ប្រជាជនហ្វ៊ីលីពីនជិតពាក់កណ្តាលសំលឹងឃើញថាខ្លួនមានភាពក្រីក្រ
ដោយ ៖ សាម៉ន
ថ្ងៃព្រហស្បត្ត៏ ទី៩ ខែកញ្ញា ឆ្នាំ២០១០ ម៉ោង ១០:០០
គេហទំព័របរទេស
ទិដ្ឋភាពលំនៅឋានជនក្រីក្រនៅហ្វ៊ីលីពីន
ប្រជាជនហ្វ៊ីលីពីនជិតពាក់កណ្តាលគិតថា ពួកគេមានភាពក្រីក្រ ទោះបីជាសេដ្ឋកិច្ចរបស់ប្រទេសមានការរីកចំរើនក៏ដោយ ។ លទ្ធផលនៃការស្រាវជ្រាវបង្ហាញឱ្យដឹងថា ជនជាតិហ្វ៊ីលីពីន យ៉ាងតិច៩,៤លានគ្រួសារ ឬប្រហែល៥០% គិតថា ពួកគេក្រីក្រគឺកើនឡើងលើសពីអត្រា៤៣% ឬមានចំនួន៨,១លានគ្រួសារ ក្នុងការស្រាវជ្រាវកាលពី ខែមីនា កន្លងមក ។
លទ្ធផលនៃការស្រាវជ្រាវនោះបានចេញ ផ្សាយ ទោះបីជាតួលេខរបស់រដ្ឋាភិបាលបញ្ជាក់ថា ហ្វ៊ីលីពីន មានអត្រារីកចំរើនសេដ្ឋកិច្ច៧,៩% នៅឆមាសទី១ នៃឆ្នាំ២០១០ គឺ ជាការរីកចំរើនខ្ពស់បំផុតក្នុងអំឡុងពេលជាង២០ឆ្នាំ ។ តួលេខនោះខ្ពស់ជាងការសិក្សាស្រាវជ្រាវភាពក្រីក្រចុងក្រោយ ក្នុងឆ្នាំ២០០៦ ដែលបញ្ជាក់ថា មាន៣២,៩% នៃប្រជាជនហ្វ៊ីលីពីន ២៧,៦លាននាក់គិតថា ខ្លួនមានកង្វះខាត ។
មន្ត្រីជំនាញផ្នែកសេដ្ឋកិច្ចបង្ហាញថា តួលេខនោះមិនអាចយកទៅប្រៀបធៀបគ្នាបានទេខណៈតួលេខរបស់រដ្ឋាភិបាលសំអាងទៅលើចំណូល និងថ្លៃទំនិញគ្រឿងឧបភោគបរិភោគដែលចាំបាច់ ។
លោកបេនីញ៉ូ អាគីណូ ប្រធានាធិបតីហ្វ៊ីលីពីន បានសន្យាថា នឹងលើកកំពស់ប្រទេសជាតិឱ្យរួចផុតពីភាពក្រីក្រដោយបង្ក្រាបអំពើពុករលួយ និងបង្កើតគ្រឿងឧបភោគបរិភោគដែលចាំបាច់។ កាលពីដើមខែកន្លងមក រដ្ឋាភិបាលហ្វ៊ីលីពីន ទទួលស្គាល់ថា ហ្វ៊ីលីពីនអាចមិនសំរេចដល់គោលដៅនៃការអភិវឌ្ឍរបស់ UN ក្នុងការកាត់បន្ថយកំរិតភាពក្រីក្រឱ្យនៅសល់ត្រឹមពាក់កណ្តាលនៃភាពក្រីក្រខាងលើក្នុងឆ្នាំ២០១៥ ៕
