ទណ្ឌិតងើបរកបត់ជើងពេលយប់ធ្លាក់ពីឡៅតឿរបួសធ្ងន់
ដោយ ៖ អប្សរា
ថ្ងៃចន្ទ ទី៦ ខែកញ្ញា ឆ្នាំ២០១០ ម៉ោង ១០:២៥
តាសោម
ទណ្ឌិតម្នាក់ត្រូវបានឆ្មាំគុកដឹកយកទៅសង្គ្រោះបន្ទាន់ នៅមន្ទីរពេទ្យបង្អែកចំការចេក
ខេត្តព្រះសីហនុ ៖ យុវជនទណ្ឌិតម្នាក់ត្រូវបានឆ្មាំគុកដឹកតាមរថយន្តយកទៅសង្គ្រោះបន្ទាន់ នៅមន្ទីរពេទ្យបង្អែកចំការចេក ក្រុងព្រះសីហនុ ក្រោយពេលដែលទណ្ឌិតរូបនេះបានធ្លាក់ពីលើឡៅតឿ មានកំពស់ប្រមាណជាង២ម៉ែត្រ នៅក្នុងបន្ទប់ពន្ធនាគារ បណ្តាលឱ្យរងរបួសក្បាលផ្នែកខាងឆ្វេងជាទំងន់ ។ លោកប៊ូ ណាក់សោភ័ណ មន្ត្រីឆ្មាំគុកបានឱ្យដឹងថា ទណ្ឌិតដែលធ្លាក់ពីលើឡៅតឿហើយរងរបួសក្បាលជាទំងន់នោះ ឈ្មោះឈឿន ឆាយ ភេទប្រុស អាយុ១៩ឆ្នាំ មានស្រុកកំណើតនៅភូមិអូរចំណាក ឃុំអូរឧកញ៉ាហេង ស្រុកព្រៃនប់ ។
លោកបន្តទៀតថា ហេតុការណ៍គ្រោះថ្នាក់នេះកើតឡើងនៅវេលាម៉ោង៨និង២០នាទីយប់ថ្ងៃទី១ កញ្ញា ។ ផ្អែកតាមសំដីពិរុទ្ធជនដែលស្នាក់នៅបន្ទប់ឡៅតឿជាមួយជនរងគ្រោះ បានឱ្យដឹងថា នៅពេលដែលកំពុងដេកពួកគេបានឃើញឈឿន ឆាយ ងើប ដើរចុះទៅរកបន្ទប់បត់ជើងនៅខាងក្រោម ប៉ុន្តែពេលនោះឈឿន ឆាយ ពុំទាន់ដើរទៅដល់ជណ្តើរចុះផង ក៏ស្រាប់តែដួលធ្លាក់ចុះទៅក្រោមតែម្តង ។ ឃើញដូច្នេះ ពិរុទ្ធជនទាំងនោះបានចុះទៅជួយរឹត និង ធ្វើចលនាផ្តល់ព័ត៌មានដល់ឆ្មាំគុក ។
ក្រុមគ្រូពេទ្យនៃពន្ធនាគារខេត្តព្រះសីហនុ បានព្យាបាលលើមុខរបួស តែដោយមានសភាពធ្ងន់ធ្ងរពេក ក៏បញ្ជូនជនរងគ្រោះជាទណ្ឌិតមកកាន់មន្ទីរពេទ្យបង្អែកចំការចេកនៅវេលាម៉ោង៩ និង៥០នាទីយប់ថ្ងៃទី១ កញ្ញា ។
គួររំលឹកផងដែរថា ទណ្ឌិតឈឿន ឆាយ ត្រូវបានសាលាដំបូងខេត្តព្រះសីហនុ សំរេចផ្តន្ទាទោសឱ្យជាប់ពន្ធនាគាររយៈពេល២ឆ្នាំកន្លះ ពីបទប្លន់បច្ច័យព្រះសង្ឃនៅវត្តអូរចំណាក ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ ។ បន្ទាប់ពីទទួលគ្រោះថ្នាក់ទណ្ឌិតឈឿន ឆាយ កំពុងស្ថិតនៅក្នុងសភាពធ្ងន់ធ្ងរនៅឡើយ និងមានការយាមកាមយ៉ាងម៉ត់ចត់ពីឆ្មាំគុកផងដែរ ៕
