AFP កាលពីថ្ងៃទី២៤ មេសា ផ្សាយថា ញូវយ៉កនឹងក្លាយជាទីក្រុងដ៏ធំលើកដំបូងរបស់អាមេរិក ដែលបង្កើនអាយុអ្នកទិញបារីពី១៨ឆ្នាំទៅ២១ឆ្នាំ ។ នៅថ្ងៃទី២ ឧសភា សភាក្រុងញូវយ៉ក ត្រៀមអនុម័តលើសំណើបង្កើនអាយុអ្នកទិញបារីដែលទទួលការគាំទ្រពីលោកស្រីគ្រីស្ទីន គ្វីន ជាប្រធានសភា ដែលគ្រោងចូលប្រកួតប្រជែងតំណែងជាចៅហ្វាយក្រុង ។
លោកស្រីគ្វីនថ្លែងថា ការបង្កើនអាយុអ្នកទិញបារី នឹងជួយពន្យារការចូលក្នុងមជ្ឈដ្ឋានញៀនបារីរបស់យុវជន ។ ក្រុងញូវយ៉កមានច្បាប់ដ៏តឹងរ៉ឹងទាក់ទងនឹងបារី ដូចគ្នានឹងទីក្រុងធំៗជាច្រើនទៀតនៅសហរដ្ឋអាមេរិក ដែលហាមជក់បារីនៅក្នុងរង្គសាល និងភោជនីយដ្ឋាន រួមទាំងនៅទីសាធារណៈ ប៉ុន្តែញូវយ៉ក ក៏មានបម្រាមជក់បារីនៅបរិវេណឆ្នេរសមុទ្រផងដែរ ។ ក្រៅពីនេះ ពន្ធបារីនៅក្រុងញូវយ៉កក្នុងកម្រិតខ្ពស់ ។
អាជ្ញាធរក្រុងញូវយ៉កបញ្ជាក់ថា ក្នុងរយៈពេល១០ឆ្នាំកន្លងមក ការជក់បារីរបស់មនុស្សចាស់បានថយចុះពី២១,៥ភាគរយក្នុងឆ្នាំ២០០២ នៅសល់ត្រឹមតែ១៤,៨ភាគរយនៅក្នុងឆ្នាំ២០១១ ប៉ុន្តែចំនួនអ្នកជក់នៅក្នុងក្រុមយុវវ័យ នៅតែមិនប្រែប្រួលចាប់តាំងពីឆ្នាំ២០០៧មក ដោយមានចំនួន៨,៥ភាគរយ ។អាជ្ញាធរសង្ឃឹមថា ការបង្កើនអាយុរបស់អ្នកជក់នឹងជួយកាត់បន្ថយចំនួនអ្នកជក់ដែលមានអាយុពី១៨ទៅ២០ឆ្នាំបានដល់ទៅ៥៥ភាគរយ ៕
ចែករំលែកព័តមាននេះ