបញ្ជាក់ថា នៅក្នុងការបោះឆ្នោតជ្រើសតំាងតំណាងរាស្រ្តនៅតិកាលទី៥ ដែលតាមគម្រោងនឹងប្រព្រឹត្តទៅនៅថ្ងៃទី២៨ កក្កដា ២០១៣ មានគណបក្សនយោបាយចំនួន០៨ ត្រូវចូលរួមប្រកួតប្រជែងយកអាសនៈសភាចំនួន១២៣ ក្នុងនោះមានគណបក្សប្រជាជនកម្ពុជា គណបក្សហ៊្វុនស៊ិនប៉ិច គណបក្សសញ្ជាតិកម្ពុជា គណបក្សសម្ព័ន្ឋដើម្បីប្រជាធិបតេយ្យ គណបក្សសាធារណរដ្ឋប្រជាធិបតេយ្យ គណបក្សសង្រ្គោះជាតិ គណបក្សខ្មែរឈប់ក្រ និងគណបក្សខ្មែរអភិវឌ្ឍន៏សេដ្ឋកិច្ច ។
គួរំលឹកផងដែរថា នៅក្នុងការបោះឆ្នោតជ្រើសតំាងតំណាងរាស្រ្តនីតិកាលទី៤ កាលពីថ្ងៃទី២៨ កក្កដា ២០០៨ មានគណបក្សនយោបាយចូលរួមប្រកួតប្រជែងចំនួន១១ ក្នុងនោះលំដាប់លេខរៀងឈ្មោះគណបក្សនយោបាយនៅលើសន្លឹកឆ្នោតរួមមាន៖
០១-គណបក្សនរោត្តមរណប្ញទិ
០២-គណបក្សប្រជាធិបតេយ្យខ្មែរ
០៣-គណបក្សសម្ព័ន្ឋដើម្បីប្រជាធិបតេយ្យ
០៤-គណបក្សប្រជាជនកម្ពុជា
០៥-គណបក្សខ្មែរឈប់ក្រ
០៦-គណបក្សខ្មែរសាធារណរដ្ឋ
០៧-គណបក្សសង្គមយុត្តិធម៌
០៨-គណបក្សហ៊្វុនស៊ិនប៉ិច
០៩-គណបក្សសមរង្ស៊ី
១០-គណបក្សហង្សដារ៉ា ចលនាប្រជាធិបតេយ្យ
១១-គណបក្សសិទ្ឋិមនុស្ស
ចែករំលែកព័តមាននេះ