ប៉ូលិសនិយាយថា អ្នកទោស៨០០នាក់បានរត់ចេញពីពន្ធនាគារមួយនៅភាគខាងជើងប្រទេសនីហ្សេរីយ៉ា កាលពីថ្ងៃទី៨ កញ្ញា កន្លងមក ក្រោយពីកងកុំម៉ង់ដូរមួយកងវាយប្រហារលើពន្ធនាគារនោះ ។ ប៉ូលិសដដែលនិយាយឱ្យដឹងទៀតថា ការវាយប្រហារនោះបណ្តាលឱ្យស្លាប់ប៉ូលិសម្នាក់ ហើយមន្ត្រីពន្ធនាគារ២នាក់ទៀតរងរបួស ។ ការវាយប្រហារលើពន្ធនាគារនោះធ្វើឱ្យអ្នកទោស៨០០នាក់រត់គេចខ្លួន ប៉ុន្តែចាប់បានវិញ៣៥នាក់ ហើយឥឡូវនេះអាជ្ញាធរកំពុងស្រាវជ្រាវតាមចាប់អ្នកទោសដែលរត់គេចខ្លួន ដទៃទៀត ។ តាមសេចក្តីរាយការណ៍ឱ្យដឹងថា ខ្មាន់កាំភ្លើងដែលជាសមាជិកនៃនិកាយ Boko Haram ប្រមាណ២០០នាក់ បានបើកការវាយប្រហារលើពន្ធនាគារនោះ ក្នុងគោលបំណងបង្កការប្រយុទ្ធទ្រង់ទ្រាយធំមួយ ដើម្បីដោះលែងអ្នកទោស ។ ប៉ូលិសសង្ស័យថា កងកុំម៉ង់ដូបានវាយប្រហារលើពន្ធនាគារនោះ ពីព្រោះមានដាក់អ្នកទោស៨០នាក់ ជាសមាជិកនិកាយ Boko Haram ។ ពួកនិកាយ Boko Haram មានជំលោះជាមួយរដ្ឋាភិបាលនីហ្សេរីយ៉ា ដោយសារក្រុមនេះចង់ឱ្យរដ្ឋាភិបាលដាក់ឱ្យប្រើប្រាស់ច្បាប់អ៊ិស្លាមនៅតំបន់ភាគខាងជើងប្រទេស ដែលមានពលរដ្ឋភាគច្រើនជាអ្នកកាន់សាសនាមូស្លីម ៕
ចែករំលែកព័តមាននេះ